ਝੁਨੀਰ, 5 ਫਰਵਰੀ (ਸੰਜੀਵ ਸਿੰਗਲਾ)- ਹਲਕਾ ਸਰਦੂਲਗੜ੍ਹ ਦੇ ਕਸਬਾ ਝੁਨੀਰ ਅਤੇ ਨਾਲ ਦੇ ਪਿੰਡਾਂ 'ਚ ਮਿਲਾਵਟੀ ਦੁੱਧ ਦਾ ਕਾਰੋਬਾਰ ਵੱਧ ਰਿਹਾ ਹੈ | ਬਿਨਾਂ ਸ਼ੱਕ ਦੁੱਧ ਮਨੁੱਖੀ ਸਿਹਤ ਲਈ ਸੰਪੂਰਨ ਖ਼ੁਰਾਕ ਹੈ, ਨੂੰ ਸਿੱਧੇ ਤੌਰ 'ਤੇ ਇਸਤੇਮਾਲ ਕਰਨ ਤੋਂ ਇਲਾਵਾ ਦਹੀਂ, ਲੱਸੀ, ਪਨੀਰ, ਘਿਉ ਆਦਿ ਦੇ ਰੂਪ 'ਚ ਵੀ ਵਰਤਿਆ ਜਾਂਦਾ ਹੈ | ਇਸ 'ਚ ਮਿਲਾਵਟ ਦਾ ਧੰਦਾ ਵੀ ਆਮ ਜਿਹੀ ਗੱਲ ਬਣ ਗਈ ਹੈ | ਲੋਕਾਂ 'ਚ ਜਾਗਰੂਕਤਾ ਦੇ ਬਾਵਜੂਦ ਇਹ ਧੰਦਾ ਬੇਰੋਕ ਜਾਰੀ ਹੈ | ਦੁੱਧ 'ਚ ਪਾਣੀ ਮਿਲਾਉਣਾ ਤਾਂ ਬਹੁਤ ਸਮੇਂ ਤੋਂ ਪ੍ਰਚੱਲਿਤ ਹੈ | ਇਸ ਨਾਲ ਖ਼ਰੀਦਦਾਰ ਨੂੰ ਘਾਟਾ ਜ਼ਰੂਰ ਪੈਂਦਾ ਹੈ, ਪਰ ਇਹ ਸਿਹਤ ਲਈ ਬਹੁਤਾ ਨੁਕਸਦਾਰ ਨਹੀਂ | ਦੁੱਖ ਦੀ ਗੱਲ ਇਹ ਹੈ ਕਿ ਜਦੋਂ ਇਸ 'ਚ ਕਈ ਤਰ੍ਹਾਂ ਦੇ ਜ਼ਹਿਰੀਲੇ ਰਸਾਇਣ ਮਿਲਾ ਦਿੱਤੇ ਜਾਂਦੇ ਹਨ, ਤਾਂ ਇਹ ਮਨੁੱਖਤਾ ਲਈ ਅੰਮਿ੍ਤ ਦੀ ਥਾਂ ਜ਼ਹਿਰ ਬਣ ਜਾਂਦਾ ਹੈ | ਬਹੁਤ ਸਾਰੇ ਵਪਾਰੀ ਦੁੱਧ ਨੂੰ ਤਾਜ਼ਾ ਰੱਖਣ ਲਈ ਕਈ ਤਰ੍ਹਾਂ ਦੇ ਰਸਾਇਣ ਦੁੱਧ 'ਚ ਮਿਲਾ ਦਿੰਦੇ ਹਨ | ਸਵੇਰ ਦਾ ਦੁੱਧ ਸ਼ਾਮ ਨੂੰ ਅਤੇ ਸ਼ਾਮ ਦਾ ਸਵੇਰੇ ਨੂੰ ਲਿਆਉਣ ਵਾਸਤੇ ਇਨ੍ਹਾਂ ਰਸਾਇਣਾਂ ਦੀ ਵਰਤੋਂ ਕੀਤੀ ਜਾਂਦੀ ਹੈ | ਇਹ ਮਨੁੱਖਤਾ ਨਾਲ ਅਨਿਆਂ ਅਤੇ ਭਾਰੀ ਜੁਰਮ ਹੈ | ਦੁੱਧ ਦੀ ਕੁਆਲਿਟੀ ਵਧਾਉਣ ਲਈ ਇਸ 'ਚ ਆਮ ਤੌਰ ਤੇ ਫਾਰਮਲੀਨ, ਹਾਈਡਰੋਜਨ ਆਕਸਾਇਡ ਬੋਰੈਕਸ, ਕਾਸਟਿਕ ਸੋਡਾ ਆਦਿ ਤੱਕ ਦੀ ਮਿਲਾਵਟ ਕਰ ਦਿੱਤੀ ਜਾਂਦੀ ਹੈ | ਇਨ੍ਹਾਂ ਰਸਾਇਣਾਂ ਦੀ ਵਰਤੋਂ ਪੇਟ ਦੀਆਂ ਬਿਮਾਰੀਆਂ,ਲਿਵਰ ਦੀ ਖ਼ਰਾਬੀ ਅਤੇ ਕੈਂਸਰ ਵਰਗੇ ਰੋਗਾਂ ਨੂੰ ਜਨਮ ਦਿੰਦੀ ਹੈ | ਛੋਟੇ-ਵੱਡੇ ਠੇਕੇਦਾਰ ਅਤੇ ਵਪਾਰੀ ਆਪਣੇ ਵਪਾਰਕ ਹਿਤਾਂ ਨੂੰ ਵਧਾਉਣ ਲਈ ਦੁੱਧ 'ਚ ਕ੍ਰੀਮ-ਪਾਣੀ ਮਿਲਾ ਦਿੰਦੇ ਹਨ, ਜਿਸ ਨਾਲ ਦੁੱਧ ਦੀ ਫੈਟ ਮਾਤਰਾ ਵਧ ਜਾਂਦੀ ਹੈ | ਦੁੱਧ 'ਚ ਥੰਧਿਆਈ ਵਧਾਉਣ ਲਈ ਹਾਨੀਕਾਰਕ ਪਦਾਰਥ ਗੁਲੂਕੋਸ (ਤਰਲ ਗੁਲੂਕੋਸ) ਮਿਲਾ ਦਿੱਤਾ ਜਾਂਦਾ ਹੈ, ਜਿਸ ਨਾਲ ਅੰਤੜੀਆਂ ਅਤੇ ਮਿਹਦੇ 'ਚ ਜ਼ਖਮ ਹੋ ਸਕਦੇ ਹਨ | ਦੁੱਧ ਨੂੰ ਗਾੜ੍ਹਾ ਕਰਨ ਲਈ ਦੁੱਧ 'ਚ ਬਨਸਪਤੀ, ਚਰਬੀ ਜਾਂ ਰਿਫਾਇੰਡ ਤੇਲ ਧਾਰਾ ਪਾਉਣ ਸਮੇਤ ਸਰਫ਼ ਦਾ ਪਾਣੀ ਪਾਉਣ ਦੀਆਂ ਖ਼ਬਰਾਂ ਵੀ ਆ ਰਹੀਆਂ ਹਨ |