ਸ੍ਰੀ ਮੁਕਤਸਰ ਸਾਹਿਬ, 31 ਦਸੰਬਰ (ਹਰਮਹਿੰਦਰਪਾਲ)-ਹਰ ਸਾਲ 40 ਮੁਕਤਿਆਂ ਦੀ ਯਾਦ 'ਚ ਲੱਗਣ ਵਾਲੇ ਇਤਿਹਾਸਕ ਮਾਘੀ ਮੇਲੇ ਨੂੰ ਲੈ ਕੇ ਇਸ ਵਾਰ ਵੀ ਮਨੋਰੰਜਨ ਮੇਲੇ ਦੀਆਂ ਤਿਆਰੀਆਂ ਜ਼ੋਰਾਂ ਨਾਲ ਸ਼ੁਰੂ ਹੋ ਗਈਆਂ ਹਨ | ਮੇਲਾ ਗਰਾਊਾਡ ਵਿਚ ਝੂਟਿਆਂ ਦਾ ਤੇ ਹੋਰ ਸਮਾਨ ਪਹੁੰਚਣਾ ਸ਼ੁਰੂ ਹੋ ਗਿਆ ਹੈ | ਇਹ ਮਨੋਰੰਜਨ ਮੇਲਾ 10 ਜਨਵਰੀ ਤੋਂ 28 ਫ਼ਰਵਰੀ ਤੱਕ ਚੱਲੇਗਾ | ਮਨੋਰੰਜਨ ਮੇਲੇ ਦੇ ਨਾਲ ਨਾਲ ਮਲੋਟ ਰੋਡ 'ਤੇ ਵੀ ਦੁਕਾਨਾਂ ਦੀ ਰੌਣਕ ਵਧਣ ਲੱਗੀ ਹੈ | ਬਾਹਰ ਤੋਂ ਆਏ ਦੁਕਾਨਦਾਰਾਂ ਨੇ ਦੁਕਾਨਾਂ ਨੂੰ ਕਿਰਾਏ 'ਤੇ ਲੈ ਕੇ ਸਜਾਉਣਾ ਸ਼ੁਰੂ ਕਰ ਦਿੱਤਾ ਹੈ | ਖਾਣ ਪੀਣ, ਖਿਡੌਣੇ ਤੇ ਹੋਰ ਸਮਾਨ ਦੀ ਦੁਕਾਨਾਂ ਹੌਲੀ ਹੌਲੀ ਲੱਗ ਰਹੀਆਂ ਹਨ | ਇਸ ਵਾਰ ਮਨੋਰੰਜਨ ਮੇਲੇ ਦਾ ਟੈਂਡਰ 1 ਕਰੋੜ 31 ਲੱਖ ਰੁਪਏ ਵਿਚ ਅਲਾਟ ਹੋਇਆ ਹੈ, ਜੋ ਪਿਛਲੇ ਸਾਲ ਦੀ ਤੁਲਨਾ ਵਿਚ ਕਰੀਬ 25 ਲੱਖ ਰੁਪਏ ਵੱਧ ਹੈ | ਮੇਲਾ ਠੇਕੇਦਾਰ ਵਲੋਂ ਪੂਰੇ ਜੋਸ਼ ਨਾਲ ਤਿਆਰੀਆਂ ਕੀਤੀਆਂ ਜਾ ਰਹੀਆਂ ਹਨ | ਝੂਲੇ, ਮੌਤ ਦਾ ਖੂਹ ਤੇ ਹੋਰ ਮਨੋਰੰਜਨ ਸਾਧਨ ਮੇਲਾ ਗਰਾਊਾਡ ਵਿਚ ਲਗਾਏ ਜਾ ਰਹੇ ਹਨ ਤੇ ਆਉਣ ਵਾਲੇ ਦਿਨਾਂ ਵਿਚ ਮੇਲੇ ਦੀ ਸ਼ੁਰੂਆਤ ਕਰ ਦਿੱਤੀ ਜਾਵੇਗੀ | ਦੂਜੇ ਪਾਸੇ ਸਮਾਜਸੇਵੀਆਂ ਨੇ ਮਨੋਰੰਜਨ ਮੇਲੇ ਦੀ ਐਂਟਰੀ ਟਿਕਟ ਨੂੰ ਲੈ ਕੇ ਇਤਰਾਜ ਕੀਤਾ ਹੈ | ਉਨ੍ਹਾਂ ਕਿਹਾ ਕਿ ਹਰ ਸਾਲ ਮੇਲੇ ਦੀ ਟਿਕਟ ਦਰ ਵਧਾ ਦਿੱਤੀ ਜਾਂਦੀ ਹੈ, ਜਿਸ ਨਾਲ ਗਰੀਬ ਤੇ ਮੱਧਮ ਵਰਗ ਦੇ ਲੋਕ ਮੇਲੇ ਦਾ ਆਨੰਦ ਨਹੀਂ ਲੈ ਪਾਉਂਦੇ | ਉਨ੍ਹਾਂ ਪ੍ਰਸ਼ਾਸਨ ਨੂੰ ਮੰਗ ਪੱਤਰ ਸੌਂਪ ਕੇ ਮੰਗ ਕੀਤੀ ਹੈ ਕਿ ਐਂਟਰੀ ਟਿਕਟ ਦੇ ਰੇਟ ਘੱਟ ਕੀਤੇ ਜਾਣ | ਸਮਾਜਸੇਵੀਆਂ ਨੇ ਚਿਤਾਵਨੀ ਦਿੱਤੀ ਹੈ ਕਿ ਜੇ ਟਿਕਟ ਦਰਾਂ 'ਚ ਕਮੀ ਨਹੀਂ ਕੀਤੀ ਗਈ ਤਾਂ ਉਹ ਮੇਲਾ ਗਰਾਊਾਡ ਦੇ ਬਾਹਰ ਪ੍ਰਦਰਸ਼ਨ ਕਰਨਗੇ |
