ਚੰਡੀਗੜ੍ਹ / ਸਾਹਿਬਜ਼ਾਦਾ ਅਜੀਤ ਸਿੰਘ ਨਗਰ

ਖਰੜ-ਰੰਧਾਵਾ ਰੋਡ 'ਤੇ ਸਥਿਤ ਰੇਲਵੇ ਅੰਡਰ ਕਾਜਵੇ ਵਾਹਨ ਚਾਲਕਾਂ ਲਈ ਬਣਿਆ ਵੱਡੀ ਮੁਸੀਬਤ <br/>

ਖਰੜ-ਰੰਧਾਵਾ ਰੋਡ 'ਤੇ ਰੇਲਵੇ ਅੰਡਰ ਕਾਜਵੇ 'ਤੇ ਭਾਰੀ ਵਾਹਨ ਮੁੜਦਾ ਹੋਇਆ | (ਸੱਜੇ) ਸਮਾਜ ਸੇਵੀ ਗੁਰਨਾਮ ਸਿੰਘ ਅਤੇ ਭਾਜਪਾ ਆਗੂ ਪਵਨ ਮਨੋਚਾ | ਤਸਵੀਰਾਂ : ਗੁਰਮੁੱਖ ਸਿੰਘ ਮਾਨ <br/> 27-04-2026

