ਐੱਸ.ਆਈ.ਟੀ. ਨੂੰ ਅਯੁੱਧਿਆ ਮੰਦਿਰ ਦੇ ਚੜ੍ਹਾਵੇ ਵਾਲੇ ਕਮਰੇ ’ਚ ਚੋਰੀ ਦੇ ਮੁੱਢਲੇ ਸਬੂਤ ਮਿਲੇ; ਸੀ. ਸੀ. ਟੀਵੀ ਨੇ ਕਥਿਤ ਬੇਨਿਯਮੀਆਂ ਫੜੀਆਂ

 ਅਯੁੱਧਿਆ, 7 ਜੁਲਾਈ (ਯੂ.ਐੱਨ.ਆਈ.) ਵਿਸ਼ੇਸ਼ ਜਾਂਚ ਟੀਮ (ਐੱਸ.ਆਈ.ਟੀ.) ਦੀ ਮੁੱਢਲੀ ਜਾਂਚ ਵਿੱਚ ਅਯੁੱਧਿਆ ਦੇ ਸ਼੍ਰੀ ਰਾਮ ਜਨਮ ਭੂਮੀ ਮੰਦਿਰ ਵਿੱਚ ਚੜ੍ਹਾਵੇ ਦੀ ਗਿਣਤੀ ਦੌਰਾਨ ਚੋਰੀ ਅਤੇ ਦੁਰਵਰਤੋਂ ਦੇ ਮੁੱਢਲੇ ਸਬੂਤ ਮਿਲੇ ਹਨ। ਸੀ.ਸੀ.ਟੀਵੀ ਫੁਟੇਜ ਵਿੱਚ ਕਥਿਤ ਤੌਰ ‘ਤੇ ਕਰਮਚਾਰੀਆਂ ਨੂੰ ਕਰੰਸੀ ਨੋਟਾਂ ਅਤੇ ਖੁੱਲ੍ਹੇ ਨੋਟਾਂ ਦੇ ਬੰਡਲ ਛੁਪਾਉਂਦੇ ਦਿਖਾਇਆ ਗਿਆ ਹੈ।ਮੰਗਲਵਾਰ ਨੂੰ ਜਾਰੀ ਕੀਤੀ ਗਈ ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਬੇਨਿਯਮੀਆਂ 27 ਅਪ੍ਰੈਲ ਤੋਂ ਪਹਿਲਾਂ ਵੀ ਹੋਈਆਂ ਸਨ, ਪਰ ਉਸ ਸਮੇਂ ਦੀ ਸੀ.ਸੀ.ਟੀਵੀ ਫੁਟੇਜ ਦੀ ਘਾਟ ਕਾਰਨ ਕਥਿਤ ਨੁਕਸਾਨ ਦਾ ਸਹੀ ਅੰਦਾਜ਼ਾ ਨਹੀਂ ਲਗਾਇਆ ਜਾ ਸਕਿਆ। ਸਿਟ ਵੱਲੋਂ 22 ਜੁਲਾਈ ਤੱਕ ਆਪਣੀ ਅੰਤਿਮ ਰਿਪੋਰਟ ਪੇਸ਼ ਕਰਨ ਦੀ ਉਮੀਦ ਹੈ, ਜਦੋਂ ਸ਼੍ਰੀ ਰਾਮ ਜਨਮ ਭੂਮੀ ਤੀਰਥ ਖੇਤਰ ਟਰੱਸਟ ਦੀ ਅਗਲੀ ਮੀਟਿੰਗ ਨਿਰਧਾਰਤ ਹੈ।ਸਿਟ ਦੀ ਮੁੱਢਲੀ ਜਾਂਚ ਦੇ ਅਨੁਸਾਰ, ਉਪਲਬਧ ਸੀ.ਸੀ.ਟੀਵੀ ਫੁਟੇਜ ਵਿੱਚ ਲਗਭਗ 70 ਘਟਨਾਵਾਂ ਦਰਜ ਹਨ ਜਿਨ੍ਹਾਂ ਵਿੱਚ ਗਿਣਤੀ ਪ੍ਰਕਿਰਿਆ ਦੌਰਾਨ ਗਿਣਤੀ ਕਰਮਚਾਰੀਆਂ ਨੂੰ ਕਥਿਤ ਤੌਰ ‘ਤੇ ਨੋਟ ਛੁਪਾਉਂਦੇ ਦੇਖਿਆ ਗਿਆ ਸੀ। ਐੱਸ.ਆਈ.ਟੀ. ਨੇ ਕਿਹਾ ਕਿ ਮੁਲਜ਼ਮਾਂ ਦੇ ਬਿਆਨਾਂ ਅਤੇ ਉਨ੍ਹਾਂ ਦੇ ਬੈਂਕ ਖਾਤਿਆਂ ਵਿੱਚ ਉਨ੍ਹਾਂ ਦੀ ਆਮਦਨ ਦੇ ਜਾਣੇ-ਪਛਾਣੇ ਸਰੋਤਾਂ ਤੋਂ ਵੱਧ ਫੰਡਾਂ ਦੀ ਖੋਜ ਨੇ ਸ਼ੱਕ ਨੂੰ ਹੋਰ ਡੂੰਘਾ ਕਰ ਦਿੱਤਾ।ਰਿਪੋਰਟ ਨੇ ਸੁਰੱਖਿਆ ਪ੍ਰਬੰਧਾਂ, ਗਿਣਤੀ ਕਮਰੇ ਵਿੱਚ ਨਿਗਰਾਨੀ ਪ੍ਰਣਾਲੀ, ਪ੍ਰਬੰਧਕੀ ਨਿਗਰਾਨੀ, ਅਤੇ ਗਿਣਤੀ ਪ੍ਰਕਿਰਿਆ ਵਿੱਚ ਸ਼ਾਮਲ ਮੰਦਿਰ ਟਰੱਸਟ ਅਤੇ ਬੈਂਕ ਦੀ ਭੂਮਿਕਾ ਬਾਰੇ ਗੰਭੀਰ ਸਵਾਲ ਖੜ੍ਹੇ ਕੀਤੇ ਹਨ। ਹਾਲਾਂਕਿ, ਐੱਸ.ਆਈ.ਟੀ. ਨੇ ਜ਼ੋਰ ਦੇ ਕੇ ਕਿਹਾ ਕਿ ਇਹ ਨਤੀਜੇ ਸ਼ੁਰੂਆਤੀ ਹਨ ਅਤੇ ਇੱਕ ਵਿਸਤ੍ਰਿਤ ਜਾਂਚ ਚੱਲ ਰਹੀ ਹੈ।