ਦੋਰਾਹਾ, 24 ਮਈ (ਪੱਤਰ ਪ੍ਰੇਰਕ)-ਜੰਗਲਾਤ ਵਰਕਰਜ਼ ਯੂਨੀਅਨ ਪੰਜਾਬ ਜ਼ਿਲ੍ਹਾ ਪ੍ਰਧਾਨ ਰਵੀ ਕੁਮਾਰ ਦੀ ਪ੍ਰਧਾਨਗੀ ਹੇਠ ਵਣ ਮੰਡਲ ਅਫ਼ਸਰ ਲੁਧਿਆਣਾ ਦੇ ਵਿਰੁੱਧ ਧਰਨਾ 10ਵੇਂ ਦਿਨ ਵੀ ਜਾਰੀ ਹੈ | ਜ਼ਿਲ੍ਹਾ ਪ੍ਰਧਾਨ ਵੱਲੋ ਲਿਖਤੀ ਪ੍ਰੈੱਸ ਬਿਆਨ ਜਾਰੀ ਕਰਦਿਆਂ ਕਿਹਾ ਕਿ ਜੰਗਲਾਤ ਵਿਭਾਗ ਦੇ ਕਿਰਤੀ ਕਾਮਿਆਂ ਨਾਲ ਪੰਜਾਬ ਦੀ ਆਮ ਆਦਮੀ ਪਾਰਟੀ ਦੀ ਸਰਕਾਰ ਪੂਰਾ ਧੱਕਾ ਕਰ ਰਹੀ ਹੈ | ਵਿਭਾਗ ਵਿੱਚ ਕੰਮ ਕਰਦੇ ਕਾਮਿਆਂ ਨੂੰ ਫਰਵਰੀ, ਮਾਰਚ ਮਹੀਨੇ ਦੀ ਤਨਖ਼ਾਹ ਵੀ ਹੁਣ ਤੱਕ ਨਸੀਬ ਨਹੀਂ ਹੋਈ | ਵਿਭਾਗ ਵੱਲੋਂ ਸੀਨੀਅਰ 519 ਕਾਮਿਆਂ ਨੂੰ ਇਸ ਪਾਲਿਸੀ ਦੇ ਲਾਭ ਤੋਂ ਵਾਂਝਾ ਕੀਤਾ ਗਿਆ ਹੈ | ਵਿਭਾਗ ਦੇ ਡੇਲੀਵੇਜ ਕਾਮਿਆਂ ਦੀ ਸੂਚੀ ਨੂੰ 16-05-2023 ਤੋਂ ਬਾਅਦ ਅੱਪਡੇਟ ਨਹੀਂ ਕੀਤਾ ਗਿਆ, ਸਰਕਾਰ ਲੋਕਾਂ ਦੇ ਪੱਖ ਦੀ ਗੱਲ ਕਰਨ ਦੀ ਬਜਾਏ ਕਾਰਪੋਰੇਟ ਘਰਾਣਿਆਂ ਦੇ ਪੱਖ ਦੀ ਗੱਲ ਕਰ ਰਹੇ ਹਨ | ਵਰਕਰਾਂ ਨੂੰ ਪੱਕੇ ਕਰਨ ਦੀ ਬਜਾਏ ਸਪੈਸ਼ਲ ਕੇਡਰ (ਪਲੈਸਮੇੰਟ ਆਫ ਟੇਨੋਰ) ਸਿਰਫ਼ 58 ਸਾਲ ਤੱਕ ਕੰਮ ਤੇ ਰੱਖੇ ਜਾਣ ਦੇ ਲਾਭ ਤੋਂ ਇਲਾਵਾ ਹੋਰ ਕੋਈ ਵੀ ਰੈਗੂਲਰ ਮੁਲਾਜ਼ਮਾਂ ਵਾਲੇ ਭੱਤੇ ਅਤੇ ਲਾਭ ਨਹੀਂ ਦਿੱਤੇ ਜਾ ਰਹੇ | ਜੇਕਰ ਇਸ ਸਰਕਾਰ ਵੱਲੋਂ ਸਾਡੇ ਕਾਮਿਆਂ ਨੂੰ ਸੀ ਆਰ ਐਸ ਦੇ ਰੂਲਾਂ ਅਨੁਸਾਰ ਰੈਗੂਲਰ ਕਰਕੇ ਸਾਰੇ ਲਾਭ ਦੇ ਕੇ ਪੱਕਾ ਨਾ ਕੀਤਾ ਤਾਂ ਇਹ ਲੋਕ 2027 ਵਿੱਚ ਇਸ ਆਮ ਆਦਮੀ ਪਾਰਟੀ ਦਾ ਅਸਲੀ ਚਿਹਰਾ ਲੋਕਾਂ ਦੇ ਸਾਹਮਣੇ ਨੰਗਾ ਕਰਨਗੇ | ਇਸ ਮੌਕੇ ਜ਼ਿਲ੍ਹਾ ਪ੍ਰਧਾਨ ਰਵੀ ਕੁਮਾਰ, ਚੇਅਰਮੈਨ ਹਜਾਰਾ ਸਿੰਘ, ਜਰਨਲ ਸਕੱਤਰ ਰਛਪਾਲ ਸਿੰਘ ਲੋਹਗੜ੍ਹ, ਰੇਂਜ ਪ੍ਰਧਾਨ ਸਮਰਾਲਾ ਵਿਜੇ ਕੁਮਾਰ, ਰੇਂਜ ਪ੍ਰਧਾਨ ਦੋਰਾਹਾ ਬਲਵਿਦੰਰ ਸਿੰਘ ਚੀਮਾ, ਰੇਂਜ ਪ੍ਰਧਾਨ ਮੱਤੇਵਾੜਾ ਵੰਤ ਕੁਮਾਰ, ਰੇਂਜ ਪ੍ਰਧਾਨ ਸੁਰਜੀਤ ਸਿੰਘ ਜਗਰਾਉਂ, ਮਨਪ੍ਰੀਤ ਸਿੰਘ, ਨਰਿੰਦਰ ਸਿੰਘ, ਹਰਵਿੰਦਰ ਸਿੰਘ ਬਲਜੀਤ ਸਿੰਘ ਹਾਜ਼ਰ ਸਨ |
