ਮਾਧੋਪੁਰ, 25 ਜਨਵਰੀ (ਮਹਿਰਾ)-ਜੰਗਲਾਤ ਵਿਭਾਗ ਵਲੋਂ ਨਹਿਰ ਕਿਨਾਰੇ ਮਾਧੋਪੁਰ ਤੋਂ ਲੈ ਕੇ ਸੁਜਾਨਪੁਰ ਤੱਕ ਲੱਖਾਂ ਦੇ ਕੀਮਤੀ ਦਰੱਖ਼ਤ ਲਗਾਏ ਗਏ ਹਨ | ਜਿਨ੍ਹਾਂ 'ਚ ਟਾਹਲੀ, ਅੰਬ, ਸਫੈਦਾ, ਕਿੱਕਰ ਤੇ ਖੈਰ ਮੁੱਖ ਹਨ | ਪਰ ਇਨ੍ਹਾਂ ਦਰੱਖਤਾਂ ਨੂੰ ਜਿੱਥੇ ਵਣ ਮਾਫ਼ੀਆ ਸਫ਼ਾਇਆ ਕਰਨ ਵਿਚ ਲੱਗਾ ਹੋਇਆ ਹੈ, ਉੱਥੇ ਹੀ ਪਹਾੜਾਂ ਤੋਂ ਆਏ ਬੱਕਰਵਾਲ ਆਪਣੀਆਂ ਭੇਡਾਂ, ਬੱਕਰੀਆਂ ਨੂੰ ਚਾਰਾ ਖਵਾਉਣ ਲਈ ਉਨ੍ਹਾਂ ਦਰੱਖਤਾਂ ਨੂੰ ਕੱਟ-ਕੱਟ ਕੇ ਉਨ੍ਹਾਂ ਪਸ਼ੂਆਂ ਦਾ ਭੋਜਨ ਬਣਾ ਰਹੇ ਹਨ | ਪਰ ਉਹ ਜਾਣਦੇ ਹੋਏ ਵੀ ਦਰੱਖਤਾਂ ਨੂੰ ਕੱਟਣ ਕਾਰਨ ਸਰਕਾਰ ਦਾ ਲੱਖਾਂ ਦਾ ਨੁਕਸਾਨ ਕਰ ਰਹੇ ਹਨ, ਉੱਥੇ ਹੀ ਸਰਕਾਰ ਦੇ ਰਾਖੇ ਆਪਣੀ ਡਿਊਟੀ ਨਿਭਾਉਣ ਦੀ ਬਜਾਏ ਕੁੰਭਕਰਨੀ ਨੀਂਦ ਸੁੱਤੇ ਹੋਏ ਹਨ | ਜ਼ਿਕਰਯੋਗ ਹੈ ਕਿ ਪਹਿਲਾਂ ਵੀ ਇਸ ਪੱਟੜੀ ਤੋਂ ਖੈਰ ਦੇ ਦਰੱਖਤ ਵਣ ਮਾਫ਼ੀਆ ਵਲੋਂ ਲਿਜਾਣ ਦੀਆਂ ਖ਼ਬਰਾਂ ਅਖ਼ਬਾਰਾਂ 'ਵਚ ਛਪੀਆਂ ਸੀ | ਪਰ ਉਸ ਦੇ ਬਾਵਜੂਦ ਵੀ ਵਿਭਾਗ ਆਪਣੀ ਨੀਂਦ ਤੋਂ ਨਹੀਂ ਉੱਠਿਆ ਤੇ ਅੱਜ ਵੀ ਬਕਰਵਾਲਾਂ ਵਲੋਂ ਦਰੱਖਤਾਂ ਨੂੰ ਕੱਟ ਕੇ ਪਸ਼ੂਆਂ ਨੂੰ ਖਿਲਾਇਆ ਜਾ ਰਿਹਾ ਹੈ ਤੇ ਸੁੱਕੇ ਦਰੱਖਤਾਂ ਨੂੰ ਕੱਟ ਕੇ ਜਲਾਇਆ ਜਾ ਰਿਹਾ ਹੈ |
