ਵਾਸ਼ਿੰਗਟਨ, 12 ਮਈ (ਏਜੰਸੀ)-ਅਮਰੀਕਾ ਦੇ ਰੱਖਿਆ ਮੰਤਰਾਲੇ ਨੇ ਕਿਹਾ ਕਿ ਈਰਾਨ ਖ਼ਿਲਾਫ਼ ਸੈਨਿਕ ਮੁਹਿੰਮ 'ਤੇ ਅਮਰੀਕਾ ਦਾ ਖ਼ਰਚ ਵਧ ਕੇ ਲਗਭਗ 29 ਅਰਬ ਡਾਲਰ ਤੱਕ ਪਹੁੰਚ ਗਿਆ ਹੈ | ਯੁੱਧ ਮਾਮਲਿਆਂ ਦੇ ਉਪ ਸਕੱਤਰ ਅਤੇ ਕਾਰਜਕਾਰੀ ਮੁੱਖ ਵਿੱਤੀ ਅਧਿਕਾਰੀ ਜੂਲਸ ਡਬਲਯੂ ਹਰਸਟ ਤੀਜੇ ਨੇ ਪ੍ਰਤੀਨਿਧੀ ਸਭਾ ਦੀ ਰੱਖਿਆ ਐਪਰੋਪ੍ਰੀਏਸ਼ਨ ਉਪ ਕਮੇਟੀ ਦੀ ਸੁਣਵਾਈ 'ਚ ਕਿਹਾ ਕਿ ਅਪ੍ਰੈਲ ਦੇ ਅੰਤ 'ਚ ਅਨੁਮਾਨਿਤ 25 ਅਰਬ ਡਾਲਰ ਦੀ ਤੁਲਨਾ 'ਚ ਹੁਣ ਲਾਗਤ 'ਚ ਵਰਨਣਯੋਗ ਵਾਧਾ ਹੋਇਆ ਹੈ | ਹਰਸਟ ਨੇ ਕਿਹਾ ਕਿ ਇਹ ਵਧੀ ਹੋਈ ਰਕਮ ਸੈਨਿਕ ਯੰਤਰਾਂ ਦੀ ਮੁਰੰਮਤ ਅਤੇ ਉਨ੍ਹਾਂ ਨੂੰ ਬਦਲਣ ਦੀ ਅਪਡੇਟਡ ਲਾਗਤ, ਨਾਲ ਹੀ ਤਾਇਨਾਤ ਸੈਨਾਵਾਂ ਨੂੰ ਬਣਾਈ ਰੱਖਣ ਲਈ ਚੱਲ ਰਹੇ ਆਪਰੇਸ਼ਨ ਖ਼ਰਚਿਆਂ ਨੂੰ ਦਿਖਾਉਂਦੀ ਹੈ | ਹਰਸਟ ਨੇ ਕਿਹਾ ਕਿ ਗਵਾਹੀ ਸਮੇਂ ਇਹ 25 ਅਰਬ ਡਾਲਰ ਸੀ ਪਰ ਜਾਇੰਟ ਸਟਾਫ਼ ਟੀਮ ਅਤੇ ਕੰਟਰੋਲਰ ਟੀਮ ਲਗਾਤਾਰ ਇਸ ਅਨੁਮਾਨ 'ਤੇ ਨਜ਼ਰ ਰੱਖ ਰਹੀਆਂ ਹਨ ਅਤੇ ਇਸ ਲਈ ਹੁਣ ਸਾਨੂੰ ਲਗਦਾ ਹੈ ਕਿ ਇਹ 29 ਅਰਬ ਡਾਲਰ ਦੇ ਕਰੀਬ ਹੈ | ਅਜਿਹਾ ਯੰਤਰਾਂ ਦੀ ਮੁਰੰਮਤ ਅਤੇ ਉਨ੍ਹਾਂ ਨੂੰ ਬਦਲਣ ਦੀ ਅਪਡੇਟਡ ਲਾਗਤ ਅਤੇ ਨਾਲ ਹੀ ਸੈਨਿਕਾਂ ਨੂੰ ਯੁੱਧ ਖੇਤਰ 'ਚ ਰੱਖਣ ਦੇ ਸਾਧਾਰਨ ਆਪਰੇਸ਼ਨਲ ਖ਼ਰਚਿਆਂ ਕਾਰਨ ਹੋਇਆ ਹੈ | ਇਸ ਕੁਲ ਰਕਮ 'ਚ ਹਵਾਈ ਅਤੇ ਜਲ ਸੈਨਾ ਆਪਰੇਸ਼ਨ, ਗੋਲਾ ਬਾਰੂਦ ਦੀ ਵਰਤੋਂ, ਲਾਜਿਸਟਿਕ ਅਤੇ ਹਮਲਿਆਂ ਅਤੇ ਖੇਤਰੀ ਆਪਰੇਸ਼ਨਾਂ 'ਚ ਸ਼ਾਮਿਲ ਅੱਗੇ ਤਾਇਨਾਤ ਸੈਨਿਕਾਂ ਲਈ ਸਹਾਇਤਾ ਸ਼ਾਮਿਲ ਹੈ |
