ਕੋਟਕਪੂਰਾ, 2 ਜੁਲਾਈ (ਮੋਹਰ ਸਿੰਘ ਗਿੱਲ)-ਥਾਣਾ ਸਦਰ ਕੋਟਕਪੂਰਾ ਦੀ ਪੁਲਿਸ ਨੂੰ ਬਿਆਨ ਦੇ ਕੇ ਮਲਕੀਤ ਸਿੰਘ ਪੁੱਤਰ ਠਾਣਾ ਸਿੰਘ ਵਾਸੀ ਕੋਟਸੁਖੀਆ ਨੇ ਦੱਸਿਆ ਹੈ ਕਿ ਉਹ ਉਕਤ ਪਤੇ ਦਾ ਵਸਨੀਕ ਹੈ ਅਤੇ ਖੇਤੀਬਾੜੀ ਕਰਦਾ ਹੈ। ਮੇਰੀ ਜ਼ਮੀਨ ਸਾਢੇ ਪੰਜ ਕਿੱਲੇ ਨੰਬਰਦਾਰਾਂ ਵਾਲੀ ਪਹੀ ਕੋਟਸੁਖੀਆ ਵਿਖੇ ਹੈ। ਮੇਰੀ ਜ਼ਮੀਨ ਦੇ ਨਾਲ ਬਲਵਿੰਦਰ ਸਿੰਘ ਅਤੇ ਮੱਲ ਸਿੰਘ ਵਾਸੀ ਕੋਟਸੁਖੀਆ ਦੀ ਜ਼ਮੀਨ ਹੈ। ਮੈਂ ਬਲਵਿੰਦਰ ਸਿੰਘ ਪੁੱਤਰ ਮੱਲ ਸਿੰਘ ਦੀ ਜ਼ਮੀਨ ਨਾਲ ਤਿੰਨ ਕਨਾਲਾਂ ਵਿਚ ਚਰੀ ਬੀਜੀ ਹੋਈ ਸੀ। ਬਲਵਿੰਦਰ ਸਿੰਘ ਦੀ ਇਹ ਜ਼ਮੀਨ ਨਛੱਤਰ ਸਿੰਘ ਵਾਸੀ ਪਿੰਡ ਕੋਟਸੁਖੀਆ ਕੋਲ ਠੇਕੇ ’ਤੇ ਹੈ। ਮਿਤੀ 10.06.2026 ਨੂੰ ਬਲਵਿੰਦਰ ਸਿੰਘ, ਮੱਲ ਸਿੰਘ ਅਤੇ ਨਛੱਤਰ ਸਿੰਘ ਨੇ ਸਾਜਬਾਜ਼ ਹੋ ਕੇ ਟਰੈਕਟਰ ਪਿੱਛੇ ਹਲ਼ ਪਾ ਕੇ ਸਾਂਝੀ ਵੱਟ ਢਾਹ ਕੇ ਮੇਰੇ ਨਿਸ਼ਾਨਦੇਹੀ ਵਾਲੇ ਪੱਥਰ ਦੇ ਖੰਭੇ ਵੀ ਪੁੱਟ ਕੇ ਮੇਰੀ ਜ਼ਮੀਨ ਉਪਰ ਨਾਜਾਇਜ਼ ਕਬਜ਼ਾ ਕਰ ਲਿਆ। ਇਸ ਸਬੰਧ ’ਚ ਥਾਣਾ ਸਦਰ ਕੋਟਕਪੂਰਾ ਦੀ ਪੁਲਿਸ ਨੇ ਉਕਤ ਵਿਅਕਤੀਆਂ ਵਿਰੁੱਧ ਮਾਮਲਾ ਦਰਜ ਕਰਕੇ ਪੜਤਾਲ ਆਰੰਭ ਕਰ ਦਿੱਤੀ ਹੈ।
