ਅੰਮਿ੍ਤਸਰ, 31 ਦਸੰਬਰ (ਰੇਸ਼ਮ ਸਿੰਘ)- ਅੰਮਿ੍ਤਸਰ ਦੇ ਇਕ ਡਾਕਟਰ ਨੂੰ ਅਗਵਾ ਕਰਨ ਦੇ ਮਾਮਲੇ 'ਚ ਪੁਲਿਸ ਵਲੋਂ ਸਚਾਈ ਸਾਹਮਣੇ ਲਿਆਂਦੀ ਗਈ ਹੈ, ਜਿਸ ਮੁਤਾਬਿਕ ਡਾਕਟਰ ਨੂੰ ਅਗਵਾ ਨਹੀਂ ਕੀਤਾ ਗਿਆ ਸੀ, ਜਦੋਂ ਕਿ ਉਸ ਦੇ ਹੀ ਰਿਸ਼ਤੇਦਾਰਾਂ ਵਲੋਂ ਨਸ਼ਾ ਛੁਡਾਓ ਕੇਂਦਰ ਵਿਖੇ ਭਰਤੀ ਕਰਵਾਇਆ ਗਿਆ ਸੀ, ਜਿਸ ਨੂੰ ਪੁਲਿਸ ਵਲੋਂ ਵਾਪਸ ਲਿਆਂਦਾ ਗਿਆ ਹੈ | ਏ.ਡੀ.ਸੀ.ਪੀ. ਸ੍ਰੀਵਿਨੇਲਾ ਨੇ ਮਾਮਲੇ ਦੀ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਮੀਡੀਆ ਰਿਪੋਰਟ ਤੋਂ ਪਤਾ ਚੱਲਿਆ ਸੀ ਕਿ ਭੁੱਲਰ ਐਵਨਿਊ ਦਾ ਰਹਿਣ ਵਾਲਾ ਡਾ: ਸਰਬਪ੍ਰੀਤ ਸਿੰਘ ਜੋ ਆਪਣਾ ਨਿੱਜੀ ਹਸਪਤਾਲ ਵੀ ਚਲਾ ਰਿਹਾ ਹੈ, ਅਗਵਾ ਹੋ ਗਿਆ ਹੈ | ਜਦੋਂ ਕਿ ਉਸ ਦੇ ਭਤੀਜੇ ਕਰਨਵੀਰ ਸਿੰਘ ਵਲੋਂ 25 ਦਸੰਬਰ ਨੂੰ ਉਸ ਨੂੰ ਤਰਨ ਤਾਰਨ ਦੇ ਖੇਤਰ ਗੋਇੰਦਵਾਲ ਸਥਿਤ ਸੁਖਮਨੀ ਨਸ਼ਾ ਛੁਡਾਓ ਕੇਂਦਰ ਵਿਖੇ ਭਰਤੀ ਕਰਵਾਇਆ ਗਿਆ ਸੀ | ਉਨ੍ਹਾਂ ਕਿਹਾ ਕਿ ਪੁਲਿਸ ਨੂੰ ਜਾਣਕਾਰੀ ਮਿਲਣ 'ਤੇ ਡਾਕਟਰ ਨੂੰ ਵਾਪਸ ਲਿਆਂਦਾ ਗਿਆ ਤੇ ਉਸ ਪਾਸੋਂ ਪਤਾ ਚੱਲਿਆ ਕਿ ਉਸਨੂੰ ਉਸਦੀ ਮਰਜੀ ਦੇ ਖਿਲਾਫ ਨਸ਼ਾ ਛੁਡਾਓ ਕੇਂਦਰ ਵਿਖੇ ਭਰਤੀ ਕਰਵਾਇਆ ਗਿਆ ਤੇ ਨਸ਼ਾ ਛੁਡਾਓ ਕੇਂਦਰ ਵੀ ਗ਼ੈਰ ਕਾਨੂੰਨੀ ਚਲਾਇਆ ਜਾ ਰਿਹਾ ਸੀ | ਪੁਲਿਸ ਵਲੋਂ ਇਸ ਸੰਬੰਧੀ ਮਾਮਲਾ ਦਰਜ ਕਰਕੇ ਅਗਲੇਰੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ |
