'ਸਹਿਜ ਐਕਟਿੰਗ' ਦਾ ਦੂਜਾ ਨਾਂਅ ਹੈ ਨਿਧੀ ਸ਼ੈਟੀ

ਪਿਛਲੇ 9 ਸਾਲਾਂ ਤੋਂ ਇਸ ਸਨਅਤ ਵਿਚ ਕੰਮ ਕਰ ਰਹੀ ਅਦਾਕਾਰਾ ਨਿਧੀ ਸ਼ੈਟੀ ਭਾਰਤੀ ਟੈਲੀਵਿਜ਼ਨ ਅਤੇ ਡਿਜੀਟਲ ਸਪੇਸ ਦੀ ਇਕ ਉੱਭਰਦੀ ਹੋਈ ਨੌਜਵਾਨ ਅਭਿਨੇਤਰੀ ਹੈ। ਉਹ ਆਪਣੀ ਸਹਿਜ ਐਕਟਿੰਗ ਅਤੇ ਸਕ੍ਰੀਨ ਪੇਸ਼ਕਾਰੀ ਲਈ ਵੀ ਜਾਣੀ ਜਾਂਦੀ ਹੈ। ਨਿਧੀ ਸ਼ੈਟੀ ਨੇ ਓ.ਟੀ.ਟੀ. ਤੋਂ ਲੈ ਕੇ ਮੁੱਖ ਧਾਰਾ ਦੇ ਟੀ.ਵੀ. ਲੜੀਵਾਰਾਂ ਤੱਕ ਦਾ ਸਫ਼ਰ ਤੈਅ ਕਰਦੇ ਹੋਏ ਬਿਹਤਰੀਨ ਅਦਾਕਾਰੀ ਦੇ ਦਮ 'ਤੇ ਆਪਣੀ ਇਕ ਖ਼ਾਸ ਪਛਾਣ ਬਣਾਈ ਹੈ। ਨਿਧੀ ਸ਼ੈਟੀ ਨੇ ਕਾਲਜ ਦੀ ਪੜ੍ਹਾਈ ਖ਼ਤਮ ਕਰਨ ਤੋਂ ਬਾਅਦ ਕਰੀਅਰ ਦੀ ਸ਼ੁਰੂਆਤ ਕਈ ਇਸ਼ਤਿਹਾਰਾਂ ਅਤੇ ਡਿਜੀਟਲ ਕੰਟੈਂਟ ਤੋਂ ਕਰਦੇ ਹੋਏ ਐਕਟਿੰਗ ਵਿਚ ਹੀ ਕਰੀਅਰ ਬਣਾਉਣ ਦਾ ਫ਼ੈਸਲਾ ਕੀਤਾ। ਨਿਧੀ ਸ਼ੈਟੀ ਨੂੰ ਡਿਜੀਟਲ ਸਪੇਸ ਵਿਚ ਪਛਾਣ 'ਡਾਇਸ ਮੀਡੀਆ' ਦੀ ਬੇਹੱਦ ਹਰਮਨਪਿਆਰੇ ਇੰਸਟਾਗ੍ਰਾਮ ਅਤੇ ਯੂ-ਟਿਊਬ ਮਿੰਨੀ ਸੀਰੀਜ਼ 'ਫਰਸਟ' ਤੋਂ ਮਿਲੀ। ਇਸ ਸ਼ੋਅ ਵਿਚ ਉਸ ਦੇ ਕੰਮ ਨੂੰ ਨੌਜਵਾਨਾਂ ਵਲੋਂ ਕਾਫ਼ੀ ਪਸੰਦ ਕੀਤਾ ਗਿਆ। ਇਸ ਤੋਂ ਬਾਅਦ ਉਸ ਨੇ ਕਲਰਜ਼ ਟੀ.ਵੀ. ਦੇ ਮਸ਼ਹੂਰ ਸੁਪਰਨੈਚੁਲਰ ਫੈਂਟੇਸੀ ਸ਼ੋਅ 'ਤੇਰੇ ਇਸ਼ਕ ਮੇਂ ਘਾਇਲ' ਤੋਂ ਟੈਲੀਵਿਜ਼ਨ ਦੀ ਦੁਨੀਆ ਵਿਚ ਕਦਮ ਰੱਖਿਆ। ਇਸ ਸ਼ੋਅ ਵਿਚ ਉਸ ਨੂੰ ਕਰਨ ਕੁੰਦਰਾ, ਗਸ਼ਮੀਰ ਮਹਾਜਨੀ ਅਤੇ ਰੀਮ ਸ਼ੇਖ ਵਰਗੇ ਵੱਡੇ ਕਲਾਕਾਰਾਂ ਨਾਲ ਕੰਮ ਕਰਨ ਦਾ ਮੌਕਾ ਮਿਲਿਆ। ਇਸ ਸ਼ੋਅ ਵਿਚ ਉਸ ਨੇ ਇਕ ਸਾਧਾਰਨ ਕੁੜੀ ਤੋਂ ਭੇੜੀਏ ਵਿਚ ਤਬਦੀਲ ਹੋ ਜਾਣ ਵਾਲੀ 'ਸਾਰਾ' ਦਾ ਕਿਰਦਾਰ ਨਿਭਾਇਆ ਸੀ। ਇਸ ਤੋਂ ਇਲਾਵਾ ਉਹ ਆਧੁਨਿਕ ਅਤੇ ਨਵੇਂ ਜ਼ਮਾਨੇ ਦੇ ਪ੍ਰਾਜੈਕਟਸ 'ਜਬ ਜੋਡੀਐਕਸ ਮੇਟ' ਦਾ ਵੀ ਹਿੱਸਾ ਰਹੀ ਹੈ। ਇਸ ਵਿਚ ਉਸ ਦੇ ਅਭਿਨੈ ਨੂੰ ਬਹੁਤ ਪਸੰਦ ਕੀਤਾ ਗਿਆ ਸੀ।