ਇਸ ਵਿੱਤੀ ਸਾਲ 7 ਉਪਗ੍ਰਹਿ ਲਾਂਚ ਕਰਨ ਦਾ ਟੀਚਾ-ਇਸਰੋ
ਅਜੀਤ ਡੈਸਕ
19-07-2026
ਸ੍ਰੀਹਰੀਕੋਟਾ (ਆਂਧਰਾ ਪ੍ਰਦੇਸ਼) 18 ਜੁਲਾਈ (ਪੀ.ਟੀ.ਆਈ.) -ਇਸਰੋ ਦੇ ਚੇਅਰਮੈਨ ਵੀ. ਨਾਰਾਇਣਨ ਨੇ ਐਲਾਨ ਕੀਤਾ ਹੈ ਕਿ ਇਸਰੋ ਵਲੋਂ ਮੌਜੂਦਾ ਵਿੱਤੀ ਸਾਲ ਦੌਰਾਨ ਸੱਤ ਉਪਗ੍ਰਹਿ ਲਾਂਚ ਕਰਨ ਦਾ ਟੀਚਾ ਹੈ। ਸਕਾਈਰੂਟ ਏਅਰੋਸਪੇਸ ਦੇ ਵਿਕਰਮ-1 ਰਾਕੇਟ ਦੇ ਇਤਿਹਾਸਕ ਪਹਿਲੇ ਔਰਬਿਟਲ ਲਾਂਚ ਤੋਂ ਬਾਅਦ ਪ੍ਰੈੱਸ ਕਾਨਫਰੰਸ ’ਚ ਬੋਲਦੇ ਹੋਏ ਨਾਰਾਇਣਨ ਨੇ ਕਿਹਾ ਕਿ ਦੋ ਉਪਗ੍ਰਹਿ ਪੂਰੀ ਤਰ੍ਹਾਂ ਬਣ ਚੁੱਕੇ ਹਨ, ਜਦਕਿ ਪੰਜ ਤੋਂ ਛੇ ਹੋਰ ਏਕੀਕਰਨ ਦੇ ਆਖਰੀ ਪੜਾਅ ’ਚ ਹਨ। ਉਨ੍ਹਾਂ ਕਿਹਾ ਕਿ ਇਸ ਵਿੱਤੀ ਸਾਲ ਅਸੀਂ ਘੱਟੋ-ਘੱਟ ਸੱਤ ਉਪਗ੍ਰਹਿ ਲਾਂਚ ਕਰਨ ਦਾ ਟੀਚਾ ਬਣਾਇਆ ਹੈ। ਅਸੀਂ 2 ਮਹੀਨਿਆਂ ਦੇ ਅੰਦਰ ਲਾਂਚ ਸ਼ੁਰੂ ਕਰਾਂਗੇ। ਪੁਲਾੜ ਏਜੰਸੀ ਦੇ ਆਉਣ ਵਾਲੇ ਸੰਚਾਲਨ ਸ਼ਡਿਊਲ ’ਚ ਗਗਨਯਾਨ ਮਨੁੱਖੀ ਪੁਲਾੜ ਉਡਾਣ ਪ੍ਰੋਗਰਾਮ ਤਹਿਤ ਪਹਿਲਾ ਮਨੁੱਖ ਰਹਿਤ ਮਿਸ਼ਨ, ਨਿਰਧਾਰਤ ਸੈਟੇਲਾਈਟ ਲਾਂਚਾਂ ’ਚ ਸ਼ਾਮਿਲ ਹੈ।
