ਅੰਮ੍ਰਿਤਸਰ, 29 ਮਈ (ਹਰਮਿੰਦਰ ਸਿੰਘ)- ਵੀਰਵਾਰ ਦੀ ਸ਼ਾਮ ਨੂੰ ਅੰਮ੍ਰਿਤਸਰ ਦੇ ਰਾਮਬਾਗ਼ ਚੌਕ ਵਿਖੇ ਪੌੜੀਆਂ ਵਾਲੇ ਬਾਜ਼ਾਰ ਵਿਖੇ ਲੱਗੀ ਭਿਆਨਕ ਅੱਗ ਕੁਝ ਘੰਟਿਆਂ ਦੇ ਬਾਅਦ ਬੁੱਝ ਗਈ ਸੀ ਪਰ ਅੱਗ ‘ਚ ਸੜਣ ਵਾਲੀਆਂ ਦੁਕਾਨਾਂ ਦੇ ਮਾਲਕ ਗਹਿਰੇ ਸਦਮੇ ‘ਚ ਹਨ ਜਿਸ ‘ਚੋਂ ਨਿਕਲਣ ਲਈ ਉਨ੍ਹਾਂ ਕਾਫੀ ਸਮਾਂ ਲੱਗ ਸਕਦਾ ਹੈ ਭਾਵੇਂ ਕਿ ਮੇਅਰ ਸਮੇਤ ਕਈ ਸਿਆਸੀ ਪਾਰਟੀ ਦੇ ਆਗੂ ਦੁਕਾਨਦਾਰਾਂ ਦੇ ਹਮਦਰਦ ਬਣ ਕੇ ਉਨ੍ਹਾਂ ਨੂੰ ਧਰਵਾਸਾ ਦੇਣ ਲਈ ਪਹੁੰਚੇ ਹਨ ਪਰ ਦੇਖਣਾ ਹੈ ਹਮਦਰਦੀ ਦੀ ਇਹ ਮਲ੍ਹਮ ਪ੍ਰਭਾਵਿਤਾਂ ਦੇ ਜਖ਼ਮਾਂ ਨੂੰ ਸ਼ਾਂਤ ਕਰਨ ਲਈ ਕਿੰਨਾ ਕੰਮ ਕਰਦੀ ਹੈ। ਸਥਾਨਕ ਰਾਮ ਬਾਗ਼ ਚੌਕ ਵਿਖੇ ਇਕ ਛੋਟੀ ਜਿਹੀ ਅੰਗਿਆਰੀ ਤੋਂ ਭਿਆਨਕ ਰੂਪ ਅਖਤਿਆਰ ਕਰ ਗਈ ਅੱਗ ਨੇ ਤਿੰਨ ਦਰਜ਼ਨ ਦੇ ਕਰੀਬ ਦੁਕਾਨਾਂ ਨੂੰ ਆਪਣੀ ਲਪੇਟ ਵਿਚ ਲੈ ਲਿਆ ਸੀ ਅਤੇ ਕਰੋੜਾਂ ਦੇ ਸਾਮਾਨ ਨੂੰ ਰਾਖ ਬਣਾ ਦਿੱਤਾ। ਆਪਣੀਆਂ ਅੱਖਾਂ ਦੇ ਸਾਹਮਣੇ ਆਪਣੀ ਬਰਬਾਦੀ ਨੂੰ ਬੇਬਸੀ ਨਾਲ ਦੇਖਦੇ ਰਹੇ। ਕਈ ਘੰਟਿਆਂ ਦੀ ਜਦੋ ਜਹਿਦ ਤੋਂ ਬਾਅਦ ਅੱਗ ‘ਤੇ ਕਾਬੂ ਪਿਆ। ਅੱਗ ਬੁਝਣ ਦੇ ਬਾਅਦ ਦੂਸਰੇ ਦਿਨ ਵੀ ਸੜੇ ਹੋਏ ਸਾਮਾਨ ਦੀਆਂ ਅੰਗਿਆਰੀਆਂ ‘ਚੋਂ ਧੂੰਆ ਉਠ ਰਿਹਾ ਸੀ ਅਤੇ ਦੁਕਾਨਦਾਰਾਂ ਵਲੋਂ ਲੱਖਾਂ ਰੁਪਏ ਦੇ ਲੋਹੇ ਦਾ ਸਾਮਾਨ ਜੋ ਸੜ ਕੇ ਕਬਾੜ ਬਣ ਗਿਆ ਸੀ ਉਸ ਨੂੰ ਕੱਢਿਆ ਗਿਆ।
