ਜੂਆ ਖੇਡਦੇ 5 ਵਿਅਕਤੀ ਗ੍ਰਿਫ਼ਤਾਰ , 1.55 ਲੱਖ ਰੁਪਏ ਬਰਾਮਦ ਸੈਕਟਰ-40 ਵਿਚ ਮਕਾਨ ’ਤੇ ਛਾਪਾ ਮਾਰ ਕੇ ਪੁਲਿਸ ਨੇ ਕੀਤੀ ਕਾਰਵਾਈ, ਜੂਏ ਦਾ ਸਾਮਾਨ ਵੀ ਬਰਾਮਦ
ਚੰਡੀਗੜ੍ਹ, 8 ਅਕਤੂਬਰ (ਕਪਿਲ ਵਧਵਾ)- ਡਿਸਟ੍ਰਿਕਟ ਕ੍ਰਾਈਮ ਸੈੱਲ ਸੈਕਟਰ-24 ਦੀ ਟੀਮ ਨੇ ਜੂਆ ਖੇਡਣ ਵਾਲੇ 5 ਵਿਅਕਤੀਆਂ ਨੂੰ ਗ੍ਰਿਫ਼ਤਾਰ ਕਰ ਕੇ ਉਨ੍ਹਾਂ ਕੋਲੋਂ 1. 55 ਲੱਖ ਰੁਪਏ ਦੀ ਨਕਦੀ ਅਤੇ ਜੂਆ ਖੇਡਣ ਲਈ ਵਰਤੀ ਗਈ ਸਮੱਗਰੀ ਬਰਾਮਦ ਕੀਤੀ ਹੈ।
ਚੰਡੀਗੜ੍ਹ, 8 ਅਕਤੂਬਰ (ਕਪਿਲ ਵਧਵਾ)- ਡਿਸਟ੍ਰਿਕਟ ਕ੍ਰਾਈਮ ਸੈੱਲ ਸੈਕਟਰ-24 ਦੀ ਟੀਮ ਨੇ ਜੂਆ ਖੇਡਣ ਵਾਲੇ 5 ਵਿਅਕਤੀਆਂ ਨੂੰ ਗ੍ਰਿਫ਼ਤਾਰ ਕਰ ਕੇ ਉਨ੍ਹਾਂ ਕੋਲੋਂ 1.55 ਲੱਖ ਰੁਪਏ ਦੀ ਨਕਦੀ ਅਤੇ ਜੂਆ ਖੇਡਣ ਲਈ ਵਰਤੀ ਗਈ ਸਮੱਗਰੀ ਬਰਾਮਦ ਕੀਤੀ ਹੈ। ਪੁਲਿਸ ਨੇ ਇਸ ਸਬੰਧੀ ਥਾਣਾ ਸੈਕਟਰ-39 ਵਿਚ ਗੈਂਬਲਿੰਗ ਐਕਟ ਦੀਆਂ ਧਾਰਾਵਾਂ ਤਹਿਤ ਵੀਰਵਾਰ ਨੂੰ ਐੱਫ.ਆਈ.ਆਰ. ਦਰਜ ਕੀਤੀ ਹੈ। ਗ੍ਰਿਫ਼ਤਾਰ ਕੀਤੇ ਵਿਅਕਤੀਆਂ ਦੀ ਪਛਾਣ ਤੁਸ਼ਾਰ ਮਹਿਤਾ (34) ਵਾਸੀ ਸੈਕਟਰ-44 (ਸੀ) ਚੰਡੀਗੜ੍ਹ, ਅਮਰਿੰਦਰ ਸਿੰਘ (41) ਵਾਸੀ ਫੇਜ਼-7 ਮੁਹਾਲੀ, ਯਦਵਿੰਦਰ ਸ਼ਾਹੀ (31) ਵਾਸੀ ਸੈਕਟਰ-42 (ਬੀ) ਚੰਡੀਗੜ੍ਹ, ਯਤਿਨ ਭਾਰਦਵਾਜ (35) ਵਾਸੀ ਸੈਕਟਰ-116 ਮੁਹਾਲੀ ਅਤੇ ਰਵਿੰਦਰ ਸਿੰਘ (42) ਵਾਸੀ ਪਿੰਡ ਡੱਡੂਮਾਜਰਾ ਚੰਡੀਗੜ੍ਹ ਵਜੋਂ ਹੋਈ ਹੈ। ਪੁਲਿਸ ਅਨੁਸਾਰ ਡਿਸਟ੍ਰਿਕਟ ਕ੍ਰਾਈਮ ਸੈੱਲ ਦੀ ਟੀਮ ਸਨੈਚਿੰਗ ਦੀਆਂ ਘਟਨਾਵਾਂ ਦੇ ਸਬੰਧ ਵਿਚ ਥਾਣਾ ਸੈਕਟਰ-39 ਦੇ ਇਲਾਕੇ ਵਿਚ ਗਸ਼ਤ ਕਰ ਰਹੀ ਸੀ। ਇਸ ਦੌਰਾਨ ਟੀਮ ਜਦੋਂ ਸੈਕਟਰ-40 (ਡੀ) ਦੀ ਮਾਰਕੀਟ ਵਿਚ ਮੌਜੂਦ ਸੀ ਤਾਂ ਪੁਲਿਸ ਨੂੰ ਗੁਪਤ ਸੂਚਨਾ ਮਿਲੀ ਕਿ ਸੈਕਟਰ-40 (ਏ) ਸਥਿਤ ਇਕ ਮਕਾਨ ਵਿਚ ਕੁੱਝ ਵਿਅਕਤੀ ਜੂਆ ਖੇਡ ਰਹੇ ਹਨ। ਸੂਚਨਾ ਦੇ ਆਧਾਰ ’ਤੇ ਪੁਲਿਸ ਟੀਮ ਨੇ ਉਕਤ ਮਕਾਨ ’ਤੇ ਛਾਪਾ ਮਾਰਿਆ ਅਤੇ ਮੌਕੇ ਤੋਂ ਪੰਜ ਵਿਅਕਤੀਆਂ ਨੂੰ ਕਾਬੂ ਕਰ ਲਿਆ। ਤਲਾਸ਼ੀ ਦੌਰਾਨ ਉਨ੍ਹਾਂ ਕੋਲੋਂ 1,55,000 ਰੁਪਏ ਦੀ ਨਕਦੀ ਅਤੇ ਜੂਏ ਨਾਲ ਸਬੰਧਤ ਸਾਮਾਨ ਬਰਾਮਦ ਹੋਇਆ। ਪੁਲਿਸ ਵਲੋਂ ਮਾਮਲੇ ਦੀ ਅਗਲੇਰੀ ਜਾਂਚ ਕੀਤੀ ਜਾ ਰਹੀ ਹੈ।
