146 ਹੈਲਥ ਵਰਕਰਾਂ ਨੂੰ ਜਲਦੀ ਆਰਡਰ ਦਿੱਤੇ ਜਾਣ -ਪੰਜਗਰਾਈਆਂ
ਅਜੀਤ ਡੈਸਕ
23-07-2026
ਸ਼ੇਰਪੁਰ, 22 ਜੁਲਾਈ (ਮੇਘ ਰਾਜ ਜੋਸ਼ੀ) - ਮਲਟੀਪਰਪਜ ਹੈਲਥ ਇੰਪਲਾਈਜ਼ ਯੂਨੀਅਨ ਪੰਜਾਬ ਦੇ ਸਟੇਟ ਪ੍ਰੈਸ ਸਕੱਤਰ ਅਤੇ ਬਲਾਕ ਫਤਹਿਗੜ੍ਹ ਪੰਜਗਰਾਈਆਂ ਦੇ ਪ੍ਰਧਾਨ ਰਾਜੇਸ਼ ਰਿਖੀ ਪੰਜਗਰਾਈਆਂ ਨੇ ਸੂਬਾ ਸਰਕਾਰ ਤੋਂ ਮੰਗ ਕਰਦਿਆਂ ਕਿਹਾ ਕੇ ਪਿਛਲੇ ਸਮੇਂ ਵਿੱਚ 270 ਮਪਹਵ ਮੇਲ ਦੀ ਭਰਤੀ ਦੇ ਵਿੱਚੋਂ 146 ਉਮੀਦਵਾਰਾਂ ਨੂੰ ਅਜੇ ਵੀ ਆਰਡਰ ਦੇਣੇ ਬਾਕੀ ਹਨ ਅਤੇ ਇਹ ਉਮੀਦਵਾਰ ਸਰਕਾਰ ਵੱਲ ਦੇਖ ਰਹੇ ਹਨ, ਉਹਨਾਂ ਕਿਹਾ ਕੇ ਇਹਨਾਂ ਉਮੀਦਵਾਰਾਂ ਨੂੰ ਜਲਦੀ ਆਰਡਰ ਦਿੱਤੇ ਜਾਣ ਤਾਂ ਜੋ ਖਾਲੀ ਪਏ ਸਟੇਸ਼ਨ ਭਰੇ ਜਾਣ ਅਤੇ ਚੱਲ ਰਹੇ ਡੇਂਗੂ ਦੇ ਸੀਜਨ ਵਿੱਚ ਲੋਕਾਂ ਨੂੰ ਬਿਮਾਰੀਆਂ ਤੋਂ ਬਚਾਇਆ ਜਾ ਸਕੇ। ਉਹਨਾਂ ਕਿਹਾ ਕਿ ਮਪਹਵ ਮੇਲ, ਫੀਮੇਲ ਸਿਹਤ ਵਿਭਾਗ ਦੀ ਉਹ ਅਹਿਮ ਕੜੀ ਹਨ ਜਿਹਨਾਂ ਦਾ ਸੰਬੰਧ ਸਿੱਧਾ ਲੋਕਾਂ ਨਾਲ ਹੈ ਅਤੇ ਇਹ ਸਿਹਤ ਕਾਮੇ ਹੀ ਸਿਹਤ ਵਿਭਾਗ ਦੀਆਂ ਸਕੀਮਾਂ ਨੂੰ ਜ਼ਮੀਨੀ ਪੱਧਰ ਤੇ ਲੋਕਾਂ ਤੱਕ ਪੁੱਜਦਾ ਕਰਦੇ ਹਨ, ਉਹਨਾਂ ਕਿਹਾ ਕਿ ਇਸ ਭਰਤੀ ਨੂੰ ਪੂਰਾ ਕਰਦੇ ਹੋਏ ਮਪਹਵ ਮੇਲ ਫੀਮੇਲ ਦੀਆਂ ਹੋਰ ਅਸਾਮੀਆਂ ਵੀ ਕੱਢੀਆਂ ਜਾਣ ਤੋਂ ਜੋ ਸਿਹਤ ਵਿਭਾਗ ਦੇ ਹਰ ਨੈਸ਼ਨਲ ਪ੍ਰੋਗਰਾਮ ਸਫ਼ਲ ਹੋ ਸਕਣ।
