ਅਬੋਹਰ, 28 ਜੂਨ (ਸੁਖਜੀਤ ਸਿੰਘ ਬਰਾੜ)-ਇਲਾਕੇ ਦੇ ਸਰਹੱਦੀ ਪਿੰਡਾਂ ਨੂੰ ਸਿੰਚਾਈ ਲਈ ਨਹਿਰੀ ਪਾਣੀ ਮੁਹੱਈਆ ਕਰਵਾਉਣ ਵਾਲੀ ਦੌਲਤਪੁਰਾ ਨਹਿਰ ’ਚ ਬੀਤੇ ਕੁੱਝ ਹਫ਼ਤਿਆਂ ਤੋਂ ਘੱਟ ਮਾਤਰਾ ਵਿਚ ਨਹਿਰੀ ਪਾਣੀ ਚੱਲਣ ਕਾਰਨ ਕਿਸਾਨਾਂ ’ਚ ਹਾਹਾਕਾਰ ਮੱਚੀ ਹੋਈ ਹੈ। ਕਿਸਾਨ ਆਗੂ ਗੁਰਸੇਵਕ ਸਿੰਘ ਪੰਜਾਵਾ, ਅਜੈ ਕੁਮਾਰ ਵਧਵਾ, ਦੇਵੀ ਲਾਲ, ਰਣਜੀਤ ਸਿੰਘ ਕੁਮਾਰ ਆਦਿ ਕਿਸਾਨਾਂ ਨੇ ਦੱਸਿਆ ਕਿ ਬੀਤੇ ਦੋ ਤਿੰਨ ਹਫ਼ਤਿਆਂ ਤੋਂ ਇਸ ਨਹਿਰ ਵਿਚ ਘੱਟ ਪਾਣੀ ਛੱਡਿਆ ਜਾ ਰਿਹਾ ਹੈ। ਜਿਸ ਕਾਰਨ ਟੇਲ ਦੇ ਪਿੰਡ ਉਸਮਾਨ ਖੇੜਾ, ਤੂਤਵਾਲਾ, ਕੱਲਰ ਖੇੜਾ, ਪੰਜਾਵਾ, ਦੀਵਾਨ ਖੇੜਾ, ਗਿੱਦੜਾਂ ਵਾਲੀ ਆਦਿ ਪਿੰਡਾਂ ’ਚ ਤਾਂ ਸਿੰਚਾਈ ਲਈ ਨਾ ਮਾਤਰ ਹੀ ਪਾਣੀ ਪੁੱਜਦਾ ਹੈ। ਜਿਸ ਕਾਰਨ ਕਿਸਾਨ ਬਹੁਤ ਦੁਖੀ ਹਨ। ਇਸ ਇਲਾਕੇ ’ਚ ਧਰਤੀ ਦੇ ਥੱਲੇ ਦਾ ਪਾਣੀ ਵੀ ਖਾਰਾ ਹੈ। ਨਹਿਰ ਦੀ ਟੇਲ ਵੀ 12 ਹਿੱਸਿਆ ’ਚ ਸਿਰਫ਼ 7 ਹਿੱਸੇ ਹੀ ਚੱਲਦੀ ਹੈ। ਕਿਸਾਨਾਂ ਨੇ ਦੱਸਿਆ ਕਿ ਗਰਮੀ ਜ਼ਿਆਦਾ ਹੋਣ ਕਾਰਨ ਉਨ੍ਹਾਂ ਦੇ ਕਿੰਨੂ ਮਾਲਟੇ ਦੇ ਬਾਗ਼ ਅਤੇ ਫ਼ਸਲਾਂ ਸੁੱਕ ਰਹੀਆਂ ਹਨ। ਕਿਸਾਨਾਂ ਨੇ ਨਹਿਰੀ ਵਿਭਾਗ ਤੋਂ ਮੰਗ ਕੀਤੀ ਹੈ ਕਿ ਦੌਲਤਪੁਰਾ ਨਹਿਰ ’ਚ ਤੁਰੰਤ ਪੂਰੇ ਪਾਣੀ ਦੀ ਸਪਲਾਈ ਛੱਡੀ ਜਾਵੇ।
