ਮੰਡੀ ਰੋੜਾਂਵਾਲੀ, 15 ਅਪ੍ਰੈਲ (ਮਨਜੀਤ ਸਿੰਘ ਬਰਾੜ)-ਭਾਵੇਂ ਕਿ ਪੰਜਾਬ ਸਰਕਾਰ ਵਲੋਂ 1 ਅਪ੍ਰੈਲ ਤੋਂ ਕਣਕ ਦੀ ਸਰਕਾਰੀ ਖ਼ਰੀਦ ਸ਼ੁਰੂ ਕਰਨ ਦੀ ਗੱਲ ਆਖੀ ਸੀ, ਪਰ ਅੱਜ 15 ਅਪ੍ਰੈਲ ਤੱਕ ਵੀ ਸਬ ਯਾਰਡ ਮੰਡੀ ਰੋੜਾਂਵਾਲੀ ਅਤੇ ਫੋਕਲ ਪੁਆਇੰਟ ਹਲੀਮ ਵਾਲਾ ਵਿਚ ਕਣਕ ਦੀ ਖ਼ਰੀਦ ਸ਼ੁਰੂ ਨਹੀਂ ਹੋ ਸਕੀ | ਇਨ੍ਹਾਂ ਮੰਡੀਆਂ ਵਿਚ ਪਿਛਲੇ ਤਿੰਨ, ਚਾਰ ਦਿਨ ਤੋਂ ਕਣਕ ਦੀ ਆਮਦ ਸ਼ੁਰੂ ਹੋ ਗਈ ਹੈ, ਪ੍ਰੰਤੂ ਖ਼ਰੀਦ ਸ਼ੁਰੂ ਨਹੀਂ ਹੋ ਸਕੀ | ਜਾਣਕਾਰੀ ਦਿੰਦਿਆਂ ਨਵ ਨਿਯੁਕਤ ਆੜ੍ਹਤੀ ਯੂਨੀਅਨ ਪ੍ਰਧਾਨ ਤੇਗਬੀਰ ਸਿੰਘ ਸਿਵੀਆ ਅਤੇ ਆੜ੍ਹਤੀ ਭਾਰਤ ਭੂਸ਼ਨ ਲੂਣਾ ਨੇ ਦੱਸਿਆ ਕਿ ਸਬ ਯਾਰਡ ਮੰਡੀ ਰੋੜਾਂਵਾਲੀ ਐੱਫ. ਸੀ. ਆਈ ਅਤੇ ਪਨਗਰੇਨ ਨੰੂ ਅਲਾਟ ਹੋਇਆ ਹੈ, ਜਦੋਂ ਕਿ ਫੋਕਲ ਪੁਆਇੰਟ ਹਲੀਮ ਵਾਲਾ ਵੇਅਰ ਹਾਊਸ ਨੂੰ ਅਲਾਟ ਹੋਇਆ ਹੈ | ਇਨ੍ਹਾਂ ਦੋਨਾਂ ਮੰਡੀਆਂ ਵਿਚ ਅੱਜ ਤੱਕ ਖ਼ਰੀਦ ਸ਼ੁਰੂ ਨਹੀਂ ਹੋ ਸਕੀ, ਅੱਜ ਦੋਨਾਂ ਮੰਡੀਆਂ ਦੇ ਇੰਸਪੈਕਟਰ ਆਏ ਸਨ ਕੱਲ ਤੱਕ ਖ਼ਰੀਦ ਸ਼ੁਰੂ ਹੋਣ ਦੀ ਉਮੀਦ ਹੈ | ਉਨ੍ਹਾਂ ਦੱਸਿਆ ਕਿ ਮੰਡੀ ਰੋੜਾਂਵਾਲੀ ਵਿਚ 10 ਹਜਾਰ ਗੱਟੇ ਦੇ ਕਰੀਬ ਅਤੇ ਹਲੀਮ ਵਾਲਾ ਵਿਚ 13 ਹਜਾਰ ਗੱਟੇ ਦੇ ਕਰੀਬ ਵਿਕਣ ਲਈ ਕਣਕ ਆ ਚੁੱਕੀ ਹੈ | ਉੱਧਰ ਕੁੱਝ ਕਿਸਾਨਾਂ ਨੇ ਦੱਸਿਆ ਕਿ ਉਹ ਪਿਛਲੇ ਤਿੰਨ, ਚਾਰ ਦਿਨ ਤੋਂ ਮੰਡੀ ਵਿਚ ਬੈਠੇ ਹਨ, ਕਣਕ ਦੀ ਖ਼ਰੀਦ ਸ਼ੁਰੂ ਨਾ ਹੋਣ ਕਾਰਨ ਉਨ੍ਹਾਂ ਦੀ ਫ਼ਸਲ ਨੂੰ ਅਜੇ ਤੱਕ ਪੱਖਾ ਵੀ ਨਹੀਂ ਲੱਗ ਸਕਿਆ ਹੈ |
