ਨਵੀਂ ਦਿੱਲੀ, 25 ਜੂਨ (ਉਪਮਾ ਡਾਗਾ ਪਾਰਥ)- ਐਮਾਜ਼ੋਨ ਦੇ ਸੀ.ਈ.ਓ. ਐਂਡੀ ਜੇਸੀ ਨੇ ਵੀਰਵਾਰ ਨੂੰ ਨਵੀਂ ਦਿੱਲੀ ’ਚ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨਾਲ ਮੁਲਾਕਾਤ ਕੀਤੀ ਅਤੇ ਕੰਪਨੀ ਨੇ ਭਾਰਤ ’ਚ ਵੱਡੇ ਨਿਵੇਸ਼ ਦਾ ਐਲਾਨ ਵੀ ਕੀਤਾ। ਅਮਰੀਕੀ ਕੰਪਨੀ ਐਮਾਜ਼ੋਨ ਨੇ ਕਿਹਾ ਕਿ ਕੰਪਨੀ 2026 ਤੋਂ 2030 ਦਰਮਿਆਨ ਭਾਰਤ ’ਚ ਕੁੱਲ 48 ਅਰਬ ਅਮਰੀਕੀ ਡਾਲਰ (ਤਕਰੀਬਨ 4.1 ਲੱਖ ਕਰੋੜ ਰੁਪਏ) ਦਾ ਨਿਵੇਸ਼ ਕਰੇਗੀ। ਕੰਪਨੀ ਨੇ ਸਾਲ 2030 ਤੱਕ ਭਾਰਤ ’ਚ ਕੁੱਲ 38 ਲੱਖ ਲੋਕਾਂ ਨੂੰ ਰੁਜ਼ਗਾਰ ਦੇਣ ਦਾ ਵਾਅਦਾ ਵੀ ਕੀਤਾ, ਜੋ ਮੌਜੂਦਾ 28 ਲੱਖ ਦੇ ਅੰਕੜੇ ਤੋਂ 10 ਲੱਖ ਜ਼ਿਆਦਾ ਹੈ। ਕੰਪਨੀ ਨੇ ਸੋਸ਼ਲ ਮੀਡੀਆ ਮੰਚ ’ਤੇ ਪਾਏ ਸੰਦੇਸ਼ ’ਚ ਕਿਹਾ ਕਿ 2026 ਤੋਂ 2030 ਦਰਮਿਆਨ ਭਾਰਤ ’ਚ ਏ.ਆਈ. ਅਤੇ ਕਲਾਊਡ ਇਨਫਰਾਸਟਰਕਚਰ ’ਤੇ ਐਮਾਜ਼ੋਨ ਦਾ ਕੁੱਲ ਨਿਵੇਸ਼ 21 ਅਰਬ ਡਾਲਰ ਤੋਂ ਜ਼ਿਆਦਾ ਹੋ ਜਾਏਗਾ, ਜੋ ਭਾਰਤ ’ਚ ਕਿਸੇ ਆਲਮੀ ਟੈਕਨਾਲੋਜੀ ਕੰਪਨੀ ਵਲੋਂ ਏ.ਆਈ. ਅਤੇ ਕਲਾਊਡ ਦੇ ਖੇਤਰ ’ਚ ਕੀਤੇ ਜਾ ਰਹੇ ਸਭ ਤੋਂ ਵੱਡੇ ਨਿਵੇਸ਼ਾਂ ’ਚੋਂ ਇਕ ਹੋਏਗਾ।
