ਖੰਨਾ, 11 ਜੂਨ (ਹਰਜਿੰਦਰ ਸਿੰਘ ਲਾਲ)-ਅੱਜ ਤੜਕੇ ਸਵੇਰੇ ਖੰਨਾ ਖ਼ੁਰਦ ਵਿੱਚ ਤੇਜ਼ ਹਨੇਰੀ ਅਤੇ ਇਸ ਨਾਲ ਡਿੱਗੀ ਬਿਜਲੀ ਨੇ ਡਰ ਦਾ ਮਾਹੌਲ ਬਣਾ ਦਿੱਤਾ | ਖੰਨਾ ਖ਼ੁਰਦ ਖੇਤਰ 'ਚ ਇੱਕ ਵੱਡਾ, ਲਗਭਗ 150 ਸਾਲ ਪੁਰਾਣਾ ਦਰੱਖ਼ਤ ਟੁੱਟ ਕੇ ਕਈ ਘਰਾਂ 'ਤੇ ਡਿੱਗ ਪਿਆ | ਛੱਤਾਂ ਅਤੇ ਕੰਧਾਂ ਨੂੰ ਹੋਏ ਨੁਕਸਾਨ ਨਾਲ ਘਰਾਂ ਨੂੰ ਨੁਕਸਾਨ ਪਹੁੰਚਿਆ, ਪਰ ਖ਼ੁਸ਼ਕਿਸਮਤੀ ਨਾਲ, ਕੋਈ ਜਾਨੀ ਨੁਕਸਾਨ ਨਹੀਂ ਹੋਇਆ | ਤੜਕੇ ਸਵੇਰੇ 4:30 ਵਜੇ ਦੇ ਕਰੀਬ ਤੇਜ਼ ਹਵਾਵਾਂ ਦੇ ਨਾਲ ਗਰਜ ਸ਼ੁਰੂ ਹੋਈ | ਬਿਜਲੀ ਡਿੱਗਣ ਅਤੇ ਝੱਖੜ ਕਾਰਨ ਇਹ ਦਰੱਖਤ ਜੜ੍ਹੋਂ ਉੱਖੜ ਗਿਆ ਅਤੇ ਨੇੜਲੇ ਘਰਾਂ 'ਤੇ ਡਿੱਗ ਪਿਆ | ਦਰਖ਼ਤ ਡਿੱਗਣ ਦੀ ਉੱਚੀ ਆਵਾਜ਼ ਸੁਣ ਕੇ, ਵਸਨੀਕ ਤੁਰੰਤ ਆਪਣੇ ਘਰਾਂ ਤੋਂ ਬਾਹਰ ਆ ਗਏ | ਸਥਾਨਕ ਨਿਵਾਸੀ ਛੋਟੇ ਖਾਨ ਨੇ ਦੱਸਿਆ ਕਿ ਸਵੇਰੇ 4:30 ਵਜੇ ਦੇ ਕਰੀਬ, ਅਚਾਨਕ ਤੂਫ਼ਾਨ ਆਇਆ, ਜਿਸ ਤੋਂ ਬਾਅਦ ਬਿਜਲੀ ਡਿੱਗ ਪਈ | ਉਸ ਨੇ ਵੱਡੇ ਦਰੱਖ਼ਤ ਨੂੰ ਟੁੱਟਦੇ ਅਤੇ ਘਰਾਂ 'ਤੇ ਡਿਗਦੇ ਦੇਖਿਆ, ਜਿਸ ਨਾਲ ਕਾਫ਼ੀ ਨੁਕਸਾਨ ਹੋਇਆ | ਇਸ ਦੌਰਾਨ ਮਲਕੀਤ ਸਿੰਘ ਨੇ ਦੱਸਿਆ ਕਿ ਪਿੰਡ ਵਾਸੀ ਆਪਣੇ ਤੌਰ 'ਤੇ ਰਾਹਤ ਕਾਰਜਾਂ ਵਿੱਚ ਲੱਗੇ ਹੋਏ ਹਨ ਅਤੇ ਡਿੱਗੇ ਹੋਏ ਦਰੱਖ਼ਤਾਂ ਨੂੰ ਹਟਾਉਣ ਦਾ ਕੰਮ ਕਰ ਰਹੇ ਹਨ | ਪ੍ਰਭਾਵਿਤ ਪਰਿਵਾਰਾਂ ਨੇ ਪ੍ਰਸ਼ਾਸਨ ਤੋਂ ਨੁਕਸਾਨ ਦਾ ਮੁਲਾਂਕਣ ਕਰਨ ਅਤੇ ਢੁਕਵੀਂ ਸਹਾਇਤਾ ਪ੍ਰਦਾਨ ਕਰਨ ਦੀ ਮੰਗ ਕੀਤੀ ਹੈ | ਪਿੰਡ ਵਾਸੀਆਂ ਨੇ ਇਹ ਵੀ ਕਿਹਾ ਕਿ ਭਵਿੱਖ ਵਿੱਚ ਅਜਿਹੇ ਹਾਦਸਿਆਂ ਨੂੰ ਰੋਕਣ ਲਈ ਪੁਰਾਣੇ ਅਤੇ ਖ਼ਰਾਬ ਹੋਏ ਦਰੱਖ਼ਤਾਂ ਦਾ ਸਮੇਂ-ਸਮੇਂ 'ਤੇ ਨਿਰੀਖਣ ਕੀਤਾ ਜਾਣਾ ਚਾਹੀਦਾ ਹੈ |
