ਕਟਾਰੀਆਂ, 6 ਅਪ੍ਰੈਲ (ਪ੍ਰੇਮੀ ਸੰਧਵਾਂ)-ਇਤਿਹਾਸਕ ਗੁਰਦੁਆਰਾ ਸ੍ਰੀ ਡੰਡਾ ਸਾਹਿਬ (ਪਾਤਿਸ਼ਾਹੀ ਸੱਤਵੀਂ) ਪਿੰਡ ਸੰਧਵਾਂ ਦੇ ਗ੍ਰੰਥੀ ਕਥਾਵਾਚਕ ਗਿਆਨੀ ਗੁਰਵਿੰਦਰ ਸਿੰਘ ਨੇ ਗੱਲਬਾਤ ਕਰਦਿਆਂ ਕਿਹਾ ਕਿ ਗੁਰਬਾਣੀ ਹੀ ਸਭ ਦੁੱਖਾਂ ਦੀ ਦਵਾ ਹੈ, ਕਿਉਂਕਿ ਕਈ ਵਾਰੀ ਵੱਡੇ-ਵੱਡੇ ਦੁੱਖ ਡਾਕਟਰਾਂ ਦੀ ਦਵਾਈ ਨਾਲ ਠੀਕ ਨਹੀਂ ਹੁੰਦੇ | ਉਹ ਦੁੱਖ ਕਈ ਵਾਰੀ ਪ੍ਰਮਾਤਮਾ ਦਾ ਸੱਚੇ ਦਿਲ ਨਾਲ ਜੱਪੇ ਨਾਮ ਨਾਲ ਠੀਕ ਹੋ ਜਾਂਦੇ ਹਨ | ਉਨ੍ਹਾਂ ਕਿਹਾ ਕਿ ਸਾਨੂੰ ਮੋਹ-ਮਾਇਆ, ਕੋਠੀਆਂ, ਕਾਰਾਂ ਅਤੇ ਮਾਇਆ ਦੇ ਗੰਜ ਦੇਖ ਕੇ ਹੰਕਾਰ ਦੀ ਪੌੜੀ ਨਹੀਂ ਚੜ੍ਹਨਾ ਚਾਹੀਦਾ, ਕਿਉਂਕਿ ਕਬਰਾਂ 'ਚੋਂ ਕੌਡੀ-ਕੌਡੀ ਕਰਕੇ ਜੋੜੇ ਮਾਇਆ ਦੇ ਭਰੇ ਖਜ਼ਾਨਿਆਂ ਨੂੰ ਛੱਡ ਕੇ ਆਖਰ ਕਾਰੂ ਬਾਦਸ਼ਾਹ ਨੂੰ ਖ਼ਾਲੀ ਹੱਥ ਜਹਾਨੋਂ ਜਾਣਾ ਪਿਆ | ਉਨ੍ਹਾਂ ਕਿਹਾ ਕਿ ਸਾਨੂੰ ਵੱਧ ਤੋਂ ਵੱਧ ਲੋੜਵੰਦਾਂ ਦੀ ਸੇਵਾ ਕਰਕੇ ਇਸ ਮਨੁੱਖੀ ਜਾਮੇ ਦਾ ਲਾਭ ਉਠਾਉਣਾ ਚਾਹੀਦਾ ਹੈ, ਕਿਉਂਕਿ 84 ਲੱਖ ਜੂਨ ਭੁਗਤ ਕੇ ਬੜੇ ਭਾਗਾ ਨਾਲ ਇਨਸਾਨੀ ਜਾਮਾ ਮਿਲਦਾ ਹੈ |
