ਰਾਏਕੋਟ, 26 ਮਈ (ਬਲਵਿੰਦਰ ਸਿੰਘ ਲਿੱਤਰ)-26 ਮਈ ਨੂੰ ਪੈ ਰਹੀ ਤਿੱਖੀ ਗਰਮੀ ਅਤੇ ਬੀਤੀ ਰਾਤ ਹੋਈ ਲੜਾਈ ਤੇ ਸਵੇਰ ਸਮੇਂ ਵਾਰਡ ਨੰਬਰ-04 ਦੇ ਕਾਂਗਰਸੀ ਉਮੀਦਵਾਰ ਜਗਦੇਵ ਸਿੰਘ ਗਿੱਲ 'ਤੇ ਤੇਜ਼ਧਾਰ ਹਥਿਆਰਾਂ ਨਾਲ ਹੋਏ ਕਾਤਲਾਨਾ ਹਮਲੇ ਤੋਂ ਬਾਅਦ ਸ਼ਹਿਰ ਵਿਚ ਪੂਰੇ ਦਿਨ ਡਰ ਦਾ ਮਾਹੌਲ ਬਣਿਆ ਰਿਹਾ | ਕੁਝ ਲੋਕ ਗਰਮੀ ਕਾਰਨ ਘਰਾਂ ਤੋਂ ਬਾਹਰ ਨਹੀਂ ਨਿਕਲੇ, ਜਦਕਿ ਕੁਝ ਲੋਕ ਸੋਸ਼ਲ ਮੀਡੀਆ 'ਤੇ ਵਾਇਰਲ ਹੋ ਰਹੀ ਜ਼ਖਮੀ ਜਗਦੇਵ ਸਿੰਘ ਦੀ ਵੀਡੀਓ ਦੇਖ ਕੇ ਇੰਨੇ ਸਹਿਮ ਗਏ ਕਿ ਉਹ ਪੋਲਿੰਗ ਬੂਥਾਂ 'ਤੇ ਜਾਣ ਤੋਂ ਘਬਰਾ ਰਹੇ ਸਨ | ਇਸ ਕਾਰਨ ਸ਼ਹਿਰ ਦੇ ਕਈ ਪੋਲਿੰਗ ਬੂਥ ਬਿਲਕੁਲ ਸੁੰਨੇ ਨਜ਼ਰ ਆ ਰਹੇ ਸਨ | ਜਿਸ ਦੌਰਾਨ ਵਾਰਡ ਨੰਬਰ-09 ਦੇ ਪੋਲਿੰਗ ਬੂਥ ਨੰਬਰ-15 'ਤੇ ਵੋਟਰਾਂ ਦੀ ਆਮਦ ਘੱਟ ਦੇਖਣ ਨੂੰ ਮਿਲੀ, ਜਿਸ ਕਰਕੇ ਇੰਨ੍ਹਾਂ ਬੂਥਾਂ 'ਤੇ ਸੰਨਾਟਾ ਛਾਇਆ ਰਿਹਾ |
