ਲੁਧਿਆਣਾ, 29 ਮਈ (ਡਾ. ਤਰਲੋਚਨ ਸਿੰਘ)-ਵਿਸ਼ਵ ਮਹਾਵਾਰੀ ਦਿਵਸ ਦੇ ਮੌਕੇ 'ਤੇ ਵਰਸਾਟਾਈਲ ਐਂਟਰਪ੍ਰਾਈਜਜ਼ਿ ਪ੍ਰਾਈਵੇਟ ਲਿਮਟਿਡ, ਪ੍ਰਾਜੈਕਟ ਅਮੋਦਿਨੀ ਅਤੇ ਫਿਲੈਂਥਰੋਪੀ ਕਲੱਬ ਵਲੋਂ ਸਿਵਲ ਹਸਪਤਾਲ ਲੁਧਿਆਣਾ ਵਿਚ ''ਗ੍ਰੀਨ ਹਾਈਜੀਨ ਇਨੀਸ਼ੀਏਟਿਵ ਫਾਰ ਵੁਮੈਨ ਵੈੱਲ-ਬੀਇੰਗ ਐਂਡ ਇੰਸਟਾਲੇਸ਼ਨ ਆਫ ਡਸਟਬਿਨਜ਼'' ਥੀਮ ਹੇਠ ਇਕ ਮਹੱਤਵਪੂਰਨ ਜਾਗਰੂਕਤਾ ਅਤੇ ਭਲਾਈ ਪ੍ਰੋਗਰਾਮ ਕਰਵਾਇਆ ਗਿਆ | ਇਸ ਪਹਿਲ ਦਾ ਉਦੇਸ਼ ਮਹਾਵਾਰੀ ਸਫਾਈ, ਔਰਤਾਂ ਦੀ ਸਿਹਤ, ਸੈਨੀਟੇਸ਼ਨ ਅਤੇ ਵਾਤਾਵਰਣ ਸੰਭਾਲ ਪ੍ਰਤੀ ਜਾਗਰੂਕਤਾ ਫੈਲਾਉਣਾ ਸੀ | ਇਸ ਪ੍ਰੋਗਰਾਮ ਦੇ ਤਹਿਤ ਫਿਲੈਂਥਰੋਪੀ ਕਲੱਬ ਵਲੋਂ ਸਿਵਲ ਹਸਪਤਾਲ ਵਿਚ 50 ਹਰੇ ਅਤੇ ਨੀਲੇ ਰੰਗ ਦੇ ਡਸਟਬਿਨ ਲਗਾਏ ਗਏ, ਤਾਂ ਜੋ ਸਫਾਈ, ਕੂੜੇ ਦੀ ਵੱਖ-ਵੱਖ ਸੰਭਾਲ ਅਤੇ ਜ਼ਿੰਮੇਵਾਰ ਵੇਸਟ ਮੈਨੇਜਮੈਂਟ ਨੂੰ ਉਤਸ਼ਾਹਿਤ ਕੀਤਾ ਜਾ ਸਕੇ | ਇਸ ਦੇ ਨਾਲ ਹੀ ਵਰਸਾਟਾਈਲ ਐਂਟਰਪ੍ਰਾਈਜਜ਼ਿ ਪ੍ਰਾਈਵੇਟ ਲਿਮਟਿਡ ਵਲੋਂ ਸੈਨਟਰੀ ਨੈਪਕਿਨ ਨਿਸਤਾਰਨ ਲਈ ਇਕ ਇੰਸੀਨੇਰੇਟਰ ਸਿਸਟਮ ਵੀ ਸਥਾਪਿਤ ਕੀਤਾ ਗਿਆ, ਜਿਸ ਦਾ ਮਕਸਦ ਸੈਨਟਰੀ ਵੇਸਟ ਦੀ ਸੁਰੱਖਿਅਤ, ਸਾਫ਼-ਸੁਥਰੀ ਅਤੇ ਵਾਤਾਵਰਨ ਅਨੁਕੂਲ ਨਿਸਤਾਰਨ ਪ੍ਰਕਿਰਿਆ ਨੂੰ ਪ੍ਰੋਤਸਾਹਿਤ ਕਰਨਾ ਅਤੇ ਔਰਤਾਂ ਦੀ ਮਰਯਾਦਾ ਨੂੰ ਮਜ਼ਬੂਤ ਕਰਨਾ ਹੈ | ਪ੍ਰੋਗਰਾਮ ਦੀ ਸ਼ੁਰੂਆਤ ਟੀ.