ਨਿਊਯਾਰਕ, 25 ਜੂਨ (ਰਾਜੂ ਸਹਿਬਾਜ਼ਪੁਰਾ )-ਅਮਰੀਕਾ ਦੇ ਕਨੈਕਟੀਕਟ ਸੂਬੇ ਦੇ ਬਰਲਿੰਗਟਨ ਕਸਬੇ ਵਿਚ ਇਕ ਹੈਰਾਨ ਕਰਨ ਵਾਲੀ ਘਟਨਾ ਸਾਹਮਣੇ ਆਈ ਹੈ। ਫੋਰਕਲੋਜ਼ਰ ਨਿਲਾਮੀ ਰਾਹੀਂ ਇਕ ਵਿਅਕਤੀ ਨੇ “ਜਿਵੇਂ ਹੈ” ਇਕ ਘਰ ਖਰੀਦਿਆ। ਜਦੋਂ ਉਹ ਘਰ ਦਾ ਕਬਜ਼ਾ ਲੈਣ ਲਈ ਅੰਦਰ ਗਿਆ ਤਾਂ ਉੱਥੇ ਤਿੰਨ ਵਿਅਕਤੀਆਂ ਦੀਆਂ ਲਾਸ਼ਾਂ ਮਿਲਣ ਕਾਰਨ ਉਹ ਹੈਰਾਨ ਰਹਿ ਗਿਆ। ਉਸ ਨੇ ਤੁਰੰਤ ਪੁਲਿਸ ਨੂੰ ਸੂਚਨਾ ਦਿੱਤੀ। ਕਨੈਕਟੀਕਟ ਸਟੇਟ ਪੁਲਿਸ ਮੁਤਾਬਕ, 2 ਮ੍ਰਿਤਕਾਂ ਦੀ ਪਛਾਣ 53 ਸਾਲਾ ਸੈਲੀ ਐਨ ਅਤੇ ਉਸ ਦੇ 23 ਸਾਲਾ ਪੁੱਤਰ ਬਰਾਇਨ ਕੈਸ਼ ਵਜੋਂ ਹੋਈ ਹੈ। ਤੀਜੇ ਵਿਅਕਤੀ ਦੀ ਪਛਾਣ ਹਾਲੇ ਤੱਕ ਨਹੀਂ ਹੋ ਸਕੀ। ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਇਹ ਸਪੱਸ਼ਟ ਨਹੀਂ ਕਿ ਲਾਸ਼ਾਂ ਘਰ ’ਚ ਕਿੰਨੇ ਸਮੇਂ ਤੋਂ ਪਈਆਂ ਸਨ। ਮੈਡੀਕਲ ਐਗਜ਼ਾਮਿਨਰ ਦਫ਼ਤਰ ਮੌਤਾਂ ਦੇ ਅਸਲ ਕਾਰਨ ਦੀ ਜਾਂਚ ਕਰ ਰਿਹਾ ਹੈ।
