ਬਨੂੜ, 9 ਮਈ (ਭੁਪਿੰਦਰ ਸਿੰਘ)-ਜਨਗਣਨਾ ਫਾਰਮ ਵਿਚ ਵਾਲਮੀਕਿ ਅਤੇ ਮਜ਼੍ਹਬੀ ਭਾਈਚਾਰੇ ਲਈ ਵਰਜਿਤ ਸ਼ਬਦ ਸ਼ਾਮਲ ਕਰਨਾ ਬਹੁਤ ਹੀ ਗਲਤ ਹੈ | ਇਨ੍ਹਾਂ ਵਿਚਾਰਾਂ ਦਾ ਪ੍ਰਗਟਾਵਾ ਬਹੁਜਨ ਸਮਾਜ ਪਾਰਟੀ ਦੇ ਸੂਬਾਈ ਜਨਰਲ ਸਕੱਤਰ ਜਗਜੀਤ ਸਿੰਘ ਛੜਬੜ ਨੇ ਕੀਤਾ | ਉਨ੍ਹਾਂ ਕਿਹਾ ਕਿ ਭਾਰਤ ਸਰਕਾਰ ਵਲੋਂ ਪੂਰੇ ਦੇਸ ਵਿਚ ਮਰਦਮਸ਼ੁਮਾਰੀ 2027 ਕਰਵਾਈ ਜਾ ਰਹੀ ਹੈ ਅਤੇ ਉਨ੍ਹਾਂ ਫਾਰਮ ਵਿਚ ਜੋ ਕਾਲਮ ਬਣਾਏ ਗਏ ਹਨ | ਉਨ੍ਹਾਂ ਵਿਚ ਐੱਸ.ਸੀ. ਭਾਈਚਾਰੇ ਲਈ ਵਰਜਿਤ ਸ਼ਬਦ ਵਰਤੇ ਗਏ | ਫਾਰਮ ਵਿਚ ਜਾਤੀ ਕਾਲਮ ਭਰਨ ਲਈ ਅਨੁਸੂਚਿਤ ਜਾਤੀ ਨੂੰ ਅਪਮਾਨਿਤ ਅਤੇ ਦੇਸ ਦੀ ਸੁਪਰੀਮ ਕੋਰਟ ਵਲੋਂ ਪਾਬੰਦੀਸ਼ੁਦਾ ਸ਼ਬਦ ਦਰਜ ਕਰਕੇ ਮਜ਼੍ਹਬੀ ਅਤੇ ਵਾਲਮੀਕੀ ਸਮਾਜ ਦੀ ਭਾਵਨਾਵਾਂ ਨੂੰ ਠੇਸ ਪਹੁੰਚਾਈ ਹੈ | ਬਸਪਾ ਆਗੂ ਜਗਜੀਤ ਸਿੰਘ ਛੜਬੜ ਨੇ ਸੰਬੰਧਿਤ ਵਿਭਾਗ ਨੂੰ ਅਪੀਲ ਕਰਦਿਆਂ ਕਿਹਾ ਕਿ ਤੁਰੰਤ ਜਨਗਣਨਾ ਫਾਰਮ ਵਿਚੋਂ ਗਲਤ ਸ਼ਬਦਾਂ ਨੂੰ ਹਟਾਇਆ ਜਾਵੇ ਤਾਂ ਜੋ ਐੱਸ.ਸੀ. ਭਾਈਚਾਰੇ ਦੀਆਂ ਭਾਵਨਾਵਾਂ ਨੂੰ ਕੋਈ ਠੇਸ ਨਾ ਪਹੁੰਚੇ | ਇਸ ਮੌਕੇ ਭਾਈ ਜਗਜੀਤ ਸਿੰਘ, ਸੁਰਿੰਦਰ ਸਿੰਘ, ਚਰਨਜੀਤ ਸਿੰਘ ਦੇਵੀਨਗਰ, ਮਾਸਟਰ ਸ਼ੇਰ ਸਿੰਘ, ਹਰਬੰਸ ਸਿੰਘ, ਰਾਜ ਕੁਮਾਰ ਝਰਮੜੀ, ਜਗਤਾਰ ਸਿੰਘ ਲੱਖੀ, ਸੁਖਜੀਤ ਸਿੰਘ ਗੋਲਡੀ, ਨਾਰੰਗ ਸਿੰਘ ਉੜਦਨ, ਡਾਕਟਰ ਰਣਵੀਰ ਸਿੰਘ ਤੋਂ ਇਲਾਵਾ ਹੋਰ ਬਹੁਤ ਸਾਰੇ ਬਸਪਾ ਆਗੂ ਹਾਜ਼ਰ ਸਨ |
