ਫ਼ਾਜ਼ਿਲਕਾ, 13 ਮਈ (ਦਵਿੰਦਰ ਪਾਲ ਸਿੰਘ)-'ਦੀ ਫ਼ਾਜ਼ਿਲਕਾ ਫੋਟੋਗ੍ਰਾਫਰ ਐਸੋਸੀਏਸ਼ਨ (ਰਜਿ.) ਅਤੇ ਆਰ.ਐੱਸ. ਕੈਮਰਾ ਸਟੋਰ ਅਬੋਹਰ ਦੇ ਸਹਿਯੋਗ ਨਾਲ 'ਦ ਸੋਨੀ ਐਡਵਾਂਟੇਜ ਕੈਮਰਾ ਲਾਈਨ-ਅੱਪ ਅਤੇ ਈਕੋਸਿਸਟਮ ਐਕਸਪੀਰੀਅੰਸ' ਵਿਸ਼ੇ 'ਤੇ ਇਕ ਵਿਸ਼ੇਸ਼ ਫ਼ੋਟੋਗਰਾਫੀ ਵਰਕਸ਼ਾਪ ਦਾ ਸਫਲ ਆਯੋਜਨ ਕੀਤਾ ਗਿਆ | ਇਸ ਪ੍ਰੋਗਰਾਮ ਵਿਚ ਫ਼ਾਜ਼ਿਲਕਾ ਅਤੇ ਆਸ-ਪਾਸ ਦੇ ਇਲਾਕਿਆਂ ਤੋਂ ਵੱਡੀ ਗਿਣਤੀ ਵਿਚ ਫੋਟੋਗ੍ਰਾਫਰਾਂ, ਵੀਡੀਓ ਗ੍ਰਾਫਰਾਂ ਅਤੇ ਸਟੂਡੀਓ ਸੰਚਾਲਕਾਂ ਨੇ ਹਿੱਸਾ ਲਿਆ | ਵਰਕਸ਼ਾਪ ਦੌਰਾਨ ਸੋਨੀ ਕੰਪਨੀ ਦੇ ਟੈਕਨੀਕਲ ਮਾਹਿਰਾਂ ਓਾਕਾਰ ਕੁਮਾਰ ਅਤੇ ਰੋਹਿਤ ਗੌਤਮ ਨੇ ਹਾਜ਼ਰੀਨ ਨੂੰ ਸੋਨੀ ਦੇ ਨਵੀਨਤਮ ਕੈਮਰਾ ਲਾਈਨ-ਅੱਪ, ਲੈਂਜ਼ ਤਕਨਾਲੋਜੀ ਅਤੇ ਕੈਮਰਾ ਈਕੋਸਿਸਟਮ ਬਾਰੇ ਵਿਸਥਾਰਪੂਰਵਕ ਜਾਣਕਾਰੀ ਦਿੱਤੀ | ਉਨ੍ਹਾਂ ਵਲੋਂ ਲਾਈਵ ਡੈਮੋ ਰਾਹੀਂ ਵੈਡਿੰਗ ਫ਼ੋਟੋਗਰਾਫੀ, ਸਿਨੇਮੈਟਿਕ ਵੀਡੀਓ ਸ਼ੂਟ ਅਤੇ ਲੋਅ-ਲਾਈਟ ਪਰਫਾਰਮੈਂਸ ਨਾਲ ਜੁੜੀਆਂ ਆਧੁਨਿਕ ਤਕਨੀਕਾਂ ਦਾ ਪ੍ਰਦਰਸ਼ਨ ਵੀ ਕੀਤਾ ਗਿਆ | ਇਸ ਮੌਕੇ ਸੋਨੀ ਕੰਪਨੀ ਵਲੋਂ ਰਿਜਨਲ ਸੇਲਜ਼ ਅਫ਼ਸਰ ਅਰਵਿੰਦ ਮਹਿਰਾ ਅਤੇ ਟਰੇਡ ਮਾਰਕੀਟਿੰਗ ਪ੍ਰਤੀਨਿਧੀ ਰਵੀ ਦੇਵਗਨ ਵੀ ਵਿਸ਼ੇਸ਼ ਤੌਰ 'ਤੇ ਹਾਜ਼ਰ ਹੋਏ | ਐਸੋਸੀਏਸ਼ਨ ਦੇ ਪ੍ਰਧਾਨ ਵਿਕਰਮ ਕੁਮਾਰ ਨੇ ਕਿਹਾ ਕਿ ਅਜਿਹੇ ਆਯੋਜਨ ਫ਼ੋਟੋਗਰਾਫੀ ਖੇਤਰ ਵਿਚ ਆ ਰਹੀਆਂ ਨਵੀਆਂ ਤਕਨੀਕਾਂ ਨਾਲ ਨੌਜਵਾਨਾਂ ਨੂੰ ਜੋੜਨ ਅਤੇ ਉਨ੍ਹਾਂ ਦੇ ਹੁਨਰ ਨੂੰ ਨਿਖਾਰਨ ਵਿਚ ਸਹਾਈ ਹੁੰਦੇ ਹਨ | ਇਸ ਮੌਕੇ ਐਸੋਸੀਏਸ਼ਨ ਦੀ ਕਾਰਜਕਾਰਨੀ ਕਮੇਟੀ ਦੇ ਮੈਂਬਰ ਵਿਕੀ ਮਿੱਢਾ, ਸਤਨਾਮ, ਰਾਜਕੁਮਾਰ ਖੁਰਾਨਾ, ਗਗਨਦੀਪ ਸਿੰਘ, ਅੰਕਿਤ ਸਚਦੇਵਾ ਅਤੇ ਰਿੰਕੂ ਬੰਧਨ ਵੀ ਮੌਜੂਦ ਸਨ | ਪ੍ਰੋਗਰਾਮ ਦੇ ਅੰਤ ਵਿਚ ਸੋਨੀ ਕੰਪਨੀ ਦੇ ਨੁਮਾਇੰਦਿਆਂ ਅਤੇ ਆਰ.ਐੱਸ. ਕੈਮਰਾ ਸਟੋਰ ਦੇ ਸੰਚਾਲਕ ਸੰਜੂ ਝਾਂਬ ਨੂੰ ਸਨਮਾਨ ਚਿੰਨ੍ਹ ਦੇ ਕੇ ਸਨਮਾਨਿਤ ਕੀਤਾ ਗਿਆ |
