ਅਮਲੋਹ ਦੇ ਬੌਬਿਨ ਕਰਕਰਾ ਸਮੇਤ ਦੁਬਈ ਵਿਚ ਫਸੇ 40 ਪੰਜਾਬੀ ਸੁਰੱਖਿਅਤ ਵਤਨ ਪਰਤੇ <br/>

ਅਮਲੋਹ, 9 ਮਾਰਚ (ਹਰਪ੍ਰੀਤ ਸਿੰਘ ਗਿੱਲ)-ਮਿਡਲ ਈਸਟ ਵਿਚ ਵਿਗੜੇ ਹਾਲਾਤਾਂ ਦਰਮਿਆਨ ਦੁਬਈ ਵਿਚ ਫਸੇ ਅਮਲੋਹ ਦੇ ਵਸਨੀਕ ਬੌਬਿਨ ਕਰਕਰਾ ਤੇ ਉਨ੍ਹਾਂ ਦੇ 40 ਹੋਰ ਸਾਥੀ ਪ੍ਰਸ਼ਾਸਨਿਕ ਯਤਨਾਂ ਸਦਕਾ ਲੰਘੀ ਰਾਤ ਸੁਰੱਖਿਅਤ ਭਾਰਤ ਪਹੁੰਚ ਗਏ ਹਨ | ਦੱਸਣਯੋਗ ਹੈ ਕਿ ਬੌਬਿਨ ਕਰਕਰਾ ਨੇ ਦੁਬਈ ਤੋਂ 'ਅਜੀਤ' ਨਾਲ ਸੰਪਰਕ ਕਰਕੇ ਉੱਥੋਂ ਦੇ ਗੰਭੀਰ ਹਾਲਾਤ ਬਾਰੇ ਜਾਣਕਾਰੀ ਸਾਂਝੀ ਕੀਤੀ ਸੀ | ਖ਼ਬਰ ਛਪਣ ਤੋਂ ਤੁਰੰਤ ਬਾਅਦ ਪ੍ਰਸ਼ਾਸਨ ਹਰਕਤ ਵਿਚ ਆਇਆ ਅਤੇ ਵੱਖ-ਵੱਖ ਐਨ.ਜੀ.ਓਜ਼ ਵਲੋਂ ਇਨ੍ਹਾਂ ਫਸੇ ਹੋਏ ਲੋਕਾਂ ਦੀ ਮਦਦ ਲਈ ਕਾਰਵਾਈ ਸ਼ੁਰੂ ਕੀਤੀ ਗਈ | ਭਾਰਤ ਪਰਤਣ ਤੋਂ ਬਾਅਦ ਬੌਬਿਨ ਨੇ ਗੱਲ ਕਰਦਿਆਂ 'ਅਜੀਤ' ਅਖ਼ਬਾਰ ਦਾ ਧੰਨਵਾਦ ਕੀਤਾ ਹੈ | ਉਨ੍ਹਾਂ ਭਾਵੁਕ ਹੁੰਦਿਆਂ ਕਿਹਾ ਕਿ 'ਅਜੀਤ' ਵਿਚ ਲੱਗੀ ਸਹੀ ਤੱਥਾਂ ਦੇ ਆਧਾਰ 'ਤੇ ਖ਼ਬਰ ਕਾਰਨ ਹੀ ਉਨ੍ਹਾਂ ਦੀ ਵਾਪਸੀ ਸੰਭਵ ਹੋ ਸਕੀ | ਬੌਬਿਨ ਨੇ ਸਮਾਜ ਵਿਚ ਮੀਡੀਆ ਦੇ ਸਾਰਥਕ ਰੋਲ ਦੀ ਸ਼ਲਾਘਾ ਕਰਦਿਆਂ ਕਿਹਾ ਕਿ ਉਨ੍ਹਾਂ ਕੋਲ ਧੰਨਵਾਦ ਕਰਨ ਲਈ ਸ਼ਬਦ ਨਹੀਂ ਹਨ |