ਖਰੜ, 26 ਅਪ੍ਰੈਲ (ਗੁਰਮੁੱਖ ਸਿੰਘ ਮਾਨ)-ਖਰੜ-ਗੜਾਗਾਂ-ਬੱਸੀ (ਰੰਧਾਵਾ ਰੋਡ) 'ਤੇ ਖਰੜ ਨੇੜੇ ਚੰਡੀਗੜ੍ਹ-ਲੁਧਿਆਣਾ ਰੇਲ ਪਟੜੀ 'ਤੇ ਆਵਾਜ਼ਾਈ ਲਈ ਰੇਲਵੇ ਫਾਟਕਾਂ ਨੂੰ ਬੰਦ ਕਰਕੇ ਬਣਾਇਆ ਗਿਆ ਰੇਲਵੇ ਅੰਡਰ ਕਾਜਵੇ ਇਲਾਕੇ ਦੇ ਲੋਕਾਂ ਦੀ ਆਵਾਜਾਈ ਲਈ ਵੱਡੀ ਰੁਕਾਵਟ ਬਣਦਾ ਜਾ ਰਿਹਾ ਹੈ, ਕਿਉਂਕਿ ਇਸ ਸੜਕ 'ਤੇ 5 ਦਰਜਨ ਤੋਂ ਵਧੇਰੇ ਪਿੰਡਾਂ ਅਤੇ ਜ਼ਿਲ੍ਹਾ ਫਤਿਹਗੜ੍ਹ ਸਾਹਿਬ ਤੋਂ ਆਉਣ ਵਾਲੀ ਆਵਾਜਾਈ, ਸਕੂਲਾਂ, ਕਾਲਜਾਂ, ਯੂਨੀਵਰਸਿਟੀ ਦੇ ਵਿਦਿਆਰਥੀਆਂ ਖਰੜ, ਮੁਹਾਲੀ, ਚੰਡੀਗੜ੍ਹ ਲਈ ਆਉਣ ਜਾਣ ਹੈ | ਰੇਲਵੇ ਵਿਭਾਗ ਵਲੋਂ ਬਣਾਇਆ ਗਿਆ ਇਹ ਰੇਲਵੇ ਅੰਡਰ ਕਾਜਵੇ ਭਾਵੇਂ ਰੇਲਵੇ ਵਲੋਂ ਇਹ ਕਹਿ ਕੇ ਬਣਾਇਆ ਗਿਆ ਸੀ ਕਿ ਆਵਾਜਾਈ ਲਈ ਸੌਖ ਰਹੇਗੀ ਅਤੇ ਬੰਦ ਫਾਟਕਾਂ ਤੋਂ ਰਾਹਤ ਮਿਲੇਗੀ | ਇਸ ਰੇਲਵੇ ਕਾਜਵੇ ਨੂੰ ਪਾਰ ਕਰਦੇ ਸਮੇਂ ਨਿਆਂ ਸ਼ਹਿਰ ਬਡਾਲਾ ਨੂੰ ਸੜਕ ਮੁੜਦੀ ਹੈ ਅਤੇ ਰੇਲਵੇ ਕਾਜਵੇ 'ਤੇ ਤਿੰਨ ਪਾਸਿਓਾ ਐਂਟਰੀ ਨੂੰ ਕਾਫੀ ਸਮਾਂ ਪਹਿਲਾਂ ਉੱਚਾ ਕਰਕੇ ਬਣਾਇਆ ਗਿਆ, ਜਿਥੇ ਖਰੜ ਤੋਂ ਜਾਣ ਵਾਲੀ ਆਵਾਜ਼ਾਈ ਅਤੇ ਬਡਾਲਾ ਰੋਡ ਤੋਂ ਆਉਣ ਵਾਲੇ ਵਾਹਨਾਂ ਦੀ ਆਵਾਜ਼ਾਈ ਜਦੋਂ ਰੇਲਵੇ ਅੰਡਰ ਕਾਜਵੇ ਵਿਚ ਇਕੱਠੀ ਹੋ ਜਾਂਦੀ ਹੈ ਤਾਂ ਲੰਬੇ 'ਤੇ ਭਾਰੀ ਵਾਹਨਾਂ ਨੂੰ ਮੁੜਨਾ ਔਖਾ ਹੋ ਜਾਂਦਾ ਹੈ ਅਤੇ ਜ਼ਿਆਦਾ ਲੰਬੇ ਵਾਹਨਾਂ ਦੇ ਚਾਲਕਾਂ ਨੂੰ ਵਾਹਨ ਪਿੱਛੇ ਕਰਕੇ ਮੁੜਨਾ ਪੈਂਦਾ ਹੈ, ਜਿਸ ਦੌਰਾਨ ਕਈ ਵਾਰ ਹਾਦਸਾ ਵੀ ਵਾਪਰ ਜਾਂਦਾ ਹੈ | ਬਰਸਾਤਾਂ ਦੇ ਦਿਨਾਂ 'ਚ ਇਸ ਕਾਜਵੇ ਵਿਚ ਇਕੱਠਾ ਹੁੰਦੇ ਬਰਸਾਤੀ ਪਾਣੀ ਦੀ ਰੋਕਥਾਮ ਲਈ ਭਾਵੇਂ ਉੱਪਰ ਟੀਨਾਂ ਦਾ ਸ਼ੈੱਡ ਪਾ ਦਿੱਤਾ ਗਿਆ ਅਤੇ ਪਾਣੀ ਦੇ ਨਿਕਾਸ ਲਈ ਪੰਪ ਵੀ ਲਗਾਇਆ ਹੋਇਆ ਹੈ, ਪਰ ਫਿਰ ਵੀ ਇਥੇ ਕਈ ਵਾਰ ਪਾਣੀ ਜਮ੍ਹਾਂ ਹੋ ਜਾਂਦਾ ਹੈ | ਰਾਤ ਸਮੇਂ ਇਥੇ ਸਟਰੀਟ ਲਾਈਟਾਂ ਦਾ ਕੋਈ ਪ੍ਰਬੰਧ ਨਹੀਂ ਹੈ, ਵਾਹਨ ਚਾਲਕਾਂ ਨੂੰ ਹਨੇਰੇ ਸਮੇਂ ਇਸ ਕਾਜਵੇ 'ਚੋਂ ਲੰਘਣਾ ਪੈਂਦਾ ਹੈ | ਇਲਾਕਾ ਨਿਵਾਸੀ ਸਮਾਜ ਸੇਵੀ ਆਗੂ ਗੁਰਨਾਮ ਸਿੰਘ ਸੋਹਲ, ਭਾਜਪਾ ਆਗੂ ਪਵਨ ਮਨੋਚਾ, ਅਸ਼ੋਕ ਬਜਹੇੜੀ, ਕਿਸਾਨ ਆਗੂ ਜਸਪਾਲ ਸਿੰਘ ਨਿਆਮੀਆਂ, ਸਰਬਜੀਤ ਸਿੰਘ ਢੀਂਡਸਾ ਸਾਬਕਾ ਸਰਪੰਚ, ਹਰਪ੍ਰੀਤ ਸਿੰਘ ਰੋੜਾ, ਬਲਵਿੰਦਰ ਸਿੰਘ, ਗੁਰਦੀਪ ਸਿੰਘ ਸਮੇਤ ਹੋਰ ਆਗੂਆਂ ਨੇ ਸਰਕਾਰ ਤੋਂ ਮੰਗ ਕੀਤੀ ਕਿ ਖਰੜ ਸ਼ਹਿਰ ਦੀ ਹਦੂਦ ਅੰਦਰ ਪੈਂਦੇ ਇਸ ਰੇਲਵੇ ਅੰਡਰ ਕਾਜਵੇ 'ਤੇ ਕੌਂਸਲ ਖਰੜ ਰਾਹੀ ਸਟਰੀਟ ਲਾਈਟਾਂ ਲਗਾਈਆਂ ਜਾਣ ਤੇ ਨਾਲ ਹੀ ਬਰਸਾਤਾਂ ਤੋਂ ਪਹਿਲਾਂ ਪਾਣੀ ਦੇ ਨਿਕਾਸ ਦਾ ਢੁਕਵਾਂ ਪ੍ਰਬੰਧ ਕੀਤਾ ਜਾਵੇ ਅਤੇ ਦੂਸਰਾ ਜੋ ਖਰੜ ਤੋਂ ਆਉਣ ਵਾਲੀ ਆਵਾਜਾਈ, ਜਿਸ ਨੇ ਬਡਾਲਾ ਰੋਡ ਨੂੰ ਜਾਣਾ ਹੈ, ਉਸ ਸਮੱਸਿਆ ਦਾ ਕੋਈ ਪੱਕਾ ਹੱਲ ਕੱਢਿਆ ਜਾਵੇ |