ਮੁਕੰਦਪੁਰ, 22 ਫਰਵਰੀ (ਅਮਰੀਕ ਸਿੰਘ ਢੀਂਡਸਾ) - ਗੁਰੂ ਨਾਨਕ ਕਾਲਜ ਫਾਰ ਵੁਮਨ ਬੰਗਾ ਵਿਖੇ ਹੋਈ ਸਲਾਨਾ ਅਥਲੈਟਿਕ ਮੀਟ ਵਿੱਚ ਬੈਸਟ ਐਥਲੀਟ ਚੁਣੀ ਗਈ ਰਮਨਪ੍ਰੀਤ ਕੌਰ ਜਿਸ ਨੇ 100 ਮੀਟਰ, 200 ਮੀਟਰ ਅਤੇ 400 ਮੀਟਰ ਦੌੜ ਵਿੱਚ 3 ਸੋਨ ਤਮਗੇ ਜਿੱਤ ਕੇ ਨਵਾਂ ਕੀਰਤੀਮਾਨ ਸਥਾਪਿਤ ਕੀਤਾ, ਦਾ ਕਲੇਰ ਐਥਲੈਟਿਕਸ ਅਕੈਡਮੀ ਸਰਹਾਲ ਕਾਜ਼ੀਆਂ ਵਿਖੇ ਵਿਸ਼ੇਸ਼ ਸਨਮਾਨ ਕੀਤਾ ਗਿਆ | ਅਕੈਡਮੀ ਦੇ ਸੰਚਾਲਕ ਅਤੇ ਵਰਲਡ ਵੈਟਰਨ ਅਥਲੀਟ ਰਬਿੰਦਰ ਸਿੰਘ ਕਲੇਰ ਨੇ ਦੱਸਿਆ ਕਿ ਬੰਗਾ ਨਜ਼ਦੀਕ ਕਟਾਰੀਆਂ ਪਿੰਡ ਦੀ ਜੰਮਪਲ ਰਮਨਪ੍ਰੀਤ ਕੌਰ ਕਲੇਰ ਅਕੈਡਮੀ ਦੀ ਬਚਪਨ ਤੋਂ ਐਥਲੀਟ ਚਲੀ ਆ ਰਹੀ ਹੈ ਜਿਸ ਨੇ ਗੁਰੂ ਨਾਨਕ ਕਾਲਜ ਬੰਗਾ ਦੀ ਸਲਾਨਾ ਐਥਲੈਟਿਕਸ ਮੀਟ ਤਿੰਨ ਦੌੜਾਂ ਵਿੱਚੋਂ ਅੱਬਲ ਰਹਿ ਕੇ ਜਿੱਥੇ ਆਪਣੇ ਮਾਂ-ਬਾਪ ਦਾ ਨਾਮ ਰੌਸ਼ਨ ਕੀਤਾ ਉਥੇ ਨਾਲ ਹੀ ਕਲੇਰ ਐਥਲੈਟਿਕਸ ਅਕੈਡਮੀ ਦਾ ਸਿਰ ਵੀ ਮਾਣ ਨਾਲ ਉੱਚਾ ਕਰਵਾਇਆ | ਇਸ ਕਰਕੇ ਅਕੈਡਮੀ ਵਿਖੇ ਰਮਨਪ੍ਰੀਤ ਕੌਰ ਨੂੰ ਇੱਕ ਸੋਨੇ ਦਾ ਤਗਮਾ ਅਤੇ 2100 ਰੁਪਏ ਦੀ ਨਕਦ ਰਾਸ਼ੀ ਦੇ ਨਾਲ ਸਿਰੋਪਾ ਦੇ ਕੇ ਸਨਮਾਨਿਤ ਕੀਤਾ ਗਿਆ | ਉਹਨਾਂ ਕਿਹਾ ਕਿ ਸਾਨੂੰ ਇਸ ਬੱਚੀ ਤੋਂ ਛੋਟੀ ਉਮਰੇ ਹੀ ਬਹੁਤ ਆਸਾਂ ਤੇ ਉਮੀਦਾਂ ਸਨ ਜਿਨ੍ਹਾਂ ਨੂੰ ਇਹ ਬੱਚੀ ਕਦਮ ਦਰ ਕਦਮ ਪੂਰੀਆਂ ਕਰ ਰਹੀ ਹੈ | ਇਸ ਮੌਕੇ ਸਾਬਕਾ ਸਰਪੰਚ ਬਿਸ਼ੰਬਰ ਲਾਲ, ਅਵਤਾਰ ਸਿੰਘ, ਰਣਧੀਰ ਸਿੰਘ, ਪਰਮਜੀਤ ਸਿੰਘ, ਜਗਦੀਸ਼ ਬਸਰਾ, ਨਵੀਨ ਮਹੇ, ਰਵਿੰਦਰ ਕੁਮਾਰ ਤੇ ਰੂਪ ਲਾਲ ਵੀ ਮੌਜੂਦ ਸਨ |