ਬੀ. ਮਰੀਜ਼ਾਂ ਅਤੇ ਉਨ੍ਹਾਂ ਦੇ ਸਹਾਇਕਾਂ ਨੂੰ 100 ਰਾਸ਼ਨ ਕਿੱਟਾਂ ਵੰਡ ਕੇ ਕੀਤੀ ਗਈ, ਜਿਸ ਨਾਲ ਸਮਾਜਿਕ ਸਹਿਯੋਗ ਅਤੇ ਸੇਵਾ ਭਾਵਨਾ ਦਾ ਪ੍ਰਗਟਾਵਾ ਹੋਇਆ | ਇਸ ਤੋਂ ਬਾਅਦ ਡਾ. ਹਰਕਨਵਾਲ ਸੇਖੋਂ ਵਲੋਂ ਸਵਾਗਤੀ ਭਾਸ਼ਣ ਦਿੱਤਾ ਗਿਆ | ਮਿਸ ਗੀਤਾਂਜਲੀ ਬਖ਼ਸ਼ੀ, ਸੀਐਸਆਰ ਹੈੱਡ, ਵਰਸਾਟਾਈਲ ਐਂਟਰਪ੍ਰਾਈਜਜ਼ਿ ਪ੍ਰਾਈਵੇਟ ਲਿਮਟਿਡ ਨੇ ਸਫਾਈ ਜਾਗਰੂਕਤਾ ਅਤੇ ਟਿਕਾਊ ਸਿਹਤ ਪ੍ਰਣਾਲੀਆਂ ਦੀ ਮਹੱਤਤਾ ਬਾਰੇ ਜਾਣਕਾਰੀ ਸਾਂਝੀ ਕੀਤੀ | ਡਾ. ਨੀਲਮ ਸੋਧੀ ਵਲੋਂ ਔਰਤਾਂ ਦੀ ਸਿਹਤ ਅਤੇ ਮਹਾਵਾਰੀ ਸਫਾਈ ਸੰਬੰਧੀ ਇਕ ਇੰਟਰਐਕਟਿਵ ਜਾਗਰੂਕਤਾ ਸੈਸ਼ਨ ਕਰਵਾਇਆ ਗਿਆ | ਇਸ ਮੌਕੇ ਸੈਨਟਰੀ ਨੈਪਕਿਨ ਨਿਸਤਾਰਨ ਇੰਸੀਨੇਰੇਟਰ ਸਿਸਟਮ ਦੀ ਲਾਈਵ ਡੈਮੋਨਸਟਰੇਸ਼ਨ ਵੀ ਕੀਤੀ ਗਈ, ਤਾਂ ਜੋ ਲੋਕਾਂ ਨੂੰ ਇਸਦੀ ਸੁਰੱਖਿਅਤ ਅਤੇ ਵਿਗਿਆਨਕ ਵਰਤੋਂ ਬਾਰੇ ਜਾਣੂ ਕਰਵਾਇਆ ਜਾ ਸਕੇ | ਡਾ. ਮਹਿਕ ਨੇ ਥੈਲੇਸੀਮੀਆ ਬਾਰੇ ਜਾਗਰੂਕਤਾ ਅਤੇ ਸਮੇਂ ਸਿਰ ਇਲਾਜ ਦੀ ਮਹੱਤਤਾ 'ਤੇ ਵੀ ਜਾਣਕਾਰੀ ਦਿੱਤੀ | ਇਸ ਮੌਕੇ ਸਿਵਲ ਸਰਜਨ ਲੁਧਿਆਣਾ ਡਾ. ਰਮਨਦੀਪ ਕੌਰ ਨੇ ਆਯੋਜਕਾਂ ਦੇ ਯਤਨਾਂ ਦੀ ਸ਼ਲਾਘਾ ਕਰਦਿਆਂ ਕਿਹਾ ਕਿ ਔਰਤਾਂ ਦੀ ਸਿਹਤ ਅਤੇ ਸਨਮਾਨ ਲਈ ਮਹਾਵਾਰੀ ਸਫਾਈ ਅਤੇ ਢੰਗ ਦੀ ਸੈਨੀਟੇਸ਼ਨ ਸੁਵਿਧਾਵਾਂ ਬਾਰੇ ਜਾਗਰੂਕਤਾ ਬਹੁਤ ਜ਼ਰੂਰੀ ਹੈ | ਇਸ ਮੌਕੇ ਲਖਵਿੰਦਰ ਕੌਰ ਨੇ ਫਿਲੈਂਥਰੋਪੀ ਕਲੱਬ ਵੱਲੋਂ ਸਿਵਲ ਹਸਪਤਾਲ ਵਿੱਚ ਚਲਾਈਆਂ ਜਾ ਰਹੀਆਂ ਵੱਖ-ਵੱਖ ਭਲਾਈ ਪਹਿਲਾਂ ਬਾਰੇ ਵੀ ਜਾਣਕਾਰੀ ਦਿੱਤੀ, ਜਦਕਿ ਵਰਸਾਟਾਈਲ ਐਂਟਰਪ੍ਰਾਈਜਜ਼ਿ ਪ੍ਰਾਈਵੇਟ ਲਿਮਟਿਡ ਦੇ ਮੈਨੇਜਿੰਗ ਡਾਇਰੈਕਟਰ ਅਰੁਣ ਸੇਠ ਨੇ ਸੰਸਥਾ ਵੱਲੋਂ ਸਮਾਜਿਕ ਭਲਾਈ ਅਤੇ ਸੀਐਸਆਰ ਗਤੀਵਿਧੀਆਂ ਲਈ ਆਪਣੀ ਵਚਨਬੱਧਤਾ ਦੁਹਰਾਈ |
