ਭਰਤਗੜ੍ਹ, 1 ਮਈ (ਜਸਬੀਰ ਸਿੰਘ ਬਾਵਾ)-ਜ਼ਿਲ੍ਹਾ ਰੂਪਨਗਰ ਦੀ ਹੱਦ 'ਤੇ ਵਸੇ ਪਿੰਡ ਢੇਲਾਬੜ ਦੀ ਆਬਾਦੀ 'ਤੇ ਜੰਗਲੀ ਰਕਬੇ ਨੇੜੇ ਅੱਜ ਸਵੇਰੇ ਜੰਗਲੀ ਤੇਂਦੂਏ ਦੇ ਹਮਲੇ ਮਗਰੋਂ ਦੋ ਪਾਲਤੂ ਕੁੱਤਿਆਂ 'ਚੋਂ ਇੱਕ ਦੀ ਮੌਤ ਹੋਣ ਕਰਕੇ ਪਿੰਡ ਦੇ ਵਸਨੀਕਾਂ 'ਚ ਦਹਿਸ਼ਤ ਦਾ ਮਾਹੌਲ ਬਣ ਗਿਆ ਹੈ | ਸਰਪੰਚ ਰਜਨੀ ਦੇਵੀ, ਹਰਦੀਪ ਸਿੰਘ ਢੇਲਾਬੜ ਆਦਿ ਨੇ ਉਕਤ ਹਮਲੇ ਦੀ ਇਤਲਾਹ ਜੰਗਲੀ ਜੀਵ ਸੁਰੱਖਿਆ ਵਿਭਾਗ ਦੇ ਅਧਿਕਾਰੀਆਂ ਨੂੰ ਦਿੱਤੀ | ਸਬੰਧਿਤ ਟੀਮ ਨੇ ਜਦੋਂ ਤੇਂਦੂਏ ਦੀਆਂ ਪੈੜਾਂ ਦੀ ਜਾਂਚ ਕੀਤੀ ਤਾਂ ਉਦੋਂ ਤੱਕ ਉਹ ਢੇਲਾਬੜ ਦੀ ਅਬਾਦੀ ਨੇੜੇ ਜੰਗਲ 'ਚ ਮਾਰੇ ਕੁੱਤੇ ਦੇ ਕੋਲ ਹੀ ਬੈਠਾ ਹੋਇਆ ਸੀ, ਵਸਨੀਕਾਂ ਤੇ ਮੁਲਾਜ਼ਮਾਂ ਨੂੰ ਦੇਖਣ ਮਗਰੋਂ ਤੇਂਦੂਆ ਜੰਗਲ ਵੱਲ ਫ਼ਰਾਰ ਹੋ ਗਿਆ | ਜੰਗਲੀ ਜੀਵ ਸੁਰੱਖਿਆ ਵਿਭਾਗ ਦੇ ਬਲਾਕ ਅਧਿਕਾਰੀਆਂ ਸਮੇਤ ਹੋਰਨਾਂ ਮੁਲਾਜ਼ਮਾਂ ਨੇ ਪਿੰਡ ਵਾਸੀਆਂ ਨੂੰ ਹਦਾਇਤ ਕੀਤੀ ਕਿ ਉਹ ਰਾਤ ਨੂੰ ਇਕੱਲੇ ਬਾਹਰ ਨਾ ਨਿਕਲਣ, ਘਰੋਂ ਬਾਹਰ ਰੌਸ਼ਨੀ ਦਾ ਪ੍ਰਬੰਧ ਕਰਨ | ਮੁਲਾਜ਼ਮਾਂ ਨੇ ਦੱਸਿਆ ਕਿ ਉਕਤ ਹਮਲੇ ਸਬੰਧੀ ਵਿਭਾਗ ਦੇ ਉੱਚ ਅਧਿਕਾਰੀਆਂ ਦੇ ਧਿਆਨ 'ਚ ਲਿਆਂਦਾ ਗਿਆ ਹੈ, ਇਸ ਤੇਂਦੂਏ ਨੂੰ ਕਾਬੂ ਕਰਨ ਲਈ ਜਲਦੀ ਪਿੰਜਰਾ ਲਗਾ ਰਹੇ ਹਾਂ, ਜਦੋਂ ਤੱਕ ਸਫਲਤਾ ਲਈ ਮਿਲਦੀ, ਕਿਸੇ ਹੋਰ ਨੁਕਸਾਨ ਦੇ ਬਚਾਅ ਲਈ ਸੰਬੰਧਤ ਮੁਲਾਜ਼ਮ ਮੌਜੂਦ ਰਹਿਣਗੇ |
