ਅਟਲਾਂਟਾ, 7 ਜੁਲਾਈ (ਏਜੰਸੀ)- ਇਥੋਂ ਦੇ ਅਟਲਾਂਟਾ ਸਟੇਡੀਅਮ ’ਚ ਹੋਏ ਰਾਊਂਡ ਆਫ਼ 16 ਮੈਚ ’ਚ ਅਰਜਨਟੀਨਾ ਨੇ ਮਿਸਰ ਨੂੰ 3-2 ਨਾਲ ਹਰਾ ਕੇ ਇਕ ਸ਼ਾਨਦਾਰ ਜਿੱਤ ਦਰਜ ਕੀਤੀ। ਇਸ ਜਿੱਤ ਨਾਲ, ਅਰਜਨਟੀਨਾ ਦੀ ਟੀਮ ਕੁਆਰਟਰ ਫਾਈਨਲ ’ਚ ਪਹੁੰਚ ਗਈ ਹੈ। ਅਰਜਨਟੀਨਾ ਕੋਲ ਪਹਿਲੇ ਅੱਧ ’ਚ ਕਈ ਮੌਕੇ ਸਨ, ਪਰ ਇਹ ਮਿਸਰ ਹੀ ਸੀ ਜੋ ਗੋਲ ਕਰਨ ’ਚ ਸਫਲ ਰਿਹਾ। ਯਾਸਰ ਇਬਰਾਹਿਮ ਨੇ 15ਵੇਂ ਮਿੰਟ ’ਚ ਮਾਰਵਾਨ ਅਟੀਆ ਦੀ ਸਹਾਇਤਾ ਨਾਲ ਗੋਲ ਕਰਕੇ ਮਿਸਰ ਨੂੰ 1-0 ਨਾਲ ਅੱਗੇ ਕਰ ਦਿੱਤਾ। ਥੋੜ੍ਹੀ ਦੇਰ ਬਾਅਦ, ਲਿਓਨਲ ਮੈਸੀ 21ਵੇਂ ਮਿੰਟ ’ਚ ਪੈਨਲਟੀ ਖੁੰਝ ਗਿਆ। ਇਹ ਵੀ ਅਰਜਨਜੀਨਾ ਲਈ ਹੈਰਾਨੀਜਨਕ ਸੀ। ਮਿਸਰ ਦੇ ਗੋਲਕੀਪਰ ਮੁਸਤਫਾ ਸ਼ੋਬੈਰ ਨੇ ਉਸ ਮੌਕੇ ’ਤੇ ਇਕ ਸ਼ਾਨਦਾਰ ਬਚਾਅ ਕੀਤਾ। ਦੂਜੇ ਅੱਧ ’ਚ, ਮੁਸਤਫਾ ਜ਼ੀਕੋ ਨੇ ਮਿਸਰ ਦੀ ਲੀਡ 2-0 ਤੱਕ ਵਧਾ ਦਿੱਤੀ। ਜ਼ੀਕੋ ਨੇ 67ਵੇਂ ਮਿੰਟ ’ਚ ਹੈਥਮ ਹਸਨ ਦੇ ਪਾਸ ’ਤੇ ਇਹ ਗੋਲ ਕੀਤਾ। ਮੈਚ ਦੇ 78ਵੇਂ ਮਿੰਟ ਤੱਕ ਅਰਜਨਟੀਨਾ 0-2 ਨਾਲ ਪਿੱਛੇ ਸੀ, ਪਰ ਲਿਓਨਲ ਮੈਸੀ ਦੀ ਅਗਵਾਈ ’ਚ ਮੌਜੂਦਾ ਵਿਸ਼ਵ ਚੈਂਪੀਅਨ ਨੇ ਇਕ ਸ਼ਕਤੀਸ਼ਾਲੀ ਵਾਪਸੀ ਕੀਤੀ ਤੇ ਮੈਚ ਦਾ ਪਾਸਾ ਹੀ ਪਲਟ ਦਿੱਤਾ। ਸਿਰਫ਼ 13 ਮਿੰਟਾਂ ’ਚ ਤਿੰਨ ਗੋਲ ਕਰਕੇ, ਅਰਜਨਟੀਨਾ ਨੇ ਮਿਸਰ ਦੀ ਟੀਮ ਨੂੰ ਇਕ ਵੱਡਾ ਝਟਕਾ ਦਿੱਤਾ। ਕਪਤਾਨ ਲਿਓਨਲ ਮੈਸੀ ਅਰਜਨਟੀਨਾ ਦੀ ਜਿੱਤ ਦਾ ਹੀਰੋ ਸੀ, ਜਿਸਨੇ ਇਕ ਗੋਲ ਤੇ ਇਕ ਅਸਿਸਟ ਦਾ ਯੋਗਦਾਨ ਪਾਇਆ। ਮੈਸੀ ਨੇ 79ਵੇਂ ਮਿੰਟ ’ਚ ਕ੍ਰਿਸਟੀਅਨ ਰੋਮੇਰੋ ਦੇ ਗੋਲ ਲਈ ਅਸਿਸਟ ਪ੍ਰਦਾਨ ਕੀਤਾ। ਇਸ ਤੋਂ ਬਾਅਦ ਉਸਨੇ 83ਵੇਂ ਮਿੰਟ ’ਚ ਗੋਂਜ਼ਾਲੋ ਮੋਂਟੀਏਲ ਦੇ ਪਾਸ ’ਤੇ ਖੁਦ ਇਕ ਸ਼ਾਨਦਾਰ ਗੋਲ ਕੀਤਾ। ਅੰਤ ਵਿਚ, ਸਟਾਪੇਜ ਟਾਈਮ (90+2 ਮਿੰਟ) ’ਚ, ਐਂਜ਼ੋ ਫਰਨਾਂਡੇਜ਼ ਨੇ ਲੌਟਾਰੋ ਮਾਰਟੀਨੇਜ਼ ਦੇ ਪਾਸ ਤੋਂ ਗੋਲ ਕਰਕੇ ਅਰਜਨਟੀਨਾ ਲਈ ਫੈਸਲਾਕੁੰਨ 3-2 ਦੀ ਬੜ੍ਹਤ ਹਾਸਲ ਕੀਤੀ। ਲਿਓਨਲ ਮੈਸੀ ਨੇ ਮੌਜੂਦਾ ਵਿਸ਼ਵ ਕੱਪ ਵਿੱਚ ਕੁੱਲ ਅੱਠ ਗੋਲ ਹੋ ਗਏ ਹਨ। ਉਹ ਹੁਣ ਗੋਲਡਨ ਬੂਟ ਦੀ ਦੌੜ ’ਚ ਸਭ ਤੋਂ ਅੱਗੇ ਹੈ। ਇਸਦੇ ਨਾਲ ਹੀ ਮੈਸੀ ਨੇ ਫੀਫਾ ਵਿਸ਼ਵ ਕੱਪ ਦੇ ਇਤਿਹਾਸ ’ਚ 21 ਗੋਲ ਕੀਤੇ ਹਨ, ਜਿਸ ਨਾਲ ਉਸਦਾ ਆਪਣਾ ਰਿਕਾਰਡ ਹੋਰ ਵੀ ਬਿਹਤਰ ਹੋਇਆ ਹੈ। ਉਹ ਫੀਫਾ ਵਿਸ਼ਵ ਕੱਪ ਵਿੱਚ ਲਗਾਤਾਰ 6 ਨਾਕਆਊਟ ਮੈਚਾਂ ’ਚ ਗੋਲ ਕਰਨ ਵਾਲਾ ਪਹਿਲਾ ਖਿਡਾਰੀ ਹੈ।
ਮੈਸੀ ਨੇ ਪੈਨਲਟੀ ਤੋਂ ਖੁੰਝ ਕੇ ਬਣਾਇਆ ਅਣਚਾਹਿਆ ਰਿਕਾਰਡ
ਲਿਓਨਲ ਮੈਸੀ ਨੇ 2006 ਵਿਚ ਆਪਣਾ ਵਿਸ਼ਵ ਕੱਪ ਡੈਬਿਊ ਕੀਤਾ ਸੀ। ਉਹ 2026 ’ਚ ਆਪਣਾ 6ਵਾਂ ਵਿਸ਼ਵ ਕੱਪ ਖੇਡ ਰਿਹਾ ਹੈ ਤੇ ਇਹ ਪਿਛਲੇ 20 ਸਾਲਾਂ ’ਚ ਚੌਥੀ ਵਾਰ ਹੈ ਜਦੋਂ ਉਹ ਪੈਨਲਟੀ ਤੋਂ ਗੋਲ ਕਰਨ ’ਚ ਅਸਫਲ ਰਿਹਾ ਹੈ। ਉਹ 6 ਵਿਸ਼ਵ ਕੱਪਾਂ ’ਚ ਚਾਰ ਪੈਨਲਟੀ ਖੁੰਝ ਗਿਆ ਹੈ। ਜਿੱਥੇ ਮੈਸੀ ਦੇ ਕੋਲ ਵਿਸ਼ਵ ਕੱਪ ’ਚ ਸਭ ਤੋਂ ਵੱਧ ਗੋਲ ਕਰਨ ਦਾ ਰਿਕਾਰਡ ਹੈ, ਉੱਥੇ ਚਾਰ ਪੈਨਲਟੀ ਖੁੰਝਣ ਦਾ ਅਣਚਾਹੇ ਰਿਕਾਰਡ ਵੀ ਉਸਦੇ ਕਰੀਅਰ ‘ਤੇ ਇਕ ਅਮਿੱਟ ਛਾਪ ਵਜੋਂ ਯਾਦ ਰੱਖਿਆ ਜਾਵੇਗਾ।
