ਬੰਗਾ, 24 ਮਈ (ਸੁਰਿੰਦਰ ਸਿੰਘ ਕਰਮ ਲਧਾਣਾ)-ਨੈਸ਼ਨਲ ਫੁੱਟਬਾਲਰ ਗਿਆਨ ਚੰਦ ਪਾਠਕ ਦੀ ਅਗਵਾਈ ਵਿਚ ਹਰਦੇਵ ਸਿੰਘ ਖੇਡ ਸਟੇਡੀਅਮ ਕਾਹਮਾ ਵਿਖੇ ਫੁੱਟਬਾਲ ਕੋਚ ਗੁਰਨਾਮ ਸਿੰਘ ਦੇ ਸਹਿਯੋਗ ਨਾਲ ਸ਼ਹੀਦ ਭਗਤ ਸਿੰਘ ਲੀਜੈਡਸ ਬੰਗਾ ਬਲਾਕ ਫੁੱਟਬਾਲ ਕਲੱਬ ਵਲੋਂ ਇਕ ਰੋਮਾਂਚਕ ਫੁੱਟਬਾਲ ਮੈਚ ਕਰਵਾ ਕੇ ਨਵੀਂ ਪੀੜ੍ਹੀ ਨੂੰ ਖੇਡਾਂ ਵੱਲ ਪ੍ਰੇਰਿਤ ਕੀਤਾ | ਇਸ ਸੰਬੰਧੀ ਤਰਸੇਮ ਲਾਲ ਜ਼ਿਲ੍ਹਾ ਮਾਸ ਮੀਡੀਆ ਅਫ਼ਸਰ ਨੇ ਦੱਸਿਆ ਕਿ ਇਹ ਮੈਚ ਗਿਆਨ ਚੰਦ 7 ਤੇ ਸਰਬਜੀਤ ਸਿੰਘ 7 ਦੀਆਂ ਟੀਮਾਂ ਵਿਚਕਾਰ ਖੇਡਿਆ ਗਿਆ, ਜਿਸ ਵਿਚ ਸਰਬਜੀਤ ਸਿੰਘ 7 ਦੇ ਖਿਡਾਰੀਆਂ ਭਿੰਦਾ ਜੀਂਦੋਵਾਲ, ਗੁਰਦੀਪ ਭੱਟੀ, ਤਰਸੇਮ ਲਾਲ, ਜਸਵੀਰ ਲਾਲ ਨੌਰਾ ਫੁੱਟਬਾਲ ਕੋਚ ਨੇ ਬਾਲ ਬਣਾਉਂਦਿਆਂ ਬਹੁਤ ਹੀ ਵਧੀਆਂ ਪਾਸਿੰਗ ਕੀਤੀ ਜਿਸ ਦੀ ਬਦੌਲਤ 3 ਗੋਲ ਡਿਫੈਂਸ ਨੂੰ ਬੀਟ ਕਰਦਿਆਂ ਤਰਸੇਮ ਲਾਲ ਨੇ ਕੀਤੇ ਤੇ ਇਕ ਗੋਲ ਜਸਵੀਰ ਲਾਲ ਫੁੱਟਬਾਲ ਕੋਚ ਤੇ ਇਕ ਗੋਲ ਗੁਰਦੀਪ ਭੱਟੀ ਵਲੋਂ ਕੀਤਾ ਗਿਆ | ਦੂਜੇ ਹਾਫ 'ਚ ਗਿਆਨ ਚੰਦ ਪਾਠਕ ਦੀ ਟੀਮ ਦੇ ਖਿਡਾਰੀਆਂ ਨੇ ਅਣਖ ਖਾਂਦੇ ਹੋਏ ਅਵਤਾਰ ਸਿੰਘ, ਗੁਰਨਾਮ ਸਿੰਘ ਕਾਹਮਾ, ਲਾਡੀ ਮਾਹਲ ਗਹਿਲਾ ਨੇ ਬਾਲ ਬਣਾਉਂਦਿਆਂ ਬਹੁਤ ਹੀ ਵਧੀਆ ਪਾਸਿੰਗ ਕੀਤੀ | ਜਿਸ ਦੀ ਬਦੌਲਤ ਦੋ ਗੋਲ ਲਾਡੀ ਮਾਹਲ ਗਹਿਲਾ, ਇਕ ਗੋਲ ਗੁਰਨਾਮ ਸਿੰਘ ਫੁੱਟਬਾਲ ਕੋਚ, ਇਕ ਗੋਲ ਗਿਆਨ ਚੰਦ ਪਾਠਕ, ਇਕ ਗੋਲ ਅਵਤਾਰ ਸਿੰਘ ਨੇ ਕੀਤੇ | ਇਸ ਤਰ੍ਹਾਂ ਇਹ ਮੈਚ 5-5 ਸਕੋਰ ਤੇ ਭਾਵੇਂ ਬਰਾਬਰ ਰਿਹਾ ਪਰ ਫੁੱਟਬਾਲ 'ਤੇ ਕੋਸ਼ਿਸ਼ ਦੀ ਜਿੱਤ ਹੋਈ | ਸਰਬਜੀਤ ਸਿੰਘ ਨੇ ਦੱਸਿਆ ਕਿ ਮੈਚ 'ਚ ਕਲੱਬ ਦੇ ਖਿਡਾਰੀਆਂ ਨੇ ਖੇਡ ਭਾਵਨਾ ਨਾਲ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ | ਇਸ ਮੌਕੇ ਨੈਸ਼ਨਲ ਫੁੱਟਬਾਲਰ ਗਿਆਨ ਚੰਦ ਪਾਠਕ ਨੇ ਕਿਹਾ ਕਿ ਖੇਡਾਂ ਰਾਹੀਂ ਅਸੀਂ ਨੌਜਵਾਨਾਂ ਨੂੰ ਸਿਹਤਮੰਦ ਜੀਵਨਸ਼ੈਲੀ ਵੱਲ੍ਹ ਪ੍ਰੇਰਿਤ ਕਰ ਸਕਦੇ ਹਾਂ |
