ਹਠੂਰ, 23 ਜਨਵਰੀ (ਜਸਵਿੰਦਰ ਸਿੰਘ ਛਿੰਦਾ)-ਪਿੰਡ ਦੇਹੜਕਾ ਦੇ ਦੂਰ ਦੁਰਾਡੇ ਪੜ੍ਹਨ ਵਾਲੇ ਬੱਚਿਆਂ ਅਤੇ ਨੌਕਰੀਪੇਸ਼ਾ ਲੋਕਾਂ ਨੂੰ ਆਪਣੀ ਡਿਊਟੀ ਅਤੇ ਪੜ੍ਹਨ ਜਾਣ ਵਿਚ ਮੁਸ਼ਕਿਲ ਆ ਰਹੀ ਹੈ, ਕਿਉਂਕਿ ਸਵੇਰ ਦੇ ਸਮੇਂ ਜੋ ਰੋਡਵੇਜ਼ ਦੀਆਂ ਬੱਸਾਂ ਆਉਂਦੀਆਂ ਸਨ, ਉਹ ਹੁਣ ਬੰਦ ਹਨ | ਜਾਣਕਾਰੀ ਅਨੁਸਾਰ ਸਵੇਰੇ 5.15, ਫੇਰ 6 ਵਜੇ ਅਤੇ ਫਿਰ 7 ਕੁ ਵਜੇ ਤਿੰਨ ਰੋਡਵੇਜ਼ ਦੀਆਂ ਬੱਸਾਂ ਆਉਂਦੀਆਂ ਸਨ | ਸਵਾ ਪੰਜ ਵਾਲੀ ਬੱਸ ਤਾਂ ਮਾਣੂੰਕੇ ਤੋਂ ਸਿੱਧੀ ਭੰਮੀਪੁਰਾ ਵਿਚ ਦੀ ਪਿਛਲੇ ਲੰਮੇ ਸਮੇਂ ਤੋਂ ਜਾ ਰਹੀ ਹੈ | ਪਰ ਹੁਣ 6 ਵਜੇ ਅਤੇ 7 ਵਜੇ ਵਾਲੀਆਂ ਬੱਸਾਂ ਵੀ ਹਟ ਗਈਆਂ ਹਨ | ਜਿਸ ਕਰਕੇ ਸਵੇਰੇ ਸਕੂਲ, ਕਾਲਜ ਜਾਣ ਲਈ ਜਿੱਥੇ ਬੱਚਿਆਂ ਨੂੰ ਮੁਸ਼ਕਿਲ ਆ ਰਹੀ ਹੈ ਉੱਥੇ ਨੌਕਰੀਪੇਸ਼ਾ ਮੁਲਾਜ਼ਮਾਂ ਨੂੰ ਵੀ ਮੁਸ਼ਕਿਲ ਆ ਰਹੀ ਹੈ | ਇਸ ਕੜਾਕੇ ਦੀ ਠੰਢ 'ਚ ਲੋਕ ਸ਼ਹਿਰ ਤੱਕ ਆਪੋ ਆਪਣੇ ਸਾਧਨ 'ਤੇ ਜਾਣ ਲਈ ਮਜ਼ਬੂਰ ਹਨ | ਇਸ ਸਬੰਧੀ ਜਦ ਰੋਡਵੇਜ਼ ਜਗਰਾਉਂ ਡੀਪੂ ਦੇ ਜਨਰਲ ਮੈਨੇਜਰ ਜਗਰਾਜ ਸਿੰਘ ਨਾਲ ਸੰਪਰਕ ਕੀਤਾ ਤਾਂ ਉਨ੍ਹਾਂ ਦੱਸਿਆ ਕਿ ਜੋ ਬੱਸ 6 ਵਜੇ ਪਿੰਡ ਦੇਹੜਕਾ ਪੁੱਜਦੀ ਸੀ ਉਸਦਾ ਚੰਡੀਗੜ੍ਹ ਰੋਡ 'ਤੇ ਭਿਆਨਕ ਹਾਦਸਾ ਹੋ ਗਿਆ ਸੀ | ਜਿਸ ਕਰਕੇ ਬੱਸ ਨੁਕਸਾਨੀ ਗਈ ਅਤੇ ਅਜੇ ਤੱਕ ਡੀਪੂ ਵਿਚ ਨਹੀਂ ਪੁੱਜੀ, ਉੱਥੇ ਬੱਸ ਦੇ ਡਰਾਇਵਰ ਦੇ ਵੀ ਗੰਭੀਰ ਸੱਟਾਂ ਵੱਜੀਆਂ ਸਨ | ਉਨ੍ਹਾਂ ਇਹ ਵੀ ਦੱਸਿਆ ਕਿ ਜਗਰਾਉਂ ਡੀਪੂ ਵਿਚ ਬੱਸਾਂ ਦੀ ਪਹਿਲਾਂ ਹੀ ਘਾਟ ਚਲਦੀ ਹੈ, ਪਰ ਫਿਰ ਵੀ ਉਹ ਇਸ ਵੱਲ ਗੌਰ ਕਰਦੇ ਇਕ ਰੂਟ ਜਲਦੀ ਚਲਾਉਣਗੇ |
