ਐੱਸ. ਏ. ਐੱਸ. ਨਗਰ, 10 ਮਈ (ਪ੍ਰੋ. ਅਵਤਾਰ ਸਿੰਘ)- ਨਸ਼ਾ ਮੁਕਤ ਤੇ ਪ੍ਰਗਤੀਸ਼ੀਲ ਸਮਾਜ ਦੀ ਸਿਰਜਣਾ ਵੱਲ ਇਕ ਅਹਿਮ ਕਦਮ ਵਧਾਉਂਦੇ ਹੋਏ 'ਗ੍ਰੇਟ ਨਵਭਾਰਤ ਮਿਸ਼ਨ ਫਾਊਾਡੇਸ਼ਨ' ਵਲੋਂ ਸੀ. ਜੀ. ਸੀ. ਯੂਨੀਵਰਸਿਟੀ ਮੁਹਾਲੀ ਵਿਖੇ 'ਉਜਵਲ ਪੰਜਾਬ: ਨਸ਼ੇ ਨੂੰ ਨਾਂਹ, ਤਰੱਕੀ ਨੂੰ ਹਾਂ' ਵਿਸ਼ੇ 'ਤੇ ਇਕ ਪ੍ਰਭਾਵਸ਼ਾਲੀ ਜਾਗਰੂਕਤਾ ਅਤੇ ਸਨਮਾਨ ਸਮਾਰੋਹ ਕਰਵਾਇਆ ਗਿਆ | ਇਸ ਪਹਿਲਕਦਮੀ ਦੀ ਅਗਵਾਈ 'ਫਾਦਰ ਆਫ਼ ਐਜੂਕੇਸ਼ਨ' ਨਾਲ ਨਿਵਾਜੇ ਜਾ ਚੁੱਕੇ ਤੇ ਸੀ. ਜੀ. ਸੀ. ਦੇ ਚਾਂਸਲਰ ਰਸ਼ਪਾਲ ਸਿੰਘ ਧਾਲੀਵਾਲ ਨੇ ਕੀਤੀ | ਇਸ ਦੌਰਾਨ ਨਸ਼ਿਆਂ ਦੀ ਗੰਭੀਰ ਸਮੱਸਿਆ ਨਾਲ ਨਜਿੱਠਣ ਲਈ ਕਰਵਾਏ ਗਏ ਇਸ ਸਮਾਗਮ ਵਿਚ ਨਿਆਂਪਾਲਿਕਾ, ਰੱਖਿਆ ਸੇਵਾਵਾਂ, ਪੁਲਿਸ ਪ੍ਰਸ਼ਾਸਨ ਤੇ ਸਮਾਜ ਸੇਵੀ ਸੰਸਥਾਵਾਂ ਦੀਆਂ ਉੱਘੀਆਂ ਸ਼ਖ਼ਸੀਅਤਾਂ ਨੇ ਸ਼ਮੂਲੀਅਤ ਕੀਤੀ | ਸਮਾਗਮ ਵਿਚ ਸਾਬਕਾ ਜੱਜ ਇਮਾਨਬੀਰ ਸਿੰਘ ਧਾਲੀਵਾਲ, ਬਿ੍ਗੇਡੀਅਰ ਰਾਜ ਕੁਮਾਰ (ਸਾਬਕਾ ਡਿਪਟੀ ਡਾਇਰੈਕਟਰ ਜਨਰਲ, ਮਿਲਟਰੀ ਇੰਟੈਲੀਜੈਂਸ), ਬਿ੍ਗੇਡੀਅਰ ਐਚ. ਪੀ. ਐਸ. ਬੇਦੀ, ਸੇਵਾ-ਮੁਕਤ ਕਰਨਲ ਮੋਹਨ ਲਾਲ ਭੰਡਾਰੀ, ਲਖਵੀਰ ਸਿੰਘ ਰਾਣਾ (ਇੰਸਪੈਕਟਰ-ਵਿਜੀਲੈਂਸ), ਗੁਰਮੁਖ ਸਿੰਘ ਐਸ. ਐਚ. ਓ. ਮੋਰਿੰਡਾ, ਖੁਸ਼ਵੰਤ ਸਿੰਘ ਲੇਖਕ ਤੇ ਕੋ-ਫਾਊਾਡਰ ਮਦਰਜ਼ ਅਗੇਂਸਟ ਡਰੱਗਜ਼ ਮੁਹਿੰਮ, ਹਨੀ ਗਰੇਵਾਲ ਮਨੋਵਿਗਿਆਨੀ ਤੇ ਇਸ਼ੂਪਾਲ ਚੌਧਰੀ ਸਮਾਜ ਸੇਵੀ ਸ਼ਾਮਿਲ ਹੋਏ | ਇਸ ਮੌਕੇ ਬੁਲਾਰਿਆਂ ਨੇ ਨਸ਼ਿਆਂ ਦੇ ਬਹੁਪੱਖੀ ਮਾਰੂ ਪ੍ਰਭਾਵਾਂ ਬਾਰੇ ਚਰਚਾ ਕੀਤੀ | ਇਸ ਦੌਰਾਨ ਨਸ਼ਿਆਂ ਦੇ ਖਾਤਮੇ ਲਈ ਸ਼ਲਾਘਾਯੋਗ ਕੰਮ ਕਰਨ ਵਾਲੇ ਪੁਲਿਸ ਅਧਿਕਾਰੀਆਂ, ਨਿਆਂਪਾਲਿਕਾ ਦੇ ਮੈਂਬਰਾਂ, ਸਾਬਕਾ ਸੈਨਿਕਾਂ ਤੇ ਸਮਾਜ ਸੇਵੀਆਂ ਦਾ ਵਿਸ਼ੇਸ਼ ਤੌਰ 'ਤੇ ਸਨਮਾਨ ਕੀਤਾ ਗਿਆ | ਉਪਰੰਤ ਚਾਂਸਲਰ ਧਾਲੀਵਾਲ ਦੀ ਅਗਵਾਈ ਹੇਠ ਸਮੂਹ ਹਾਜ਼ਰੀਨ ਨੇ ਨਸ਼ਾ ਮੁਕਤ ਭਵਿੱਖ ਲਈ ਸਹੁੰ ਚੁੱਕੀ | ਸਮਾਗਮ ਵਿਚ ਇਕ ਵਿਸ਼ਾਲ 'ਡਰੱਗ ਅਵੇਅਰਨੈੱਸ ਰੈਲੀ' ਵੀ ਕੱਢੀ ਗਈ ਜਿਸ 'ਚ 500 ਤੋਂ ਵੱਧ ਵਿਦਿਆਰਥੀਆਂ ਨੇ ਹਿੱਸਾ ਲਿਆ |
