ਬਰਨਾਲਾ, 2 ਮਈ (ਗੁਰਪ੍ਰੀਤ ਸਿੰਘ ਲਾਡੀ)-ਆਲ ਇੰਡੀਆ ਰੇਲਵੇ ਕੈਟਰਿੰਗ ਲਾਇਸੈਂਸੀਜ਼ ਵੈੱਲਫੇਅਰ ਐਸੋਸੀਏਸ਼ਨ ਨੇ ਰੇਲਵੇ ਮੰਤਰਾਲੇ ਅਤੇ ਰੇਲਵੇ ਬੋਰਡ ਨੂੰ ਅਪੀਲ ਕੀਤੀ ਹੈ ਕਿ ਉਹ ਰੇਲਵੇ ਪਲੇਟਫ਼ਾਰਮਾਂ 'ਤੇ ਕੈਟਰਿੰਗ ਸਟਾਲ, ਟਰਾਲੀਆਂ, ਟਰੇ, ਢਾਬੇ ਅਤੇ ਹੋਰ ਵੈਡਿੰਗ ਯੂਨਿਟਾਂ ਚਲਾਉਣ ਵਾਲੇ ਲਾਇਸੈਂਸਧਾਰਕਾਂ ਨੂੰ ਤੁਰੰਤ ਰਾਹਤ ਪ੍ਰਦਾਨ ਕਰੇ | ਐਸੋਸੀਏਸ਼ਨ ਦੇ ਪ੍ਰਧਾਨ ਰਵਿੰਦਰ ਗੁਪਤਾ ਨੇ ਕਿਹਾ ਕਿ ਵਪਾਰਕ ਗੈਸ ਸਿਲੰਡਰਾਂ ਦੀ ਕੀਮਤ ਵਿਚ 993 ਰੁਪਏ ਦਾ ਭਾਰੀ ਵਾਧਾ ਹੋਇਆ ਹੈ | ਇਸ ਸਥਿਤੀ ਨੇ ਵਿਕੇ੍ਰਤਾਵਾਂ ਲਈ ਬਹੁਤ ਮੁਸ਼ਕਲਾਂ ਅਤੇ ਚੁਨੌਤੀਆਂ ਪੈਦਾ ਕਰ ਦਿੱਤੀਆਂ ਹਨ ਅਤੇ ਵਪਾਰਕ ਗੈਸ ਸਿਲੰਡਰ ਦਾ ਰੇਟ ਲਗਭਗ 3100/- ਰੁਪਏ ਹੋ ਗਿਆ ਹੈ | ਉਨ੍ਹਾਂ ਇਹ ਵੀ ਦੱਸਿਆ ਕਿ ਸਰਕਾਰ ਨੇ 1 ਮਾਰਚ ਤੋਂ ਵਪਾਰਕ ਸਿਲੰਡਰਾਂ ਦੀ ਸਪਲਾਈ ਬੰਦ ਕਰ ਦਿੱਤੀ ਹੈ | ਜਿਸ ਨਾਲ ਛੋਟੇ ਪੱਧਰ ਦੇ ਵਿਕੇ੍ਰਤਾਵਾਂ ਦੀ ਦੁਰਦਸ਼ਾ ਹੋਰ ਵੀ ਗੰਭੀਰ ਅਤੇ ਚਿੰਤਾਜਨਕ ਹੋ ਗਈ ਹੈ | ਨਤੀਜੇ ਵਜੋਂ ਲੱਖਾਂ ਵੈਂਡਰ ਹੁਣ ਭੁੱਖਮਰੀ ਦੇ ਕੰਢੇ 'ਤੇ ਹਨ | ਉਨ੍ਹਾਂ ਦੱਸਿਆ ਕਿ ਰੇਲਵੇ ਮੰਤਰੀ ਨੂੰ ਲਿਖੇ ਪੱਤਰ ਵਿਚ ਚਾਹ ਅਤੇ ਮਿਨਰਲ ਵਾਟਰ ਸੰਬੰਧੀ ਇਕ ਖ਼ਾਸ ਮੰਗ ਨੂੰ ੂ ਵੀ ਉਜਾਗਰ ਕੀਤਾ ਗਿਆ ਹੈ, ਜੋ ਕਿ ਸਮੂਹਿਕ ਤੌਰ 'ਤੇ ਕੁੱਲ ਵਿੱਕਰੀ ਦਾ ਲਗਭਗ 40 ਪ੍ਰਤੀਸ਼ਤ ਹੈ | ਜਿਨ੍ਹਾਂ ਦੀਆਂ ਵਿੱਕਰੀ ਦਰਾਂ ਪਿਛਲੇ 10 ਸਾਲਾਂ ਤੋਂ ਸੋਧੀਆਂ ਨਹੀਂ ਗਈਆਂ ਹਨ | ਰੇਲਵੇ ਪਲੇਟਫ਼ਾਰਮਾਂ 'ਤੇ ਵੈਂਡਰ ਇਸ ਨੂੰ ਸਿਰਫ਼ 15 ਰੁਪਏ ਵਿਚ ਵੇਚਣ ਲਈ ਮਜਬੂਰ ਹਨ | ਲਾਇਸੈਂਸ ਧਾਰਕਾਂ ਅਨੁਸਾਰ ਉਨ੍ਹਾਂ ਉੱਤੇ 18 ਪ੍ਰਤੀਸ਼ਤ ਜੀ.ਐਸ.ਟੀ, 5 ਪ੍ਰਤੀਸ਼ਤ ਜੀ.ਐਸ.ਟੀ. ਸੇਲ, 12 ਪ੍ਰਤੀਸ਼ਤ ਲਾਇਸੈਂਸ ਫ਼ੀਸ, 20 ਪ੍ਰਤੀਸ਼ਤ ਵੈਂਡਰਾਂ ਦਾ ਕਮਿਸ਼ਨ, ਅਤੇ 5-10 ਫ਼ੀਸਦੀ ਹੋਰ ਟੈਕਸਾਂ ਸਮੇਤ ਵਾਧੂ ਬੋਝ ਪੈਂਦਾ ਹੈ | ਕੁੱਲ ਮਿਲਾ ਕੇ ਲਗਭਗ 50 ਫ਼ੀਸਦੀ ਮਾਲੀਆ ਟੈਕਸਾਂ ਅਤੇ ਫ਼ੀਸਾਂ ਦੁਆਰਾ ਖਪਤ ਹੁੰਦਾ ਹੈ, ਜਿਸ ਨਾਲ ਸਿਰਫ਼ 30 ਫ਼ੀਸਦੀ ਦਾ ਸ਼ੁੱਧ ਲਾਭ ਬਚਦਾ ਹੈ | ਇਸ ਲਈ ਐਸੋਸੀਏਸ਼ਨ ਨੇ ਰੇਲਵੇ ਪ੍ਰਸ਼ਾਸਨ ਨੂੰ ਅਪੀਲ ਕੀਤੀ ਹੈ ਕਿ ਲਾਇਸੈਂਸ ਫ਼ੀਸਾਂ 'ਤੇ ਰਾਹਤ ਦਿੱਤੀ ਜਾਵੇ ਅਤੇ ਚਾਹ ਅਤੇ ਖਣਿਜ ਪਾਣੀ ਦੀਆਂ ਵਿੱਕਰੀ ਕੀਮਤਾਂ ਨੂੰ ਤੁਰੰਤ ਵਧਾਇਆ ਜਾਵੇ |
