ਰੀਫੌਰਮ ਯੂ.ਕੇ. ਦੇ ਉਮੀਦਵਾਰ ਵੱਲੋਂ ਨਸਲੀ ਹਮਲੇ ਦੀ ਪੀੜਤ ਸਿੱਖ ਮਹਿਲਾ ਬਾਬਤ ਇਤਰਾਜ਼ਯੋਗ ਟਿੱਪਣੀ
ਅਜੀਤ ਡੈਸਕ
06-05-2026
ਲੰਡਨ, 5 ਮਈ (ਮਨਪ੍ਰੀਤ ਸਿੰਘ ਬੱਧਨੀ ਕਲਾਂ)-ਰਿਫੌਰਮ ਪਾਰਟੀ ਦੇ ਉਮੀਦਵਾਰ ਸਟੂਅਰਟ ਪ੍ਰਾਇਰ ਵੱਲੋਂ ਬਰਮਿੰਘਮ ਦੇ ਇਲਾਕੇ ਵਿਚ ਸਿੱਖ ਮਹਿਲਾਵਾਂ 'ਤੇ ਹੋਏ ਨਸਲੀ ਹਮਲੇ ਅਤੇ ਜਬਰ ਜਨਾਹ ਵਰਗੇ ਘਨੌਣੇ ਅਪਰਾਧਾਂ ਤੋਂ ਬਾਅਦ ਇਤਰਾਜ਼ਯੋਗ ਟਿੱਪਣੀ ਕਰਦਿਆਂ ਘਟਨਾਂ ਨੂੰ ਸਹੀ ਠਹਿਰਾਇਆ | ਉਹਨਾਂ ਜਿੱਥੇ ਗੋਰੇ ਲੋਕਾਂ ਨੂੰ ਸਭ ਤੋਂ ਉੱਤਮ ਨਸਲ ਐਲਾਨਿਆ, ਉੱਥੇ ਹੀ ਮੁਸਲਮਾਨਾਂ ਲਈ ਚੂਹੇ ਵਰਗੇ ਸ਼ਬਦਾਂ ਦੀ ਵਰਤੋਂ ਕੀਤੀ, ਇਥੇ ਹੀ ਬੱਸ ਨਹੀਂ ਉਹਨਾਂ ਕਾਲੇ ਲੋਕਾਂ ਦੀ ਬੁੱਧੀ ਬਾਰੇ ਵੀ ਨਸਲੀ ਟਿੱਪਣੀਆਂ ਕੀਤੀਆਂ | ਸਟੂਅਰਟ ਪ੍ਰਾਇਰ, ਜੋ ਸਥਾਨਿਕ ਚੋਣਾਂ ਲਈ ਐਸੈਕਸ ਹਲਕੇ ਤੋਂ ਰੀਫੌਰਮ ਯੂ.ਕੇ. ਦਾ ਉਮੀਦਵਾਰ ਹੈ | ਸੰਸਦ ਮੈਂਬਰ ਗੁਰਿੰਦਰ ਸਿੰਘ ਜੋਸਨ, ਸੰਸਦ ਮੈਂਬਰ ਸਾਰਾਹ ਕੂਮਬਸ, ਸੰਸਦ ਮੈਂਬਰ ਐਨਟੋਨੀਆ ਬੇਂਸ, ਐਲੈਕਸ ਬਾਲਿੰਗਰ ਨੇ ਰੀਫੌਰਮ ਯੂ ਕੇ ਦੇ ਲੀਡਰ ਰੇਅ ਨੌਕ ਨੂੰ ਪੱਤਰ ਲਿਖ ਕੇ ਸਟੂਅਰਟ ਨੂੰ ਮੁਅੱਤਲ ਕਰਕੇ ਕਾਰਵਾਈ ਕਰਨ ਦੀ ਮੰਗ ਕੀਤੀ ਹੈ |
