ਨਿਊਯਾਰਕ, 4 ਜੁਲਾਈ (ਰਾਜੂ ਸਹਿਬਾਜ਼ਪੁਰਾ)-ਅਮਰੀਕਾ ਦੀ ਇਕ ਸੰਘੀ ਅਪੀਲੀ ਅਦਾਲਤ ਨੇ ਟਰੰਪ ਪ੍ਰਸ਼ਾਸਨ ਨੂੰ ਫਿਲਾਡੈਲਫੀਆ ਸਥਿਤ ਰਾਸ਼ਟਰਪਤੀ ਜਾਰਜ ਵਾਸ਼ਿੰਗਟਨ ਦੇ ਇਤਿਹਾਸਕ ਘਰ ਵਿੱਚ ਨਵੇਂ ਜਾਣਕਾਰੀ ਪੈਨਲ ਮੁੜ ਲਗਾਉਣ ਦੀ ਇਜਾਜ਼ਤ ਦੇ ਦਿੱਤੀ ਹੈ। ਇਹ ਪੈਨਲ 2010 ਵਿੱਚ ਲਗਾਈ ਗਈ ਉਸ ਪ੍ਰਦਰਸ਼ਨੀ ਦੀ ਥਾਂ ਲੈਣਗੇ, ਜਿਸ ਵਿੱਚ ਜਾਰਜ ਅਤੇ ਮਾਰਥਾ ਵਾਸ਼ਿੰਗਟਨ ਦੇ ਘਰ ਰਹਿਣ ਵਾਲੇ ਨੌਂ ਗੁਲਾਮਾਂ ਦੀ ਜ਼ਿੰਦਗੀ ਅਤੇ ਗੁਲਾਮੀ ਦੇ ਇਤਿਹਾਸ ਬਾਰੇ ਵਿਸਥਾਰ ਨਾਲ ਜਾਣਕਾਰੀ ਦਿੱਤੀ ਗਈ ਸੀ। ਟਰੰਪ ਪ੍ਰਸ਼ਾਸਨ ਦਾ ਕਹਿਣਾ ਹੈ ਕਿ ਨਵੇਂ ਪੈਨਲਾਂ ਵਿੱਚ ਵੀ ਗੁਲਾਮੀ, ਗੁਲਾਮ ਬਣਾਏ ਗਏ ਲੋਕਾਂ, ਗੁਲਾਮੀ ਵਿਰੋਧੀ ਅੰਦੋਲਨ ਅਤੇ ਸਿਵਲ ਰਾਈਟਸ ਮੂਵਮੈਂਟ ਦਾ ਜ਼ਿਕਰ ਕੀਤਾ ਗਿਆ ਹੈ, ਪਰ ਆਲੋਚਕਾਂ ਦਾ ਦੋਸ਼ ਹੈ ਕਿ ਇਨ੍ਹਾਂ ਵਿੱਚ ਗੁਲਾਮੀ ਦੇ ਕੌੜੇ ਇਤਿਹਾਸ ਨੂੰ ਪਹਿਲਾਂ ਨਾਲੋਂ ਘੱਟ ਮਹੱਤਵ ਦਿੱਤਾ ਗਿਆ ਹੈ ਅਤੇ ਅਮਰੀਕਾ ਦੀਆਂ ਉਪਲਬਧੀਆਂ ਨੂੰ ਵੱਧ ਉਭਾਰਿਆ ਗਿਆ ਹੈ। ਫਿਲਾਡੈਲਫੀਆ ਸ਼ਹਿਰ ਨੇ ਇਸ ਫੈਸਲੇ ਦਾ ਵਿਰੋਧ ਕਰਦਿਆਂ ਅਦਾਲਤ ਤੋਂ ਨਵੇਂ ਪੈਨਲ ਲਗਾਉਣ ਦੀ ਕਾਰਵਾਈ ਰੋਕਣ ਦੀ ਮੰਗ ਕੀਤੀ ਹੈ। ਇਹ ਮਾਮਲਾ ਅਮਰੀਕਾ ਵਿੱਚ ਇਤਿਹਾਸ ਨੂੰ ਕਿਵੇਂ ਪੇਸ਼ ਕੀਤਾ ਜਾਣਾ ਚਾਹੀਦਾ ਹੈ, ਇਸ ਬਾਰੇ ਚੱਲ ਰਹੀ ਚਰਚਾ ਨੂੰ ਹੋਰ ਤੇਜ਼ ਕਰ ਸਕਦਾ ਹੈ।
