ਕਾਹਨੂੰਵਾਨ ਕਿਸਾਨ ਕਤਲ ਮਾਮਲੇ ’ਚ ਇਕ ਹੋਰ ਦੋਸ਼ੀ ਗ੍ਰਿਫ਼ਤਾਰ

ਮੁੱਖ ਦੋਸ਼ੀ ਤੇ ਉਸ ਦਾ ਨੌਕਰ ਹਾਲੇ ਵੀ ਫ਼ਰਾਰ
ਕਾਹਨੂੰਵਾਨ, 5 ਜੁਲਾਈ (ਨਿਸ਼ਾਨ ਸਿੰਘ ਚਾਹਲ)-ਜ਼ਮੀਨੀ ਵਿਵਾਦ ਨੂੰ ਲੈ ਕੇ ਕਾਹਨੂੰਵਾਨ ਵਿਚ ਬੀਤੀ 23 ਮਈ ਨੂੰ ਕਤਲ ਹੋਏ ਕਿਸਾਨ ਕੁਲਵਿੰਦਰ ਸਿੰਘ ਬਿੱਟੂ ਦੇ ਕਤਲ ਮਾਮਲੇ ’ਚ ਕਾਹਨੂੰਵਾਨ ਪੁਲਿਸ ਨੇ ਇਕ ਹੋਰ ਦੋਸ਼ੀ ਜਸ਼ਨਪ੍ਰੀਤ ਸਿੰਘ ਪੁੱਤਰ ਜਗਦੀਸ਼ ਸਿੰਘ ਵਾਸੀ ਘੱਲੂਘਾਰਾ ਸਾਹਿਬ ਰੋਡ ਕਾਹਨੂੰਵਾਨ ਨੂੰ ਵੀ ਗ੍ਰਿਫ਼ਤਾਰ ਕਰ ਲਿਆ ਹੈ। ਇਸ ਮਾਮਲੇ ’ਚ ਪੁਲਿਸ ਹੁਣ ਤੱਕ 6 ਦੋਸ਼ੀਆਂ ਨੂੰ ਗ੍ਰਿਫ਼ਤਾਰ ਕਰ ਚੁੱਕੀ ਹੈ, ਜਦਕਿ ਇਸ ਕਤਲ ਮਾਮਲੇ ’ਚ ਲੋੜੀਂਦਾ ਮੁੱਖ ਦੋਸ਼ੀ ਕੁਲਵੰਤ ਸਿੰਘ ਮੋਤੀ ਭਾਟੀਆ ਤੇ ਉਸ ਦਾ ਨੌਕਰ ਮੈਨੁਅਲ ਮਸੀਹ ਪੁੱਤਰ ਅਸ਼ੋਕ ਮਸੀਹ ਹਾਲੇ ਪੁਲਿਸ ਦੀ ਗ੍ਰਿਫ਼ਤ ਤੋਂ ਬਾਹਰ ਹਨ। ਇਸ ਕਤਲ ਮਾਮਲੇ ’ਚ ਪੁਲਿਸ ਹੁਣ ਤੱਕ ਮੁੱਖ ਦੋਸ਼ੀ ਸਤਿਨਾਮ ਸਿੰਘ ਉਰਫ਼ ਮੋਨੂੰ ਭਾਟੀਆ ਤੋਂ ਇਲਾਵਾ ਜਨਕਾਰ ਸਿੰਘ ਪੁੱਤਰ ਕਿਸ਼ਨ ਸਿੰਘ, ਕੁਲਦੀਪ ਸਿੰਘ ਪੁੱਤਰ ਨਿਰੰਜਨ, ਸਿੰਘ, 2 ਸਕੇ ਭਰਾਵਾਂ ਰਕੇਸ਼ ਮਸੀਹ ਤੇ ਨਰੇਸ਼ ਮਸੀਹ ਉਰਫ ਮਿੰਟੂ ਪੁੱਤਰ ਨਿਰੰਜਨ ਮਸੀਹ ਨੂੰ ਪਹਿਲਾ ਹੀ ਗ੍ਰਿਫ਼ਤਾਰ ਕਰ ਚੁੱਕੀ ਹੈ। ਦੱਸ ਦਈਏ ਕਿ ਕਿਸਾਨ ਕੁਲਵਿੰਦਰ ਸਿੰਘ ਬਿੱਟੂ ਦਾ ਉਸ ਦੀ ਜ਼ਮੀਨ ਦੇ ਕੋਲ ਪੈਂਦੀ ਇਕ ਪਸ਼ੂਆਂ ਦੀ ਹਵੇਲੀ ਦੇ ਮਾਲਕ 2 ਸਕੇ ਭਰਾਵਾਂ ਨਾਲ ਕੁਝ ਦੇਰ ਤੋਂ ਜ਼ਮੀਨੀ ਵਿਵਾਦ ਚੱਲ ਰਿਹਾ ਸੀ। ਇਸ ਵਿਵਾਦ ਦੇ ਚਲਦਿਆਂ ਬੀਤੀ 23 ਮਈ ਨੂੰ ਕਿਸਾਨ ਕੁਲਵਿੰਦਰ ਸਿੰਘ ਬਿੱਟੂ ਦਾ ਹਵੇਲੀ ਦੇ ਮਾਲਕ 2 ਸਕੇ ਭਰਾਵਾਂ ਵਲੋਂ ਆਪਣੇ ਸਾਥੀਆਂ ਨਾਲ ਮਿਲ ਕੇ ਉਸ ਦਾ ਕਤਲ ਕਰ ਦਿੱਤਾ ਗਿਆ ਸੀ।