ਮੂਨਕ, 31 ਜਨਵਰੀ (ਪ੍ਰਵੀਨ ਮਦਾਨ, ਕੇਵਲ ਸਿੰਗਲਾ) - ਵਾਤਾਵਰਣ, ਜੰਗਲ ਅਤੇ ਜਲਵਾਯੂ ਪਰਿਵਰਤਨ ਮੰਤਰਾਲਾ, ਭਾਰਤ ਸਰਕਾਰ ਦੀ ਵਾਤਾਵਰਣੀ ਸਿੱਖਿਆ ਕਾਰਜ-ਕਰਮ ਦੀਆਂ ਹਦਾਇਤਾਂ ਅਤੇ ਪੰਜਾਬ ਰਾਜ ਵਿਗਿਆਨ ਅਤੇ ਤਕਨਾਲੋਜੀ ਕੌਂਸਲ ਦੇ ਤਹਿਤ, ਡੀ.ਏ.ਵੀ. ਸਕੂਲ ਵਿਚ ਜਮਾਤ ਨੌਵੀਂ ਦੇ ਵਿਦਿਆਰਥੀਆਂ ਲਈ ਅਪ ਸਾਈਕਲਡ ਕਰਾਫ਼ਟ ਗਤੀਵਿਧੀ ਦਾ ਆਯੋਜਨ ਕੀਤਾ ਗਿਆ | ਵਿਦਿਆਰਥੀਆਂ ਨੂੰ ਪੁਰਾਣੀ ਅਤੇ ਦੁਬਾਰਾ ਵਰਤੋਂ ਯੋਗ ਸਮਗਰੀ ਜਿਵੇਂ ਕਿ ਗਲਾਸ, ਧਾਗੇ, ਗੂੰਦ, ਲੱਕੜੀ ਦੀਆਂ ਛੜੀਆਂ, ਮਿੱਟੀ, ਕਾਗ਼ਜ਼ ਅਤੇ ਹੋਰ ਬੇਕਾਰ ਸਮਾਨ ਮੁਹੱਈਆ ਕਰਵਾਇਆ ਗਿਆ | ਸਕੂਲ ਦੇ ਈਕੋ ਕਲੱਬ ਦੇ ਕੋਆਰਡੀਨੇਟਰ ਵਿਸ਼ਾਲ ਸ਼ਰਮਾ ਦੀ ਅਗਵਾਈ ਹੇਠ ਵਿਦਿਆਰਥੀਆਂ ਨੇ ਫੁੱਲਦਾਨ, ਪੈੱਨ ਸਟੈਂਡ, ਦੀਵਾਰ ਸਜਾਵਟਾਂ ਅਤੇ ਸਜਾਵਟੀ ਨਮੂਨੇ ਵਰਗੀਆਂ ਕਈ ਉਪਯੋਗੀ ਅਤੇ ਸਜਾਵਟੀ ਵਸਤਾਂ ਤਿਆਰ ਕੀਤੀਆਂ | ਵਿਦਿਆਰਥੀਆਂ ਨੇ ਬੇਕਾਰ ਸਮਗਰੀ ਨੂੰ ਸੁੰਦਰ ਕਲਾਕਿ੍ਤੀਆਂ ਵਿਚ ਬਦਲਦੇ ਹੋਏ ਬਿਹਤਰੀਨ ਕਲਪਨਾ ਅਤੇ ਰਚਨਾਤਮਿਕਤਾ ਦਾ ਪ੍ਰਦਰਸ਼ਨ ਕੀਤਾ | ਇਸ ਗਤੀਵਿਧੀ ਨਾਲ 'ਇਨ੍ਹਾਂ ਚੀਜ਼ਾਂ ਦੀ ਵਰਤੋਂ ਘਟਾਓ, ਦੁਬਾਰਾ ਵਰਤੋਂ ਕਰੋ ਅਤੇ ਰੀਸਾਈਕਲ ਕਰੋ' ਦੇ ਅਸੂਲਾਂ ਬਾਰੇ ਜਾਗਰੂਕਤਾ ਵਧੀ ਅਤੇ ਵਿਦਿਆਰਥੀਆਂ ਨੂੰ ਇਹ ਸਮਝ ਆਈ ਕਿ ਛੋਟੇ ਯਤਨ ਵੀ ਵਾਤਾਵਰਣ ਸੰਰੱਖਣ ਵਿਚ ਵੱਡਾ ਯੋਗਦਾਨ ਪਾ ਸਕਦੇ ਹਨ | ਸਾਰੇ ਭਾਗੀਦਾਰਾਂ ਨੇ ਇਸ ਗਤੀਵਿਧੀ ਦਾ ਪੂਰਾ ਆਨੰਦ ਲਿਆ ਅਤੇ ਟਿਕਾਊ ਵਿਕਾਸ ਸੰਬੰਧੀ ਮਹੱਤਵਪੂਰਨ ਸਿੱਖਿਆ ਪ੍ਰਾਪਤ ਕੀਤੀ | ਸਕੂਲ ਦੇ ਪਿ੍ੰਸੀਪਲ ਸੰਜੀਵ ਕੁਮਾਰ ਸ਼ਰਮਾ ਨੇ ਵਿਦਿਆਰਥੀਆਂ ਦੀ ਸਰਾਹਨਾ ਕੀਤੀ ਅਤੇ ਭਾਗੀਦਾਰਾਂ ਵਲੋਂ ਦਿਖਾਈ ਗਈ ਰਚਨਾਤਮਿਕਤਾ ਅਤੇ ਉਤਸ਼ਾਹ ਦੀ ਪ੍ਰਸ਼ੰਸਾ ਕੀਤੀ |
