ਕੋਟਕਪੂਰਾ, 18 ਜੁਲਾਈ (ਮੋਹਰ ਸਿੰਘ ਗਿੱਲ)-ਵਿਧਾਨ ਸਭਾ ਹਲਕਾ ਕੋਟਕਪੂਰਾ ਦੇ ਪਿੰਡ ਦੇ ਵਸਨੀਕ ਇਕ ਵਿਅਕਤੀ ਨੇ ਥਾਣਾ ਸਦਰ ਕੋਟਕਪੂਰਾ ਦੀ ਪੁਲਿਸ ਨੂੰ ਦਰਖ਼ਾਸਤ ਦੇ ਕੇ ਦੱਸਿਆ ਕਿ ਉਸ ਦੀ ਪਤਨੀ ਦੀ ਪੰਜ ਸਾਲ ਪਹਿਲਾਂ ਮੌਤ ਹੋ ਚੁੱਕੀ ਹੈ। ਮਿਤੀ 14.07.2026 ਦੀ ਰਾਤ ਨੂੰ ਮੁਦਈ ਅਤੇ ਉਸਦੀ 15 ਸਾਲਾ ਲੜਕੀ ਰਾਤ ਨੂੰ ਰੋਟੀ ਪਾਣੀ ਖਾ ਕੇ ਵਿਹੜੇ ਵਿਚ ਸੌਂ ਗਏ। ਰਾਤ ਨੂੰ ਕਰੀਬ 11:30 ਵਜੇ ਮੁਦਈ ਨੇ ਉਠ ਕੇ ਦੇਖਿਆ ਕਿ ਮੰਜੇ ਉਪਰ ਲੜਕੀ ਨਹੀਂ ਸੀ। ਮੁਦਈ ਨੇ ਆਪਣੇ ਪਰਿਵਾਰਕ ਮੈਂਬਰਾਂ ਨੂੰ ਉਠਾਇਆ ਅਤੇ ਦੱਸਿਆ ਕਿ ਲੜਕੀ ਮੰਜੇ ਉਪਰ ਨਹੀਂ ਹੈ। ਲੜਕੀ ਦੀ ਘਰ ਵਿਚ ਅਤੇ ਆਸ ਪਾਸ ਤਲਾਸ਼ ਕੀਤੀ ਤਾਂ ਲੜਕੀ ਸਾਨੂੰ ਨਹੀਂ ਮਿਲੀ। ਮੁਦਈ ਨੇ ਸਮਾਜਿਕ ਬੇਇੱਜਤੀ ਤੋਂ ਡਰਦਿਆਂ ਨੇ ਕਿਸੇ ਕੋਲ ਗੱਲ ਨਹੀ ਕੀਤੀ। ਮਿਤੀ 15.07.2026 ਨੂੰ ਲੜਕੀ ਰਾਤ ਨੂੰ ਕਰੀਬ 10 ਵਜੇ ਘਰ ਆ ਗਈ, ਜਿਸ ਨੇ ਦੱਸਿਆ ਕਿ ਪਿੰਡ ਦਾ ਹੀ ਕਰਨ ਸਿੰਘ ਨਾਮ ਦਾ ਲੜਕਾ ਉਸ ਨੂੰ ਵਿਆਹ ਦਾ ਝਾਂਸਾ ਦੇ ਕੇ ਵਰਗਲਾ ਕੇ ਘਰੋਂ ਭਜਾ ਕੇ ਲੈ ਗਿਆ ਸੀ, ਜੋ ਬਾਅਦ ਵਿਚ ਉਸ ਨੂੰ ਘਰ ਦੇ ਬਾਹਰ ਗਲੀ ਵਿਚ ਵਾਪਸ ਛੱਡ ਗਿਆ। ਪੁਲਿਸ ਨੇ ਉਕਤ ਨੌਜਵਾਨ ਵਿਰੁੱਧ ਮਾਮਲਾ ਦਰਜ ਕਰਕੇ ਪੜਤਾਲ ਆਰੰਭ ਕਰ ਦਿੱਤੀ ਹੈ।
