ਪਾਕਿ 'ਚ ਮਈ ਵਿਚ 128 ਅੱਤਵਾਦੀ ਹਮਲੇ ਦਰਜ, 27 ਫ਼ੀਸਦੀ ਹੋਇਆ ਵਾਧਾ-ਰਿਪੋਰਟ <br/>

ਅੰਮਿ੍ਤਸਰ, 2 ਜੂਨ (ਸੁਰਿੰਦਰ ਕੋਛੜ)-ਪਿਛਲੇ ਮਈ ਮਹੀਨੇ 'ਚ ਪਾਕਿਸਤਾਨ ਵਿਚ 128 ਅੱਤਵਾਦੀ ਹਮਲੇ ਦਰਜ ਕੀਤੇ ਗਏ, ਜਦੋਂਕਿ ਅਪ੍ਰੈਲ 'ਚ 101 ਦਰਜ ਕੀਤੇ ਗਏ ਸਨ | ਇਸ ਤਰ੍ਹਾਂ ਨਾਲ ਪਾਕਿ 'ਚ ਅੱਤਵਾਦੀ ਹਮਲੇ ਅਪ੍ਰੈਲ ਦੇ ਮੁਕਾਬਲੇ 27 ਫ਼ੀਸਦੀ ਵਧੇ ਹਨ, ਜੋ ਦੇਸ਼ 'ਚ ਅੱਤਵਾਦ ਨਾਲ ਸੰਬੰਧਿਤ ਖ਼ਤਰਿਆਂ ਦੇ ਪ੍ਰਸਾਰ ਨੂੰ ਉਜਾਗਰ ਕਰਦੇ ਹਨ | ਪਾਕਿਸਤਾਨ ਇੰਸਟੀਚਿਊਟ ਫ਼ਾਰ ਕਨਫਲਿਕਟ ਐਂਡ ਸਕਿਓਰਿਟੀ ਸਟੱਡੀਜ਼ ਦੁਆਰਾ ਜਾਰੀ ਕੀਤੀ ਗਈ ਮਾਸਿਕ ਸੁਰੱਖਿਆ ਮੁਲਾਂਕਣ ਰਿਪੋਰਟ ਦੇ ਅਨੁਸਾਰ ਥੋੜ੍ਹੇ ਸਮੇਂ ਦੇ ਮੁਕਾਬਲਤਨ ਗਿਰਾਵਟ ਤੋਂ ਬਾਅਦ ਮਈ 'ਚ ਅੱਤਵਾਦੀ ਅਤੇ ਅੱਤਵਾਦੀ ਸਮੂਹਾਂ ਦੀਆਂ ਗਤੀਵਿਧੀਆਂ 'ਚ ਫਿਰ ਵਾਧਾ ਹੋਇਆ | ਇਸ ਥਿੰਕ ਟੈਂਕ ਰਿਪੋਰਟ ਅਨੁਸਾਰ ਮਈ 'ਚ 71 ਨਾਗਰਿਕ, 68 ਸੁਰੱਖਿਆ ਕਰਮਚਾਰੀ ਅਤੇ ਸ਼ਾਂਤੀ ਕਮੇਟੀਆਂ ਦੇ ਛੇ ਮੈਂਬਰ ਮਾਰੇ ਗਏ, ਜਦੋਂ ਕਿ 147 ਨਾਗਰਿਕ, 35 ਸੁਰੱਖਿਆ ਕਰਮਚਾਰੀ ਅਤੇ ਸ਼ਾਂਤੀ ਕਮੇਟੀਆਂ ਦੇ ਤਿੰਨ ਮੈਂਬਰ ਜ਼ਖਮੀ ਹੋਏ | ਅਪ੍ਰੈਲ ਦੇ ਮੁਕਾਬਲੇ ਨਾਗਰਿਕ ਮੌਤਾਂ ਦੀ ਗਿਣਤੀ 37 ਤੋਂ ਵਧ ਕੇ 71 ਹੋ ਗਈ, ਜਦੋਂ ਕਿ ਸੁਰੱਖਿਆ ਕਰਮਚਾਰੀਆਂ ਦੀ ਮੌਤਾਂ ਦੀ ਗਿਣਤੀ 28 ਤੋਂ ਵਧ ਕੇ 68 ਹੋ ਗਈ | ਮਈ 'ਚ ਪਾਕਿ ਵਿਚ ਛੇ ਆਤਮਘਾਤੀ ਹਮਲੇ ਹੋਏ | ਇਨ੍ਹਾਂ ਹਮਲਿਆਂ 'ਚ ਹੀ 34 ਸੁਰੱਖਿਆ ਕਰਮਚਾਰੀ ਅਤੇ 9 ਨਾਗਰਿਕ ਮਾਰੇ ਗਏ | ਰਿਪੋਰਟ ਦੇ ਅਨੁਸਾਰ ਮਈ 'ਚ ਸਭ ਤੋਂ ਵੱਧ ਪ੍ਰਭਾਵਿਤ ਸੂਬਾ ਬਲੋਚਿਸਤਾਨ ਸੀ, ਜਿੱਥੇ ਅਪ੍ਰੈਲ 'ਚ 34 ਦੇ ਮੁਕਾਬਲੇ 71 ਅੱਤਵਾਦੀ ਹਮਲੇ ਦਰਜ ਕੀਤੇ ਗਏ |