ਚੰਡੀਗੜ੍ਹ ਦੇ ਫਰੇਗਰੈਂਸ ਪਾਰਕ 'ਚ ਲੜਕੀ ਦੀ ਚਾਕੂ ਮਾਰ ਕੇ ਹੱਤਿਆ <br/>

ਚੰਡੀਗੜ੍ਹ, 23 ਫ਼ਰਵਰੀ (ਕਪਿਲ ਵਧਵਾ)–ਚੰਡੀਗੜ੍ਹ ਦੇ ਸੈਕਟਰ-36 'ਚ ਐਤਵਾਰ ਦੇਰ ਰਾਤ ਦਿਲ ਦਹਿਲਾ ਦੇਣ ਵਾਲੀ ਵਾਰਦਾਤ ਸਾਹਮਣੇ ਆਈ, ਜਿਥੇ 23 ਸਾਲਾ ਲੜਕੀ ਦਾ ਚਾਕੂ ਮਾਰ ਕੇ ਹੱਤਿਆ ਕਰ ਦਿੱਤੀ | ਮਿ੍ਤਕਾ ਦੀ ਪਹਿਚਾਣ ਸੁਹਾਨੀ ਵਜੋਂ ਹੋਈ, ਜੋ ਸੈਕਟਰ-35 'ਚ ਆਪਣੇ ਪਰਿਵਾਰ ਨਾਲ ਰਹਿੰਦੀ ਸੀ | ਥਾਣਾ ਸੈਕਟਰ 36 ਦੀ ਪੁਲਿਸ ਨੇ ਕਤਲ ਦੇ ਦੋਸ਼ ਹੇਠ ਵਿਨਯ ਨਾਂਅ ਦੇ ਨੌਜਵਾਨ ਨੂੰ ਗਿ੍ਫ਼ਤਾਰ ਕਰ ਲਿਆ | ਘਟਨਾ ਐੱਮ. ਸੀ. ਐੱਮ. ਕਾਲਜ ਨੇੜੇ ਸਥਿਤ ਫਰੈਗਰੈਂਸ ਪਾਰਕ 'ਚ ਵਾਪਰੀ | ਸੁਹਾਨੀ ਮੂਲ ਤੌਰ 'ਤੇ ਉੱਤਰ ਪ੍ਰਦੇਸ਼ ਦੇ ਪਰਿਵਾਰ ਨਾਲ ਸੰਬੰਧਿਤ ਸੀ | ਸੁਹਾਨੀ ਬੀ. ਏ. ਤੀਜੇ ਸਾਲ ਦੀ ਤਿਆਰੀ ਕਰ ਰਹੀ ਸੀ ਤੇ ਨਾਲ ਇਕ ਨਿੱਜੀ ਕੰਪਨੀ 'ਚ ਨੌਕਰੀ ਵੀ ਕਰਦੀ ਸੀ | ਪਰਿਵਾਰਕ ਮੈਂਬਰਾਂ ਮੁਤਾਬਕ ਉਸ ਦੇ ਵਿਆਹ ਦੀ ਗੱਲ ਰਾਹੁਲ ਨਾਂਅ ਦੇ ਨੌਜਵਾਨ ਨਾਲ ਚੱਲ ਰਹੀ ਸੀ, ਜੋ ਉਸ ਰਾਤ ਉਨ੍ਹਾਂ ਦੇ ਘਰ ਖਾਣਾ ਖਾਣ ਲਈ ਆਉਣ ਵਾਲਾ ਸੀ | ਪੁਲਿਸ ਜਾਂਚ ਅਨੁਸਾਰ ਮੁਲਜ਼ਮ ਵਿਨਯ ਮੂਲ ਤੌਰ 'ਤੇ ਬਿਹਾਰ ਦੇ ਮਧੁਬਨੀ ਜ਼ਿਲ੍ਹੇ ਦਾ ਰਹਿਣ ਵਾਲਾ ਹੈ ਤੇ ਬੁੜੈਲ ਇਲਾਕੇ 'ਚ ਰਹਿੰਦਾ ਸੀ | ਦੱਸਿਆ ਜਾ ਰਿਹਾ ਹੈ ਕਿ ਵਿਨਯ ਸੁਹਾਨੀ ਨਾਲ ਇਕਤਰਫ਼ਾ ਪ੍ਰੇਮ ਕਰਦਾ ਸੀ, ਜਦਕਿ ਕੁੜੀ ਉਸ ਨਾਲ ਕੋਈ ਸੰਬੰਧ ਨਹੀਂ ਰੱਖਣਾ ਚਾਹੁੰਦੀ ਸੀ | ਵਿਆਹ ਦੀ ਗੱਲ ਪਤਾ ਲੱਗਣ 'ਤੇ ਉਸ ਨੇ ਕਿਸੇ ਬਹਾਨੇ ਸੁਹਾਨੀ ਨੂੰ ਸੈਕਟਰ-36 ਦੇ ਪਾਰਕ 'ਚ ਮਿਲਣ ਲਈ ਬੁਲਾਇਆ | ਐਤਵਾਰ ਰਾਤ ਸੁਹਾਨੀ ਘਰੋਂ ਰਾਹੁਲ ਲਈ ਚਾਕਲੇਟ ਲਿਆਉਣ ਦਾ ਕਹਿ ਕੇ ਨਿਕਲੀ | ਉਹ ਪਾਰਕ ਪਹੁੰਚੀ ਤਾਂ ਦੋਹਾਂ ਵਿਚਕਾਰ ਕਿਸੇ ਗੱਲੋਂ ਤਕਰਾਰ ਹੋ ਗਈ | ਗੁੱਸੇ 'ਚ ਆ ਕੇ ਵਿਨਯ ਨੇ ਉਸ ਦੇ ਗਲੇ 'ਤੇ ਚਾਕੂ ਨਾਲ ਕਈ ਵਾਰ ਕੀਤੇ ਅਤੇ ਫਰਾਰ ਹੋ ਗਿਆ | ਜਦੋਂ ਕਾਫ਼ੀ ਦੇਰ ਤੱਕ ਸੁਹਾਨੀ ਘਰ ਵਾਪਸ ਨਾ ਆਈ ਤਾਂ ਉਸ ਦੀ ਮਾਂ ਨੇ ਫ਼ੋਨ ਕੀਤਾ | ਫ਼ੋਨ 'ਤੇ ਉਸ ਨੇ ਘਟਨਾ ਬਾਰੇ ਦੱਸਿਆ | ਪਰਿਵਾਰਕ ਮੈਂਬਰਾਂ ਨੇ ਗੰਭੀਰ ਰੂਪ 'ਚ ਸੁਹਾਨੀ ਨੂੰ ਸਰਕਾਰੀ ਹਸਪਤਾਲ ਲਿਆਂਦਾ, ਜਿਥੇ ਡਾਕਟਰਾਂ ਨੇ ਉਸ ਨੂੰ ਮਿ੍ਤਕ ਐਲਾਨ ਦਿੱਤਾ | ਪੁਲਿਸ ਨੇ ਮੁਲਜ਼ਮ ਵਿਨਯ ਖ਼ਿਲਾਫ਼ ਕਤਲ ਦਾ ਮਾਮਲਾ ਦਰਜ ਕਰ ਕੇ ਕੁਝ ਘੰਟਿਆਂ 'ਚ ਥਾਣਾ ਸੈਕਟਰ-36 ਦੇ ਐੱਸ.ਐੱਚ.ਓ ਜੇ. ਪੀ. (ਜੈ ਪ੍ਰਕਾਸ਼) ਦੀ ਅਗਵਾਈ ਵਾਲੀ ਪੁਲਿਸ ਪਾਰਟੀ ਵਲੋਂ ਉਸ ਨੂੰ ਗਿ੍ਫ਼ਤਾਰ ਕਰ ਲਿਆ ਤੇ ਵਾਰਦਾਤ 'ਚ ਵਰਤਿਆ ਗਿਆ ਸ਼ੇਫ਼ ਨਾਈਫ ਵੀ ਬਰਾਮਦ ਕਰ ਲਿਆ |