ਧੂਰੀ, 24 ਜਨਵਰੀ (ਸੰਜੇ ਲਹਿਰੀ) - ਇਸ ਵਾਰ ਬਸੰਤ ਪੰਚਮੀ ਦੇ ਤਿਉਹਾਰ ਮੌਕੇ ਸਵੇਰ ਤੋਂ ਹੀ ਜ਼ਿਲ੍ਹਾ ਸੰਗਰੂਰ ਦੇ ਵੱਖ-ਵੱਖ ਹਿੱਸਿਆਂ ਵਿਚ ਪਈ ਭਾਰੀ ਬਰਸਾਤ ਨੇ ਪਤੰਗਬਾਜ਼ੀ ਦੇ ਸ਼ੁਕੀਨਾ ਦੀਆਂ ਆਸਾਂ 'ਤੇ ਕਾਫ਼ੀ ਹੱਦ ਤੱਕ ਪਾਣੀ ਫੇਰ ਕੇ ਰੱਖ ਦਿੱਤਾ ਅਤੇ ਕਰੋੜਾਂ ਰੁਪਏ ਦੇ ਪਤੰਗ ਤੇ ਡੋਰਾਂ ਖ਼ਰੀਦ ਕੇ ਪਤੰਗਬਾਜ਼ੀ ਕਰਨ ਦੇ ਸ਼ੌਕੀਨ ਸੂਰਜ ਚੜ੍ਹਨ ਦੀਆਂ ਅਰਦਾਸਾਂ ਕਰਦੇ ਰਹੇ ਪ੍ਰੰਤੂ ਦੁਪਹਿਰ ਤੱਕ ਇੰਦਰ ਦੇਵਤਾ ਨੇ ਕਿਸੇ ਦੀ ਇੱਕ ਨਾ ਸੁਣੀ ਅਤੇ ਇਸ ਤਰ੍ਹਾਂ ਕੁਦਰਤ ਅਤੇ ਇੰਦਰ ਦੇਵਤਾ ਦੇ ਸਾਂਝੇ ਅਪਰੇਸ਼ਨ ਸਦਕਾ ਬਸੰਤ ਪੰਚਮੀ ਵਾਲੇ ਦਿਨ ਹਜ਼ਾਰਾਂ ਪਸ਼ੂਆਂ ਅਤੇ ਪਰਿੰਦੇ ਚਾਈਨਾ ਡੋਰ ਦੀ ਲਪੇਟ ਵਿਚ ਆਉਣੋ ਬਚ ਗਏ ਭਾਵੇਂ ਕਰਫ਼ਿਊ ਵਿਚ ਦਿੱਤੀ ਢਿੱਲ ਵਾਂਗ ਕੁਦਰਤ ਨੇ ਪਤੰਗਬਾਜਾਂ ਨੂੰ ਵੀ ਦੁਪਹਿਰ ਬਾਅਦ ਪਤੰਗਬਾਜ਼ੀ ਦਾ ਸ਼ੌਕ ਪੂਰਾ ਕਰਨ ਦਾ ਮੌਕਾ ਦਿੱਤਾ ਪਰੰਤੂ ਭਾਰੀ ਬਰਸਾਤ ਕਾਰਨ ਪਸ਼ੂ ਬਾਹਰ ਸੜਕਾਂ 'ਤੇ ਨਹੀਂ ਨਿਕਲੇ ਅਤੇ ਪਰਿੰਦੇ ਆਲ੍ਹਣਿਆਂ ਵਿਚ ਹੀ ਟਿਕੇ ਰਹੇ ਜਿਸ ਦੇ ਚੱਲਦੇ ਕੁਦਰਤ ਨੇ ਆਪਣੇ ਤਰੀਕੇ ਨਾਲ ਪਸ਼ੂ ਪੰਛੀਆਂ ਦੀ ਰਾਖੀ ਕੀਤੀ | ਲੋਕਾਂ ਵਿਚ ਅੱਜ ਇਸ ਗੱਲ ਦੀ ਚਰਚਾ ਵੀ ਰਹੀ ਕਿ ਚਾਈਨਾ ਡੋਰ ਦੀ ਨਾਜਾਇਜ਼ ਵਰਤੋਂ ਦੇ ਕਾਰਨ ਪਤੰਗਬਾਜ਼ੀ ਦੌਰਾਨ ਅਨੇਕਾਂ ਪਸ਼ੂ ਪੰਛੀ ਅਤੇ ਬੇਕਸੂਰ ਲੋਕ ਚਾਈਨਾ ਡੋਰ ਦੇ ਕਹਿਰ ਦਾ ਸ਼ਿਕਾਰ ਹੋ ਜਾਂਦੇ ਸਨ ਅਤੇ ਪੁਲਿਸ ਪ੍ਰਸ਼ਾਸਨ ਅਤੇ ਅਦਾਲਤਾਂ ਦੀਆਂ ਪਾਬੰਦੀਆਂ ਦੇ ਬਾਵਜੂਦ ਵੀ ਲੋਕਾਂ ਵਿਚ ਇਹ ਰੁਝਾਨ ਲਗਾਤਾਰ ਵਧਦਾ ਹੀ ਜਾ ਰਿਹਾ ਸੀ ਜੋ ਸ਼ਾਇਦ ਕੁਦਰਤ ਨੂੰ ਮਨਜ਼ੂਰ ਨਹੀਂ ਸੀ |
