ਸਵੈ-ਨਿਰਭਰਤਾ ਦੀ ਮਿਸਾਲ ਬਣੀ ਪਰਿਵਾਰਾਂ ਵਲੋਂ ਹੱਥੀਂ ਤਿਆਰ ਖਾਣ-ਪੀਣ ਦੇ ਪਦਾਰਥਾਂ ਦੀ ਵਿੱਕਰੀ

ਰੂਪਨਗਰ, 5 ਜੁਲਾਈ (ਗੁਰਪ੍ਰੀਤ ਸਿੰਘ ਹੁੰਦਲ)-ਅੱਜ ਦੇ ਮਸ਼ੀਨੀ ਯੁੱਗ ਵਿਚ ਜਿੱਥੇ ਨੌਜਵਾਨੀ ਰੁਜ਼ਗਾਰ ਦੀ ਭਾਲ ਵਿਚ ਵਿਦੇਸ਼ਾਂ ਵੱਲ ਭੱਜ ਰਹੀ ਹੈ, ਉੱਥੇ ਹੀ ਸਾਡੇ ਸ਼ਹਿਰ ਦੇ ਵੱਖ-ਵੱਖ ਖੇਤਰਾਂ ਵਿਚ ਕਈ ਪਰਿਵਾਰਾਂ ਵਲੋਂ ਪੇਸ਼ ਕੀਤੀ ਗਈ ਇੱਕ ਅਨੋਖੀ ਮਿਸਾਲ ਦੇਖਣ ਨੂੰ ਮਿਲੀ ਹੈ। ਸ਼ਹਿਰ ਦੇ ਵੱਖ-ਵੱਖ ਚੌਕਾਂ ਅਤੇ ਬਾਜ਼ਾਰਾਂ ਵਿਚ ਵੱਖਰੇ-ਵੱਖਰੇ ਪਰਿਵਾਰਾਂ ਨੇ ਆਪਣੇ ਰੇਹੜੀ-ਨੁਮਾ ਸਟਾਲ ਲਗਾ ਕੇ ਹੱਥੀਂ ਤਿਆਰ ਕੀਤੇ ਗਏ ਸੁਆਦੀ ਸੈਂਡਵਿਚ ਅਤੇ ਹੋਰ ਵਿਅੰਜਨ ਵੇਚਣੇ ਸ਼ੁਰੂ ਕੀਤੇ ਹਨ। ਇਹ ਉਪਰਾਲਾ ਨਾ ਸਿਰਫ਼ ਆਤਮ-ਨਿਰਭਰਤਾ ਦਾ ਪ੍ਰਤੀਕ ਹੈ, ਸਗੋਂ ‘ਹੱਥੀਂ ਕਿਰਤ’ (ਡਿਗਨਿਟੀ ਆਫ਼ ਲੇਬਰ) ਨੂੰ ਪ੍ਰਫੁੱਲਿਤ ਕਰਦਿਆਂ ਸਮਾਜ ਨੂੰ ਇੱਕ ਨਵੀਂ ਅਤੇ ਸਕਾਰਾਤਮਿਕ ਸੇਧ ਦੇ ਰਿਹਾ ਹੈ। ਇਨ੍ਹਾਂ ਸਟਾਲਾਂ ਦੀ ਸਭ ਤੋਂ ਵੱਡੀ ਖ਼ਾਸੀਅਤ ਇਨ੍ਹਾਂ ਪਰਿਵਾਰਾਂ ਦਾ ਆਪਸੀ ਤਾਲਮੇਲ ਹੈ। ਕਿਤੇ ਦਾਦੀ-ਪੋਤਾ, ਕਿਤੇ ਪਤੀ-ਪਤਨੀ ਤਾਂ ਕਿਤੇ ਮਾਂ-ਧੀ ਦੀ ਜੋੜੀ ਬੜੇ ਹੀ ਉਤਸ਼ਾਹ ਨਾਲ ਗਾਹਕਾਂ ਨੂੰ ਸੇਵਾਵਾਂ ਦੇ ਰਹੀ ਹੈ। ਇਨ੍ਹਾਂ ਪਰਿਵਾਰਾਂ ਦੇ ਮੈਂਬਰ ਸਵੇਰ ਦੇ ਨਾਲ ਹੀ ਤਿਆਰੀਆਂ ਵਿਚ ਜੁੱਟ ਜਾਂਦੇ ਹਨ। ਜਿੱਥੇ ਦਾਦੀ ਆਪਣੀ ਰਸੋਈ ਦੇ ਤਜਰਬੇ ਅਤੇ ਘਰੇਲੂ ਮਸਾਲਿਆਂ ਨਾਲ ਖਾਣੇ ਨੂੰ ਸੁਆਦਲਾ ਬਣਾਉਂਦੀ ਹੈ, ਉੱਥੇ ਪੋਤਾ ਬੜੀ ਨਿਮਰਤਾ ਨਾਲ ਗਾਹਕਾਂ ਦੇ ਆਰਡਰ ਸੰਭਾਲਦਾ ਹੈ। ਇਸੇ ਤਰ੍ਹਾਂ ਪਤੀ-ਪਤਨੀ ਅਤੇ ਮਾਂ-ਧੀ ਦੀਆਂ ਜੋੜੀਆਂ ਵੀ ਆਪਣੀ ਜ਼ਿੰਮੇਵਾਰੀ ਨੂੰ ਬੜੀ ਖ਼ੂਬਸੂਰਤੀ ਨਾਲ ਨਿਭਾ ਰਹੀਆਂ ਹਨ। ਉਨ੍ਹਾਂ ਦਾ ਮੰਨਣਾ ਹੈ ਕਿ ਕੋਈ ਵੀ ਕੰਮ ਛੋਟਾ ਜਾਂ ਵੱਡਾ ਨਹੀਂ ਹੁੰਦਾ, ਬਸ਼ਰਤੇ ਉਸ ਨੂੰ ਪੂਰੀ ਇਮਾਨਦਾਰੀ, ਸਫ਼ਾਈ ਅਤੇ ਲਗਨ ਨਾਲ ਕੀਤਾ ਜਾਵੇ। ਉਹ ਆਪਣੀ ਮਿਹਨਤ ਕਰਕੇ ਸੰਤੁਸ਼ਟ ਹਨ ਅਤੇ ਲੋਕਾਂ ਨੂੰ ਵੀ ਸੁਨੇਹਾ ਦੇ ਰਹੇ ਹਨ ਕਿ ਹੱਥੀਂ ਕਿਰਤ ਕਰਨ ਵਾਲਾ ਵਿਅਕਤੀ ਹੀ ਅਸਲ ਵਿਚ ਸਵੈ-ਮਾਣ ਵਾਲੀ ਜ਼ਿੰਦਗੀ ਜਿਊਂਦਾ ਹੈ। ਇਨ੍ਹਾਂ ਸਟਾਲਾਂ ‘ਤੇ ਮਿਲਣ ਵਾਲੇ ਖਾਣ-ਪੀਣ ਦੇ ਪਦਾਰਥਾਂ ਵਿਚ ਘਰੇਲੂ ਸੁਆਦ ਅਤੇ ਸ਼ੁੱਧਤਾ ਦੀ ਝਲਕ ਮਿਲਦੀ ਹੈ, ਜੋ ਕਿ ਬਾਜ਼ਾਰ ਦੇ ਮਿਲਾਵਟੀ ਫਾਸਟ ਫੂਡ ਤੋਂ ਬਿਲਕੁਲ ਵੱਖਰੀ ਹੈ। ਸਥਾਨਕ ਲੋਕ ਵੀ ਇਨ੍ਹਾਂ ਪਰਿਵਾਰਾਂ ਦੀ ਮਿਹਨਤ ਦੀ ਤਾਰੀਫ਼ ਕਰ ਰਹੇ ਹਨ। ਗਾਹਕਾਂ ਦਾ ਕਹਿਣਾ ਹੈ ਕਿ ਅੱਜ-ਕੱਲ੍ਹ ਦੇ ਸਮੇਂ ਵਿਚ ਜਦੋਂ ਬਾਹਰਲੇ ਖਾਣਿਆਂ ਵਿਚ ਮਿਲਾਵਟ ਦਾ ਖ਼ਤਰਾ ਰਹਿੰਦਾ ਹੈ, ਅਜਿਹੇ ਘਰੇਲੂ ਸ਼ੈਲੀ ਵਿਚ ਤਿਆਰ ਕੀਤੇ ਗਏ ਪਦਾਰਥ ਵਧੇਰੇ ਸੁਰੱਖਿਅਤ ਅਤੇ ਸਵਾਦਿਸ਼ਟ ਹਨ। ਸ਼ਾਮ ਦੇ ਸਮੇਂ ਇਨ੍ਹਾਂ ਸਟਾਲਾਂ ‘ਤੇ ਲੱਗਣ ਵਾਲੀ ਗਾਹਕਾਂ ਦੀ ਭੀੜ ਇਹ ਸਾਬਤ ਕਰਦੀ ਹੈ ਕਿ ਸ਼ੁੱਧਤਾ ਅਤੇ ਸਫ਼ਾਈ ਦੀ ਹਮੇਸ਼ਾ ਕਦਰ ਹੁੰਦੀ ਹੈ। ਇਨ੍ਹਾਂ ਪਰਿਵਾਰਾਂ ਦੀ ਇਹ ਪਹਿਲਕਦਮੀ ਉਨ੍ਹਾਂ ਨੌਜਵਾਨਾਂ ਲਈ ਇੱਕ ਵੱਡੀ ਪ੍ਰੇਰਣਾ ਹੈ ਜੋ ਰੁਜ਼ਗਾਰ ਦੇ ਵੱਡੇ ਸਾਧਨਾਂ ਦੀ ਉਡੀਕ ਵਿਚ ਹੱਥ ‘ਤੇ ਹੱਥ ਰੱਖ ਕੇ ਬੈਠੇ ਹਨ। ਇਹ ਸਾਬਤ ਕਰਦਾ ਹੈ ਕਿ ਜੇਕਰ ਮਨ ਵਿਚ ਦ੍ਰਿੜ੍ਹ ਇਰਾਦਾ ਅਤੇ ਮਿਹਨਤ ਕਰਨ ਦਾ ਜਜ਼ਬਾ ਹੋਵੇ, ਤਾਂ ਕੋਈ ਵੀ ਛੋਟਾ ਕੰਮ ਸ਼ੁਰੂ ਕਰਕੇ ਸਫਲਤਾ ਹਾਸਲ ਕੀਤੀ ਜਾ ਸਕਦੀ ਹੈ। ਸ਼ਹਿਰ ਦੇ ਲੋਕਾਂ ਵਿਚ ਇਹ ਸਟਾਲ ਇੱਕ ਚਰਚਾ ਦਾ ਵਿਸ਼ਾ ਬਣੇ ਹੋਏ ਹਨ ਅਤੇ ਲੋਕ ਇਨ੍ਹਾਂ ਪਰਿਵਾਰਾਂ ਦੀ ਇਸ ਪਹਿਲ ਨੂੰ ਸ਼ਹਿਰ ਲਈ ਇੱਕ ਸ਼ੁੱਭ ਸ਼ਗਨ ਮੰਨ ਰਹੇ।