ਨਵਾਂਸ਼ਹਿਰ, 3 ਜਨਵਰੀ (ਦੀਦਾਰ ਸਿੰਘ ਸ਼ੇਤਰਾ)-ਸਰਕਾਰਾਂ, ਸਿਆਸੀ ਆਗੂ ਇੱਥੋਂ ਤੱਕ ਕਿ ਬੌਧਿਕ ਪ੍ਰਤਿਭਾ ਵਾਲੇ ਅਤੇ ਉੱਚੇ ਅਹੁਦਿਆਂ 'ਤੇ ਬਿਰਾਜਮਾਨ ਵਿਅਕਤੀ ਲੋਕਾਂ ਦੀ ਕਚਹਿਰੀ 'ਚ ਜਾ ਕੇ ਤੱਥ ਪੇਸ਼ ਕਰਨ ਦੀ ਥਾਂ ਆਪਣੀਆਂ ਕਮਜ਼ੋਰੀਆਂ ਨੂੰ ਲੁਕਾਉਣ ਦੇ ਲਈ ਪੁਲਿਸ ਦਸਤੇ, ਅਦਾਲਤਾਂ ਦਾ ਸਹਾਰਾ ਲੈਂਦੇ ਹਨ | ਸਾਡਾ ਹਕੂਮਤੀ ਪ੍ਰਬੰਧ ਤਫ਼ਤੀਸ਼ੀ ਢਾਂਚੇ ਦੀ ਵਰਤੋਂ ਕਰਕੇ ਆਲੋਚਨਾ ਨੂੰ ਦਬਾਉਣਾ ਨਹੀਂ, ਸਗੋਂ ਆਲੋਚਨਾ ਸੁਣ ਕੇ ਦਰੁਸਤੀ ਕਰਨ ਦਾ ਹੈ | ਇਹ ਪ੍ਰਗਟਾਵਾ ਕਰਦਿਆਂ ਪ੍ਰਸਿੱਧ ਚਿੰਤਕ ਡਾ. ਪਿਆਰੇ ਲਾਲ ਗਰਗ ਸਾਬਕਾ ਰਜਿਸਟਰਾਰ ਬਾਬਾ ਫ਼ਰੀਦ ਮੈਡੀਕਲ ਯੂਨੀਵਰਸਿਟੀ ਨੇ ਕਿਹਾ ਕਿ ਸਾਡਾ ਫ਼ਲਸਫ਼ਾ ਨਜ਼ਰਸਾਨੀ ਕਰਨ ਦਾ ਹੈ | ਜੇਕਰ ਅਸੀਂ ਗ਼ਲਤ ਨਹੀਂ ਵੀ ਤਾਂ ਵੀ ਪੁਲਿਸ 'ਚ ਮਾਮਲੇ ਦਰਜ ਕਰਨਾ ਕਿਥੋਂ ਸਹੀ ਹੈ, ਸਰਾਸਰ ਗ਼ਲਤ ਹੈ | ਡਾ. ਗਰਗ ਨੇ ਕਿਹਾ ਕਿ ਪੱਤਰਕਾਰਾਂ ਖ਼ਿਲਾਫ਼ ਕੇਸ ਦਰਜ ਕਰਨਾ ਸਰਕਾਰ ਦੀ ਕਮਜ਼ੋਰੀ ਦਾ ਪ੍ਰਗਟਾਵਾ ਹੈ | ਉਨ੍ਹਾਂ ਕਿਹਾ ਕਿ ਸਾਰੇ ਚੇਤੰਨ 'ਤੇ ਇਨਸਾਫ਼ ਪਸੰਦ ਵਿਅਕਤੀਆਂ ਦੀ ਮੰਗ ਹੈ ਕਿ ਇਹ ਮਾਮਲਾ ਰੱਦ ਕੀਤਾ ਜਾਵੇ | ਸਰਕਾਰ ਕੋਝੇ ਹੱਥਕੰਡਿਆਂ ਦੀ ਸ਼ਿਕਾਰ ਹੋਣ ਦੀ ਥਾਂ ਤੰਗਦਿਲ ਵਿਚੋਂ ਬਾਹਰ ਆ ਕੇ ਲੋਕਾਂ ਦੀ ਕਚਹਿਰੀ ਵਿੱਚ ਉਠਾਏ ਜਾ ਰਹੇ ਸਵਾਲਾਂ ਨੁਕਤਿਆਂ ਦਾ ਦਲੀਲਾਂ ਸਹਿਤ ਜਵਾਬ ਦੇਵੇ |
