ਅਮਰਗੜ੍ਹ 29 ਜੂਨ (ਪਵਿੱਤਰ ਸਿੰਘ, ਜਤਿੰਦਰ ਮੰਨਵੀ) - ਆਮ ਆਦਮੀ ਪਾਰਟੀ ਦੀ ਸੂਬਾ ਸਰਕਾਰ ਵੱਲੋਂ ਪਿੰਡਾਂ ਦੇ ਸਰਪੰਚਾਂ ਨੂੰ ਦਸ-ਦਸ ਹਜ਼ਾਰ ਰੁਪਏ ਪ੍ਰਤੀ ਮਹੀਨਾ ਮਾਣ ਭੱਤਾ ਦੇਣ ਦਾ ਸਲਾਘਾਯੋਗ ਫੈਸਲਾ ਕੀਤਾ ਗਿਆ ਹੈ ਪ੍ਰੰਤੂ ਪੰਜਾਬ ਸਰਕਾਰ ਵੱਲੋਂ ਨੰਬਰਦਾਰਾਂ ਦੀਆਂ ਲੰਬੇ ਸਮੇਂ ਤੋਂ ਲਟਕਦੀਆਂ ਮੰਗਾਂ ਵੱਲ ਕੋਈ ਧਿਆਨ ਨਹੀਂ ਦਿੱਤਾ ਜਾ ਰਿਹਾ। ਉਪਰੋਕਤ ਵਿਚਾਰਾਂ ਦਾ ਪ੍ਰਗਟਾਵਾ ਪੰਜਾਬ ਨੰਬਰਦਾਰ ਯੂਨੀਅਨ ਤਹਿਸੀਲ ਅਮਰਗੜ੍ਹ ਦੇ ਪ੍ਰਧਾਨ ਮਲਕੀਤ ਸਿੰਘ ਸਲੇਮਪੁਰ ਨੇ ਅਜੀਤ ਨਾਲ ਖਾਸ ਮੁਲਾਕਾਤ ਦੌਰਾਨ ਕੀਤਾ। ਉਹਨਾਂ ਕਿਹਾ ਕਿ ਸੂਬਾ ਸਰਕਾਰ ਨੂੰ ਸਭ ਤੋਂ ਆਮਦਨ ਦੇਣ ਵਾਲੇ ਮਾਲ ਵਿਭਾਗ ਦੀ ਪਹਿਲੀ ਪੌੜੀ ਵਜੋਂ ਕੰਮ ਕਰਨ ਵਾਲੇ ਨੰਬਰਦਾਰ ਪ੍ਰਸ਼ਾਸਨ ਅਤੇ ਲੋਕਾਂ ਦੇ ਤਾਲਮੇਲ ਵਿਚਕਾਰ ਅਹਿਮ ਰੋਲ ਅਦਾ ਕਰਦੇ ਹਨ ਇਸ ਲਈ ਪੰਜਾਬ ਸਰਕਾਰ ਨੂੰ ਚਾਹੀਦਾ ਹੈ ਕਿ ਜਲਦੀ ਹੀ ਮੰਤਰੀ ਮੰਡਲ ਦੀ ਬੈਠਕ ਬੁਲਾ ਕੇ ਸਰਪੰਚਾਂ ਦੀ ਤਰ੍ਹਾਂ ਨੰਬਰਦਾਰਾਂ ਨੂੰ ਵੀ ਦਸ-ਦਸ ਹਜ਼ਾਰ ਰੁਪਏ ਪ੍ਰਤੀ ਮਹੀਨਾ ਮਾਣ ਭੱਤਾ ਦੇਣ ਦਾ ਐਲਾਨ ਜਲਦੀ ਕਰਕੇ ਸਾਡਾ ਵੀ ਮਾਣ ਵਧਾਵੇ। ਇਸ ਮੌਕੇ ਖਜ਼ਨਚੀ ਭਰਪੂਰ ਸਿੰਘ ਅਲੀਪੁਰ, ਗੁਰਪ੍ਰੀਤ ਸਿੰਘ ਝੱਲ, ਪਰਮਜੀਤ ਸਿੰਘ ਅਮਰਗੜ੍ਹ,ਗੁਰਮੀਤ ਸਿੰਘ ਗੀਗਾ ਮਾਜਰਾ, ਨਵਤੇਜ ਸਿੰਘ ਝੱਲ, ਜਮੀਲ ਮੁਹੰਮਦ ਮੁਹੰਮਦਪੁਰਾ, ਸੁਰਿੰਦਰ ਸਿੰਘ, ਰਣਜੀਤ ਸਿੰਘ ਅਲੀਪੁਰ, ਰੁਪਿੰਦਰ ਸਿੰਘ ਭੂਮਸੀ ਅਤੇ ਹਰਜਿੰਦਰ ਸਿੰਘ ਚੌਂਦਾ ਆਦੀ ਨੰਬਰਦਾਰ ਹਾਜ਼ਰ ਸਨ।
