ਅਜੀਤਵਾਲ, 29 ਜੂਨ (ਹਰਦੇਵ ਸਿੰਘ ਮਾਨ)-ਲਾਲਾ ਲਾਜਪਤ ਰਾਏ ਮੈਮੋਰੀਅਲ ਗਰੁੱਪ ਆਫ਼ ਕਾਲਜਿਜ਼ ਅਜੀਤਵਾਲ (ਮੋਗਾ) ਵਿਖੇ ਭਗਤ ਕਬੀਰ ਜੀ ਦੀ ਜਯੰਤੀ ਮਨਾਉਂਦਿਆਂ ਸੰਸਥਾ ਦੇ ਡਾਇਰੈਕਟਰ ਡਾ. ਚਮਨ ਲਾਲ ਸਚਦੇਵਾ ਨੇ ਭਗਤ ਕਬੀਰ ਜੀ ਦੀ ਤਸਵੀਰ ਤੇ ਫ਼ੁੱਲ ਮਾਲਾਵਾਂ ਭੇਟ ਕਰਨ ਉਪਰੰਤ ਵਧਾਈ ਦਿੰਦਿਆਂ ਹੋਇਆ ਕਿਹਾ ਕਿ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਵਿੱਚ ਦਰਜ ਭਗਤ ਕਬੀਰ ਜੀ ਦੀ ਬਾਣੀ ‘ਚੋਂ ਸਾਨੂੰ ਸਮਾਨਤਾ, ਸਾਂਝੀਵਾਲਤਾ, ਪ੍ਰੇਮ, ਅਹਿੰਸਾ ਜਿਹੀਆਂ ਸਿੱਖਿਆਵਾਂ ਮਿਲਦੀਆਂ ਹਨ। ਉਨ੍ਹਾਂ ਕਿਹਾ ਸੀ ਕਿ ਜਦੋਂ ਸਾਰੀ ਸ੍ਰਿਸ਼ਟੀ ਦੇ ਸਿਰਜਨਹਾਰ ਪ੍ਰਮਾਤਮਾ ਦੀ ਕੋਈ ਜਾਤ ਨਹੀਂ ਹੈ ਤਾਂ ਉਨ੍ਹਾਂ ਦੀਆਂ ਆਤਮਾਵਾਂ ਦੀ ਵੀ ਕੋਈ ਜਾਤ, ਭੇਦ-ਭਾਵ ਜਾਂ ਵਖਰੇਵਾਂ ਨਹੀਂ ਹੋਣਾ ਚਾਹੀਦਾ। ਪ੍ਰੋਜੈਕਟ ਇੰਚਾਰਜ ਹਰਮੇਲ ਸਿੰਘ ਨੇ ਉਨ੍ਹਾਂ ਦੇ ਉਪਦੇਸ਼ ਅੱਵਲ ਅੱਲਾ ਨੂਰ ਉਪਾਇਆ ਅੱਜ ਵੀ ਸਮਾਜ ਨੂੰ ਸਾਂਝੀਵਾਲਤਾ ਲਈ ਪ੍ਰੇਰਿਤ ਕਰਦਾ ਹੈ। ਲੈਕਚਰਾਰ ਮਨਮੋਹਨ ਸਿੰਘ ਨੇ ਦੱਸਿਆ ਕਿ ਕਬੀਰ ਜੀ ਨੂੰ ਮਾਪਿਆ ਵਲੋਂ ਕੱਪੜਾ ਵੇਚਣ ਲਈ ਭੇਜਣ ਤੇ ਉਨ੍ਹਾਂ ਲੋੜਵੰਦਾਂ ਨੂੰ ਕੱਪੜਾ ਦਾਨ ਕਰ ਦੇਣਾ, ਜਾਤ-ਪਾਤ ਦੇ ਵਖਰੇਵੇਂ ਵਿਰੁੱਧ ਪੰਜ ਤੱਤ ਦਾ ਪੁਤਲਾ ਕਹਿਣਾ ਅਤੇ ਸਾਰੇ ਰੱਬ ਦੇ ਬਨਾਏ ਮਨੁੱਖ ਇਕ ਸਾਮਾਨ ਹਨ ਬਾਰੇ ਕੀਤਾ ਪ੍ਰਚਾਰ ਉਨ੍ਹਾਂ ਦਾ ਭਗਤੀ ਪ੍ਰਤੀ ਵਿਸ਼ਵਾਸ, ਸਨਮਾਨ ਵਧਾਉਂਦਾ ਹੈ। ਵਿਭਾਗੀ ਮੁਖੀ ਤਰਲੋਚਨ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਸਾਂਝੀਵਾਲਤਾ, ਸਮਾਨਤਾ ਦਾ ਪ੍ਰਚਾਰ ਕਰਨ ਅਤੇ ਵਹਿਮਾਂ-ਭਰਮਾਂ, ਗਲਤ ਰਸਮਾਂ ਰਿਵਾਜ਼ਾਂ ਦੀ ਵਿਰੋਧਤਾ ਕਰਨ ਕਾਰਨ ਉਨ੍ਹਾਂ ਨੂੰ ਕਈ ਤਰ੍ਹਾਂ ਦੇ ਤਸੀਹੇ ਦਿੱਤੇ ਗਏ।
