ਸੁਨਾਮ ਊਧਮ ਸਿੰਘ ਵਾਲਾ, 28 ਅਪ੍ਰੈਲ (ਸਰਬਜੀਤ ਸਿੰਘ ਧਾਲੀਵਾਲ, ਹਰਚੰਦ ਸਿੰਘ ਭੁੱਲਰ) - ਸੁਨਾਮ ਦੀ ਮਾਣਯੋਗ ਅਦਾਲਤ ਨੇ ਤਿੰਨ ਵਿਅਕਤੀਆਂ 'ਤੇ ਦੇਸੀ ਕਾਸਾ (ਘਰ ਦੀ ਕੱਢੀ) ਸ਼ਰਾਬ ਨੂੰ ਮਹਿੰਗੇ ਅੰਗਰੇਜ਼ੀ ਬਰਾਂਡਾ ਤੇ ਠੇਕਾ ਦੇਸੀ ਸ਼ਰਾਬ ਦੀਆ 1224 ਬੋਤਲਾ ਵਿੱਚ ਭਰ ਕੇ ਵੇਚਣ ਦੇ ਲੱਗੇ ਦੋਸਾਂ ਦੇ ਮਾਮਲੇ ਦੀ ਸੁਣਵਾਈ ਕਰਦਿਆ ਉਕਤ ਤਿੰਨੋ ਵਿਅਕਤੀਆਂ ਨੂੰ ਬਚਾਅ ਪੱਖ ਦੇ ਵਕੀਲ ਦੀਆਂ ਦਲੀਲਾਂ ਨਾਲ ਸਹਿਮਤ ਹੰੁਦਿਆਂ ਬਾਇੱਜ਼ਤ ਬਰੀ ਕਰ ਦਿੱਤਾ ਹੈ | ਬਚਾਅ ਪੱਖ ਦੇ ਸੀਨੀਅਰ ਵਕੀਲ ਕੇਵਲ ਸਿੰਘ ਦੁੱਲਟ ਨੇ ਦੱਸਿਆ ਕਿ 2017 ਵਿੱਚ ਥਾਣਾ ਚੀਮਾ ਵੱਲੋਂ ਦਿਆਲਗੜ੍ਹ ਦੇ ਸਰਪੰਚ ਪਿ੍ਤਪਾਲ ਸਿੰਘ ਦੇ ਘਰੋਂ ਬਹੁਤ ਵੱਡੀ ਸ਼ਰਾਬ ਦੀ ਬਹੁਤ ਵੱਡੀ ਖੇਪ ਦੀ ਬਰਾਮਦੀ ਕਰਨ ਦਾ ਦਾਅਵਾ ਕਰਦਿਆ ਤਕਰੀਬਨ 94 ਡੱਬੇ ਅੰਗਰੇਜ਼ੀ ਸ਼ਰਾਬ ਅਤੇ 8 ਡੱਬੇ ਠੇਕਾ ਦੇਸੀ ਸ਼ਰਾਬ ਦੀਆਂ 1224 ਬੋਤਲਾਂ ਫੜੀਆ ਦਿਖਾਈਆਂ ਗਈਆ | ਇਸ ਮਾਮਲੇ 'ਚ ਸਰਪੰਚ ਸਮੇਤ ਦੋ ਵਿਅਕਤੀਆਂ ਨੂੰ ਨਾਮਜ਼ਦ ਕਰ ਕੇ ਧੋਖਾਧੜੀ ਸਮੇਤ ਹੋਰ ਵੱਖ ਵੱਖ ਧਰਾਂਵਾ ਤਹਿਤ ਮਾਮਲਾ ਦਰਜ ਕੀਤਾ ਗਿਆ ਕਿ ਉਕਤ ਵਿਅਕਤੀ ਘਰ ਦੀ ਕਾਸਾ ਸ਼ਰਾਬ ਨੂੰ ਅੰਗਰੇਜ਼ੀ ਸ਼ਰਾਬ ਦੇ ਮਹਿੰਗੇ ਬ੍ਰਾਂਡਾਂ ਵਿੱਚ ਭਰ ਕੇ ਅਤੇ ਸਰਕਾਰੀ ਹੋਲੋਗਰਾਮ ਲਗਾ ਕੇ ਵੇਚਦੇ ਹਨ | ਪਰ ਪੁਲਿਸ ਮਾਣਯੋਗ ਅਦਾਲਤ ਵਿੱਚ ਆਪਣੇ ਪੱਖ ਦੇ ਸਬੂਤ ਨਾ ਪੇਸ਼ ਕਰ ਸਕੀ | ਮਾਣਯੋਗ ਜੱਜ ਸ੍ਰੀਮਤੀ ਕੁਲਵਿੰਦਰ ਕੌਰ ਜੁਡੀਸ਼ੀਅਲ ਮੈਜਿਸਟਰੈਟ ਨੇ ਬਚਾਅ ਪੱਖ ਦੇ ਵਕੀਲ ਕੇਵਲ ਸਿੰਘ ਦੁੱਲਟ ਦੀਆ ਦਲੀਲਾਂ ਨਾਲ ਸਹਿਮਤ ਹੁੰਦਿਆਂ ਨੂੰ ਮੁਲਜ਼ਮ ਪਿ੍ਤਪਾਲ ਸਿੰਘ ਵਗ਼ੈਰਾ ਨੂੰ ਬਾਇੱਜ਼ਤ ਬਰੀ ਕਰ ਦਿੱਤਾ ਹੈ |
