ਚੰਡੀਗੜ੍ਹ ਹਵਾਈ ਅੱਡੇ 'ਤੇ ਇੰਡੀਗੋ ਦੇ ਜਹਾਜ਼ 'ਚ ਪਾਵਰ ਬੈਂਕ 'ਚ ਧਮਾਕਾ

ਮਹਿਲਾ ਡਾਕਟਰ ਸਮੇਤ 5 ਯਾਤਰੀ ਜ਼ਖ਼ਮੀ, ਐਮਰਜੈਂਸੀ ਸਲਾਈਡਾਂ ਰਾਹੀਂ ਯਾਤਰੀਆਂ ਨੂੰ ਕੱਢਿਆ ਬਾਹਰ
ਐੱਸ. ਏ. ਐੱਸ. ਨਗਰ, 5 ਮਈ (ਕਪਿਲ ਵਧਵਾ)-ਅੱਜ ਹੈਦਰਾਬਾਦ ਤੋਂ ਚੰਡੀਗੜ੍ਹ ਆਈ ਇੰਡੀਗੋ ਦੀ ਇਕ ਉਡਾਣ 'ਚ ਅਚਾਨਕ ਪਾਵਰ ਬੈਂਕ 'ਚ ਹੋਏ ਧਮਾਕੇ ਤੋਂ ਬਾਅਦ ਹੜਕੰਪ ਮਚ ਗਿਆ | ਇਸ ਹਾਦਸੇ 'ਚ ਕਰੀਬ 5 ਯਾਤਰੀਆਂ ਦੇ ਜ਼ਖ਼ਮੀ ਹੋਣ ਦੀ ਜਾਣਕਾਰੀ ਸਾਹਮਣੇ ਆਈ ਹੈ | ਹਾਦਸਾ ਉਸ ਵੇਲੇ ਵਾਪਰਿਆ ਜਦੋਂ ਫਲਾਈਟ ਸਥਾਨਕ ਸ਼ਹੀਦ ਭਗਤ ਸਿੰਘ ਅੰਤਰਰਾਸ਼ਟਰੀ ਹਵਾਈ ਅੱਡੇ 'ਤੇ ਲੈਂਡ ਹੋਣ ਤੋਂ ਬਾਅਦ ਖੜ੍ਹੀ ਸੀ | ਮਿਲੀ ਜਾਣਕਾਰੀ ਅਨੁਸਾਰ ਇਹ ਫਲਾਈਟ ਬਾਅਦ ਦੁਪਹਿਰ ਕਰੀਬ 3.29 ਵਜੇ ਲੈਂਡ ਹੋਈ ਸੀ | ਲੈਂਡਿੰਗ ਤੋਂ ਬਾਅਦ ਜਦੋਂ ਜਹਾਜ਼ ਪਾਰਕਿੰਗ ਵੇਅ ਨੰ.1 ਵੱਲ ਵਧ ਰਿਹਾ ਸੀ ਤਾਂ ਸੀਟ 39-ਸੀ 'ਤੇ ਬੈਠੇ ਇਕ ਯਾਤਰੀ ਨੇ ਆਪਣੇ ਬੈਗ 'ਚ ਰੱਖੇ ਪਾਵਰ ਬੈਂਕ ਵਿਚ ਅੱਗ ਲੱਗਣ ਬਾਰੇ ਕਰੂ ਨੂੰ ਸੂਚਿਤ ਕੀਤਾ | ਸੁਰੱਖਿਆ ਦੇ ਮੱਦੇਨਜ਼ਰ ਕੈਬਿਨ ਕਰੂ ਨੇ ਤੁਰੰਤ ਅੱਗ 'ਤੇ ਕਾਬੂ ਪਾਉਣ ਦੀ ਕੋਸ਼ਿਸ਼ ਕੀਤੀ, ਪਰ ਇਸ ਦੌਰਾਨ ਜਹਾਜ਼ ਵਿਚ ਧੂੰਆਂ ਫੈਲ ਗਿਆ, ਜਿਸ ਨਾਲ ਯਾਤਰੀਆਂ ਵਿਚ ਘਬਰਾਹਟ ਪੈਦਾ ਹੋ ਗਈ | ਸਾਰੀ ਸਥਿਤੀ ਨੂੰ ਦੇਖਦੇ ਹੋਏ ਐਮਰਜੈਂਸੀ ਪੋ੍ਰਟੋਕਾਲ ਲਾਗੂ ਕਰਦੇ ਹੋਏ ਕਰੀਬ 3.35 ਵਜੇ ਆਫ਼ਤ ਨਿਕਾਸ ਖੋਲ੍ਹ ਕੇ ਯਾਤਰੀਆਂ ਨੂੰ ਸਲਾਈਡਾਂ ਰਾਹੀਂ ਬਾਹਰ ਕੱਢਿਆ ਗਿਆ | ਜਹਾਜ਼ ਵਿਚ ਕੁੱਲ 198 ਯਾਤਰੀ, ਜਿੰਨ੍ਹਾਂ 'ਚ 2 ਬੱਚੇ ਅਤੇ 6 ਕਰੂ ਮੈਂਬਰ ਸਵਾਰ ਸਨ | ਏਅਰਫੋਰਸ ਦੀ ਫਾਇਰ ਟੈਂਡਰ ਟੀਮ ਕਰੀਬ 3.38 ਵਜੇ ਮੌਕੇ 'ਤੇ ਪਹੁੰਚੀ, ਪਰ ਉਸ ਸਮੇਂ ਤੱਕ ਸਥਿਤੀ ਪੂਰੀ ਤਰ੍ਹਾਂ ਕਾਬੂ ਵਿਚ ਆ ਚੁੱਕੀ ਸੀ | ਇਸ ਸੰਬੰਧੀ ਯਾਤਰੀ ਸੌਰਵ ਨੇ ਦੱਸਿਆ ਕਿ ਉਹ ਆਪਣੀ ਪਤਨੀ ਡਾ. ਰਿਚਾ, ਜੋ ਕਿ ਸੈਕਟਰ-34 ਚੰਡੀਗੜ੍ਹ ਵਿਚ ਸਟੇਟ ਹੈਲਥ ਏਜੰਸੀ ਵਿਚ ਤਾਇਨਾਤ ਹੈ, ਸਮੇਤ ਦੋ ਬੱਚਿਆਂ ਨਾਲ ਯਾਤਰਾ ਕਰਕੇ ਪਰਤੇ ਸਨ | ਜਦੋਂ ਫਲਾਈਟ ਹਵਾਈ ਅੱਡੇ 'ਤੇ ਪੁੱਜੀ ਤਾਂ ਅਚਾਨਕ ਜਹਾਜ਼ ਵਿਚ ਧੂੰਆਂ ਫੈਲਣਾ ਸ਼ੁਰੂ ਹੋ ਗਿਆ | ਕਰੂ ਮੈਂਬਰਾਂ ਨੇ ਯਾਤਰੀਆਂ ਨੂੰ ਸ਼ਾਂਤ ਰਹਿਣ ਲਈ ਕਿਹਾ ਅਤੇ ਬਾਅਦ ਵਿਚ ਐਮਰਜੈਂਸੀ ਸਲਾਈਡਾਂ ਰਾਹੀਂ ਬਾਹਰ ਕੱਢਣਾ ਸ਼ੁਰੂ ਕਰ ਦਿੱਤਾ | ਇਸ ਦੌਰਾਨ ਜ਼ਮੀਨ 'ਤੇ ਉਤਰਦੇ ਸਮੇਂ ਡਾ. ਰਿਚਾ ਦੀ ਲੱਤ 'ਤੇ ਗੰਭੀਰ ਸੱਟ ਲੱਗੀ, ਜਿਸ ਕਾਰਨ ਉਸ ਨੂੰ ਜ਼ੀਰਕਪੁਰ ਦੇ ਇਕ ਨਿੱਜੀ ਹਸਪਤਾਲ 'ਚ ਦਾਖ਼ਲ ਕਰਵਾਇਆ ਗਿਆ | ਸੁਰੱਖਿਆ ਏਜੰਸੀਆਂ ਅਤੇ ਹਵਾਈ ਅੱਡੇ ਦੀ ਅਥਾਰਿਟੀ ਵਲੋਂ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ ਅਤੇ ਇਹ ਪਤਾ ਲਗਾਇਆ ਜਾ ਰਿਹਾ ਹੈ ਕਿ ਪਾਵਰ ਬੈਂਕ ਵਿਚ ਧਮਾਕਾ ਕਿਵੇਂ ਹੋਇਆ |