ਸਾਨ ਫਰਾਂਸਿਸਕੋ, 27 ਮਾਰਚ (ਐਸ. ਅਸ਼ੋਕ ਭੌਰਾ)-ਅਮਰੀਕੀ ਕਾਗਜ਼ੀ ਮੁਦਰਾ 'ਤੇ ਆਜ਼ਾਦੀ ਦੀ 250ਵੀਂ ਵਰੇ੍ਹਗੰਢ ਮਨਾਉਣ ਲਈ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਦਸਤਖਤ ਹੋਣਗੇ, ਖਜ਼ਾਨਾ ਵਿਭਾਗ ਨੇ ਕਿਹਾ ਕਿ 165 ਸਾਲਾਂ 'ਚ ਪਹਿਲੀ ਵਾਰ ਹੈ ਜਦੋਂ ਕਿਸੇ ਰਾਸ਼ਟਰਪਤੀ ਦੇ ਕਾਲ 'ਚ ਅਮਰੀਕੀ ਪੈਸੇ ਤੋਂ ਅਮਰੀਕਾ ਦੇ ਖਜ਼ਾਨਚੀ ਦੇ ਦਸਤਖ਼ਤ ਨੂੰ ਮਿਟਾ ਦਿੱਤਾ ਗਿਆ ਹੈ | ਖਜ਼ਾਨਾ ਵਿਭਾਗ ਨੇ ਦੱਸਿਆ ਕਿ ਟਰੰਪ ਤੇ ਅਮਰੀਕੀ ਖਜ਼ਾਨਾ ਸਕੱਤਰ ਸਕਾਟ ਬੇਸੈਂਟ ਦੇ ਦਸਤਖਤਾਂ ਵਾਲੇ ਪਹਿਲੇ 100 ਡਾਲਰ ਦੇ ਨੋਟ ਜੂਨ 'ਚ ਛਾਪੇ ਜਾਣਗੇ, ਇਸ ਤੋਂ ਬਾਅਦ ਆਉਣ ਵਾਲੇ ਮਹੀਨਿਆਂ ਵਿਚ ਹੋਰ ਨੋਟ ਆਉਣਗੇ | ਖਜ਼ਾਨਾ ਵਿਭਾਗ ਦਾ ਉੱਕਰਨ ਤੇ ਛਪਾਈ ਬਿਊਰੋ ਹਾਲੇ ਵੀ ਸਾਬਕਾ ਰਾਸ਼ਟਰਪਤੀ ਜੋ ਬਾਈਡਨ ਦੇ ਖਜ਼ਾਨਾ ਸਕੱਤਰ ਜੈਨੇਟ ਯੇਲੇਨ ਤੇ ਖਜ਼ਾਨਚੀ ਲਿਨ ਮਲੇਰਬਾ ਦੇ ਦਸਤਖਤਾਂ ਵਾਲੇ ਨੋਟ ਤਿਆਰ ਕਰ ਰਿਹਾ ਹੈ | ਖਜਾਨਾ ਵਿਭਾਗ ਦੇ ਖਜਾਨਚੀ ਨੂੰ ਇਸ ਕਤਾਰ 'ਚੋਂ ਲਾਂਭੇ ਕਰ ਦਿੱਤਾ ਜਾਵੇਗਾ | ਦਸਤਖਤ ਵਿਚ ਤਬਦੀਲੀ ਟਰੰਪ ਪ੍ਰਸ਼ਾਸਨ ਤੇ ਇਸ ਦੇ ਸਹਿਯੋਗੀਆਂ ਦੁਆਰਾ ਇਮਾਰਤਾਂ, ਸੰਸਥਾਵਾਂ, ਸਰਕਾਰੀ ਪ੍ਰੋਗਰਾਮਾਂ, ਜੰਗੀ ਜਹਾਜ਼ਾਂ ਤੇ ਸਿੱਕਿਆਂ 'ਤੇ ਰਾਸ਼ਟਰਪਤੀ ਦਾ ਨਾਂਅ ਲਗਾਉਣ ਦੀ ਤਾਜ਼ਾ ਕੋਸ਼ਿਸ਼ ਹੈ | ਟਰੰਪ ਦੀ ਤਸਵੀਰ ਵਾਲੇ ਇਕ ਯਾਦਗਾਰੀ ਸੋਨੇ ਦੇ ਸਿੱਕੇ ਦੇ ਡਿਜ਼ਾਈਨ ਨੂੰ ਇੱਕ ਸੰਘੀ ਕਲਾ ਪੈਨਲ ਦੁਆਰਾ ਮਨਜ਼ੂਰੀ ਦਿੱਤੀ ਗਈ ਸੀ, ਜਿਸ ਦੇ ਮੈਂਬਰਾਂ ਨੂੰ ਉਸ ਨੇ ਨਿਯੁਕਤ ਕੀਤਾ ਸੀ |
