ਬ੍ਰਾਜ਼ੀਲ ਨੇ ਹੈਤੀ ’ਤੇ 3-0 ਨਾਲ ਕੀਤੀ ਜਿੱਤ ਦਰਜ

ਨਿਊਯਾਰਕ, 20 ਜੂਨ (ਰਾਜੂ ਸਹਿਬਾਜਪੁਰਾ)-ਪੰਜ ਵਾਰ ਦੀ ਵਿਸ਼ਵ ਚੈਂਪੀਅਨ ਬ੍ਰਾਜ਼ੀਲ ਨੇ ਫੀਫਾ ਵਿਸ਼ਵ ਕੱਪ 2026 ਦੇ ਗਰੁੱਪ ‘ਸੀ’ ਦੇ ਮੁਕਾਬਲੇ ‘ਚ ਹੈਤੀ ਨੂੰ 3-0 ਨਾਲ ਹਰਾ ਕੇ ਆਪਣੀ ਮੁਹਿੰਮ ਨੂੰ ਮੁੜ ਪਟੜੀ ‘ਤੇ ਲਿਆ ਦਿੱਤਾ। ਇਸ ਜਿੱਤ ਦੇ ਹੀਰੋ ਰਹੇ ਸਟਾਰ ਫਾਰਵਰਡ ਵਿਨੀਸੀਅਸ ਜੂਨੀਅਰ, ਜਿਨ੍ਹਾਂ ਨੇ ਇਕ ਗੋਲ ਕੀਤਾ ਅਤੇ 2 ਹੋਰ ਗੋਲ ਬਣਾਉਣ ‘ਚ ਅਹਿਮ ਭੂਮਿਕਾ ਨਿਭਾਈ। ਫਿਲਾਡੈਲਫੀਆ ‘ਚ ਖੇਡੇ ਗਏ ਇਸ ਮੈਚ ਵਿਚ ਬ੍ਰਾਜ਼ੀਲ ਨੇ ਸ਼ੁਰੂ ਤੋਂ ਹੀ ਦਬਦਬਾ ਬਣਾਈ ਰੱਖਿਆ। ਪਹਿਲਾ ਗੋਲ ਮੈਥਿਊਸ ਕੁਨ੍ਹਾ ਨੇ ਕੀਤਾ, ਜਦੋਂ ਵਿਨੀਸੀਅਸ ਦੀ ਸ਼ਾਟ ਹੈਤੀ ਦੇ ਗੋਲਕੀਪਰ ਜੌਨੀ ਪਲਾਸੀਡੇ ਦੇ ਹੱਥਾਂ ਤੋਂ ਟਕਰਾ ਕੇ ਵਾਪਸ ਆਈ ਤੇ ਕੁਨ੍ਹਾ ਨੇ ਗੇਂਦ ਨੂੰ ਜਾਲ ‘ਚ ਪਹੁੰਚਾ ਦਿੱਤਾ। ਇਸ ਤੋਂ ਬਾਅਦ ਵਿਨੀਸੀਅਸ ਨੇ ਲੰਬਾ ਪਾਸ ਦੇ ਕੇ ਦੁਬਾਰਾ ਕੁਨ੍ਹਾ ਨੂੰ ਗੋਲ ਕਰਨ ਦਾ ਮੌਕਾ ਦਿੱਤਾ ਅਤੇ ਬ੍ਰਾਜ਼ੀਲ ਦੀ ਬੜਤ 2-0 ਕਰ ਦਿੱਤੀ। ਪਹਿਲੇ ਹਾਫ਼ ਦੇ ਇੰਜਰੀ ਟਾਈਮ ‘ਚ ਵਿਨੀਸੀਅਸ ਜੂਨੀਅਰ ਨੇ ਖੁਦ ਸ਼ਾਨਦਾਰ ਗੋਲ ਕਰਕੇ ਸਕੋਰ 3-0 ਕਰ ਦਿੱਤਾ। ਰੀਅਲ ਮੈਡਰਿਡ ਦੇ ਇਸ ਸਿਤਾਰੇ ਨੇ ਹੈਤੀ ਦੇ ਗੋਲਕੀਪਰ ਨੂੰ ਇਕੱਲੇ ਮੁਕਾਬਲੇ ਵਿੱਚ ਹਰਾਉਂਦੇ ਹੋਏ ਗੇਂਦ ਨੂੰ ਆਸਾਨੀ ਨਾਲ ਜਾਲ ‘ਚ ਪਹੁੰਚਾਇਆ। ਦੂਜੇ ਅੱਧ ‘ਚ ਵੀ ਬ੍ਰਾਜ਼ੀਲ ਨੇ ਕਈ ਮੌਕੇ ਬਣਾਏ। ਵਿਨੀਸੀਅਸ ਨੇ ਗੈਬਰੀਅਲ ਮਾਰਟੀਨੇਲੀ ਲਈ ਵੀ ਇੱਕ ਸ਼ਾਨਦਾਰ ਮੌਕਾ ਤਿਆਰ ਕੀਤਾ, ਪਰ ਉਸਦਾ ਸ਼ਾਟ ਪੋਸਟ ਨਾਲ ਟਕਰਾ ਗਿਆ। ਪਿਛਲੇ ਮੈਚ ‘ਚ ਮੋਰੱਕੋ ਨਾਲ 1-1 ਦੀ ਬਰਾਬਰੀ ਤੋਂ ਬਾਅਦ ਬ੍ਰਾਜ਼ੀਲ ਦੇ ਕੋਚ ਕਾਰਲੋ ਐਂਸੇਲੋਟੀ ‘ਤੇ ਦਬਾਅ ਸੀ, ਪਰ ਇਸ ਜਿੱਤ ਨਾਲ ਟੀਮ ਨੇ ਆਪਣੇ ਪ੍ਰਸ਼ੰਸਕਾਂ ਨੂੰ ਖੁਸ਼ ਕਰ ਦਿੱਤਾ। ਇਸ ਨਤੀਜੇ ਨਾਲ ਬ੍ਰਾਜ਼ੀਲ ਅਤੇ ਮੋਰੱਕੋ ਦੋਵੇਂ 4-4 ਅੰਕਾਂ ਨਾਲ ਗਰੁੱਪ ‘ਸੀ’ ਦੇ ਸਿਖਰ ‘ਤੇ ਹਨ, ਜਦਕਿ ਸਕਾਟਲੈਂਡ 3 ਅੰਕਾਂ ਨਾਲ ਤੀਜੇ ਸਥਾਨ ‘ਤੇ ਹੈ। ਹੈਤੀ ਲਗਾਤਾਰ ਦੂਜੀ ਹਾਰ ਨਾਲ ਟੂਰਨਾਮੈਂਟ ਤੋਂ ਬਾਹਰ ਹੋਣ ਵਾਲੀ ਪਹਿਲੀ ਟੀਮ ਬਣ ਗਈ ਹੈ।