ਲੇਖਕ ਟੇਰਕਿਆਣਾ ਨੇ ਸਾਲ 2025 ਦੀਆਂ ਘਟਨਾਵਾਂ ਨੂੰ ਨਿਵੇਕਲੇ ਢੰਗ ਨਾਲ ਕੀਤਾ ਪੇਸ਼
ਅਜੀਤ ਡੈਸਕ
03-01-2026
ਹੁਸ਼ਿਆਰਪੁਰ, 2 ਜਨਵਰੀ (ਨਰਿੰਦਰ ਸਿੰਘ ਬੱਡਲਾ)-ਲੇਖਕ ਰਘਵੀਰ ਸਿੰਘ ਟੇਰਕਿਆਣਾ ਲਗਭਗ ਅੱਧੀ ਸਦੀ ਤੋਂ ਹਰ ਨਵੇਂ ਸਾਲ ਉੱਤੇ ਹਜ਼ਾਰਾਂ ਦੀ ਤਾਦਾਦ ਵਿਚ ਆਪਣੇ ਦੋਸਤਾਂ-ਮਿੱਤਰਾਂ, ਸਾਕ ਸੰਬੰਧੀਆਂ ਤੇ ਜਾਣਕਾਰ ਲੋਕਾਂ ਨੂੰ ਇਕ ਨਿਵੇਕਲੀ ਕਿਸਮ ਦਾ ਵਧਾਈ ਕਾਰਡ ਭੇਜਦੇ ਆ ਰਹੇ ਹਨ | ਇਸ ਵਾਰ ਵੀ 2026 ਦੇ ਨਵੇਂ ਸਾਲ ਦੀ ਆਮਦ 'ਤੇ ਟੇਰਕਿਆਣਾ ਨੇ ਆਪਣੇ ਸ਼ਾਇਰਾਨਾ ਅੰਦਾਜ਼ 'ਚ ਬਹੁਤ ਸਾਰੀਆਂ ਰਾਜਨੀਤਕ ਪਾਰਟੀਆਂ ਦੀ ਕਾਰਗੁਜ਼ਾਰੀ 'ਤੇ ਵੱਖ-ਵੱਖ ਆਗੂਆਂ ਦੀਆਂ ਗਤੀਵਿਧੀਆਂ 'ਤੇ ਸੋਹਣੇ ਵਿਅੰਗ ਕੱਸੇ ਹਨ | ਉਨ੍ਹਾਂ ਦੇ ਨਵੇਂ ਸਾਲ ਦਾ ਕਾਰਡ ਦੀ ਪ੍ਰਸੰਸਕਾਂ ਵੱਲੋਂ ਬੜੀ ਬੇਸਬਰੀ ਨਾਲ ਉਡੀਕ ਕੀਤੀ ਜਾਂਦੀ ਹੈ | 2026 ਨਵੇਂ ਸਾਲ 'ਤੇ ਵੀ ਲੇਖਕ ਟੇਰਕਿਆਣਾ ਦਾ ਕਾਰਡ ਭੇਜਣ ਦਾ ਇਹ ਸਿਲਸਿਲਾ ਬਾ-ਦਸਤੂਰ ਜਾਰੀ ਹੈ | ਉਨ੍ਹਾਂ ਵੱਲੋਂ ਲਿਖੇ ਇਸ ਕਾਰਡ 'ਚ ਪਾਏ 32 ਸ਼ੇਅਰਾਂ 'ਚੋਂ ਇਕ ਸ਼ੇਅਰ 'ਤੁਸੀਂ ਸਮਝਦੇ ਮੈਂ ਸ਼ਾਇਰ ਬਣ ਗਿਆ, ਮੈਨੂੰ ਹੈ ਅਜੇ ਸ਼ੱਕ ਬੇਸ਼ੱਕ ਸ਼ਾਇਰੀ,ਲੈ ਆਈ ਮੈਨੂੰ, ਵੀਹ ਸੌ ਛੱਬੀ ਤੱਕ' ਵੀ ਦਰਜ ਹੈ | ਉਨ੍ਹਾਂ ਦੇ ਇਸ ਨਵੇਂ ਸਾਲ ਦੇ ਕਾਰਡ ਨੂੰ ਪ੍ਰਸੰਸਕਾਂ ਵੱਲੋਂ ਭਰਪੂਰ ਸਲਾਹਿਆ ਜਾ ਰਿਹਾ ਹੈ |
