ਜਬਲਪੁਰ, 1 ਮਈ (ਪੀ.ਟੀ.ਆਈ.)-ਮੱਧ ਪ੍ਰਦੇਸ਼ ਦੇ ਜਬਲਪੁਰ ਸਥਿਤ ਬਰਗੀ ਡੈਮ 'ਚ ਬੀਤੀ ਸ਼ਾਮ ਲਗਪਗ 5 ਵਜੇ ਸੈਰ ਸਪਾਟਾ ਵਿਭਾਗ ਦਾ ਇਕ ਕਰੂਜ਼ ਅਚਾਨਕ ਆਏ ਤੇਜ਼ ਤੂਫ਼ਾਨ ਕਾਰਨ ਡੁੱਬ ਗਿਆ | ਹੁਣ ਤੱਕ 9 ਲਾਸ਼ਾਂ ਮਿਲ ਚੁੱਕੀਆਂ ਹਨ ਤੇ 28 ਵਿਅਕਤੀਆਂ ਨੂੰ ਸੁਰੱਖਿਅਤ ਕੱਢ ਲਿਆ ਗਿਆ ਹੈ | ਸਥਾਨਕ ਪ੍ਰਸ਼ਾਸਨ ਮੁਤਾਬਿਕ ਅਜੇ ਵੀ 6 ਵਿਅਕਤੀ ਲਾਪਤਾ ਹਨ | ਦੱਸਿਆ ਜਾ ਰਿਹਾ ਹੈ ਕਿ ਹਾਦਸੇ ਦੇ ਸਮੇਂ ਕਰੂਜ਼ 'ਚ ਲਗਪਗ 43 ਤੋਂ 47 ਸੈਲਾਨੀ ਸਵਾਰ ਸਨ | ਟਿਕਟ ਸਿਰਫ਼ 29 ਵਿਅਕਤੀਆਂ ਦੀ ਕੱਟੀ ਗਈ ਸੀ | ਹਾਦਸਾ ਕੰਢੇ ਤੋਂ ਲਗਪਗ 300 ਮੀਟਰ ਦੂਰ ਹੋਇਆ | ਜਿਸ ਸਮੇਂ ਕਰੂਜ਼ ਡੁੱਬਿਆ, ਉਸ ਸਮੇਂ ਹਵਾ ਦੀ ਰਫ਼ਤਾਰ 74 ਕਿੱਲੋਮੀਟਰ ਪ੍ਰਤੀ ਘੰਟਾ ਸੀ | ਬਰਗੀ ਸਿਟੀ ਸੀ.ਐਸ.ਪੀ. ਅੰਜ਼ੁਲ ਮਿਸ਼ਰਾ ਨੇ ਦੱਸਿਆ ਕਿ ਸ਼ੁਰੂਆਤੀ ਰਾਹਤ ਕਾਰਜਾਂ 'ਚ ਐਸ.ਡੀ.ਆਰ.ਐਫ. ਨੇ ਕਈ ਵਿਅਕਤੀਆਂ ਨੂੰ ਬਚਾ ਲਿਆ ਪਰ ਹਨੇਰਾ ਅਤੇ ਖ਼ਰਾਬ ਮੌਸਮ ਤੋਂ ਰਾਹਤ ਕਾਰਜ ਪ੍ਰਭਾਵਿਤ ਹੋ ਰਹੇ ਸਨ | ਅੱਜ ਸਵੇਰ ਤੋਂ ਮੁੜ ਰਾਹਤ ਕਾਰਜ ਜਾਰੀ ਹਨ | ਇਸੇ ਦੌਰਾਨ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਇਸ ਮੰਦਭਾਗੇ ਹਾਦਸੇ 'ਤੇ ਡੂੰਘੇ ਦੁੱਖ ਦਾ ਪ੍ਰਗਟਾਵਾ ਕੀਤਾ ਹੈ ਅਤੇ ਉਨ੍ਹਾਂ ਨੇ ਪ੍ਰਧਾਨ ਮੰਤਰੀ ਰਾਹਤ ਕੋਸ਼ ਤੋਂ ਮਿ੍ਤਕਾਂ ਦੇ ਪਰਿਵਾਰਕ ਮੈਂਬਰਾਂ ਨੂੰ 2-2 ਲੱਖ ਰੁਪਏ ਅਤੇ ਜ਼ਖ਼ਮੀਆਂ ਨੂੰ 50-50 ਹਜ਼ਾਰ ਰੁਪਏ ਦੇਣ ਦਾ ਐਲਾਨ ਕੀਤਾ ਹੈ | ਮੁੱਖ ਮੰਤਰੀ ਡਾ: ਮੋਹਨ ਯਾਦਵ ਨੇ ਜਾਂਚ ਦੇ ਆਦੇਸ਼ ਦਿੱਤੇ ਹਨ |
